Ацы аз январы мæйы завод «Растдон» æрбайгом кодта сæрмагонд магазин «Нæртон». Ныр цæрджытæн ис йæхи аргъыл æмæ ног уагъд фыдызгъæлы продукци балхæныны фадат. Дукани ис заводы территорийыл, горæтæй у 5 км. дæрддзæгæн. Дуканийы ма «Растдон»-ы уагъд продукцийæ дарддæр ис «Евродон»-ы продукци дæр. Нырмæ заводы продукци уæй цыд æрмæст горæты дуканитæй цалдæры.
Магазины кусджытæ куыд зæгъынц, афтæмæй «Растдон» цы продукци уадзы, уыдонæй ныртæккæ уæй цæуы 17 хуызы бæрц. Уыдон нымæцы сосискæтæ æмæ сарделкæты алы хуызтæ. Заводы къухдариуæгад куыд зæгъы, афтæмæй уыдон ныртæккæ кусынц, æмæ ахуыр кæнынц фæлхасгæнджыты зæрдæтæм иууыл тынгдæр тахынæгты кæцы хуызтæ цæуынц, уыцы фарстатыл.
«Ныртæккæ уадзæм 17 хуызы продукци стуры, хуыйы æмæ гогызы фыдæй. Нæ продукцийы мах, сæйраджыдæр, пайда кæнæм бынæттон дзидзайæ. Заводмæ хæдзарон фос æрбаласынц бынæттон фермертæ», – зæгъы заводы директор Морготы Константин.
Завод уал нырма йæ продукци уадзы бренд «Нæртон»-ы бын. Фæзындзæн сæм ноджы иу бренд «Цхинвалы дзидзагуыстгæнæн комбинат». Ацы номимæ сæ продукци ласт цæудзæнис Цæгат Ирыстон æмæ Уæрæсейы базарадон объекттæм. Куыстуат официалонæй кæд ивгъуыд аз июлы мæйы æрбайгом, уæддæр хорз зындгонд у цæрджыты ‘хсæн. Цалынмæ йын йæхи дукани нæ уыд, уæдмæ дæр «Нæртон»-ы продукци иннæ æрласæггаг тахынæгтæй уæлдай хуыздæр уæй кодта. Ныр сæхи магазины цы продукци ис, уый дыууæ-æртæ бонмæ раафтид вæййы.
Морготы Константин куыд загъта, афтæмæй 29 январы уыдон сæ продукцийы иу хай арвыстой экспортмæ Уæрæсейы Федерацимæ. Зæгъы, зæгъгæ, республикæйы разамынад цымыдис кæнынц продукцийы ассортиментмæ, уымæ гæсгæ рæстæгæй-рæстæгмæ æрбацæуынц æмæ бабæрæг кæнынц завод. Райгондæй баззадысты, æрæджы нæхи территорийыл магазин кæй бакодтам, уыцы цауæй дæр. Официалонæй сæм магазин байгом кæныны церемонимæ фæуазæг Хицауады Сæрдар Пухаты Эрик. Райгондæй банысан кодта фы-дызгъæлы заводы куыст æмæ йæхи сæрмагонд магазины æрбаконды ахсджиагдзинад.
Æмæ, æцæгдæр, заводы æрбайгом бæлвырд кæны Хуссар Ирыстоны экономикæйы райрæзты фыццаг къахдзæфтæ. Ацы куыстуаты æрбайгомыл куыстой бирæ адæм. Кондады сæргълæууæг егъау уæрæсейаг агрохолдинг «Евродон»-ы генералон директор Уанеты Вадим проекты реализацийыл бахардз кодта 156 милуан сомы. Уыдонæй 30 милуан сомы уыдысты Вадимæн йæхи сæрмагонд фæрæзтæ, иннæтæ та йын Уæрæсейы æртæ банг рахицæн кодта Инвестпрограммæйы реализацийы фæлгæтты. Ныртæккæ завод бынæттон цæрджытæй куысты бынæттæй сифтонг кодта 40 адæймаджы.
Йæ кусджытæ рацыдысты стажировкæ «Евродон»-ы. Заводы технологитæ дæттынц продуктты деликатон æмæ пайдаджын æууæлтæ баиу кæныны фадат. Специалисттæ куыд зæгъынц, афтæмæй продукцийы уникалондзинад ис уый мидæг, æмæ деликатесон стуры фыд гогызы æмæ хъазы фыд нæ дæттынц фадат организмы холестерин æмбырд кæнынæн. Уыдон сты пайдаджын æмæ натуралон хæринæгтæ.
Заводы къухдариуæгад ныфс дæтты, фидæны «Растдон»-ы продукци кæй суыдзæнис ерысхъом Уæрæсейы базарадон фæзуæтты.
Уазæгты Марфа
Comments are closed, but trackbacks and pingbacks are open.