Знон республикæ банысан кодта Адæмы иудзинады бон

Знон 4-æм ноябры Адæмон иудзинады бон нæ республикæйы уагъд æрцыд «Иудзинад»-ы фыццаг патриотон мемориалон алыгъды мадзал Республикæ Хуссар Ирыстоны æмæ Уæрæсейы хæдбардзинад æмæ сæрибардзинады сæрыл чи фæмард, уыдон рухс ном арынæн.
Бæрæгбонон мадзал райдыдта фæмардуæвæг фидауынгæнджыты цырты разæй. Уым патриотикон алыгъды хайадисджытæн лæвæрд æрцыд майкæтæ – сырх, бур æмæ урс – ирон тырысайы хуызтæй.
Мадзалмæ æрбацыдысты Республикæ Хуссар Ирыстоны къухдариуæгад Президент Тыбылты Леониды сæргълæудæй, æхсæнады минæвæрттæ, скъолаты ахуыргæнинæгтæ, студенттæ, уæрæсейаг 4-æм базæйы службæгæнджытæ, Рог атлетикæйы федерацийы æрыгон спортсментæ.
Мадзаламонæг, Хуссар Ирыстоны паддзахадон университеты историйы факультеты декан Тадтаты Таймураз радзырдта ацы нысаниуæгджын боны историйы тыххæй.
Адæмон иудзинады бон, зæгъгæ, Уæрæсейы Федерацийы æмбæстæгтæ нысан кæнынц, кæм фæнды ма цæрой, уæддæр. Уый нысан цæуы Уæрæсейы хъайтарон историон цаутæй фæрстæн кад кæнын æмæ национ символы æмбарындзинады тыххæй. Фыдыбæстæйы сæрибардзинад æмæ хæдбардзинад чи бахъахъхъæдта, уыцы алы уырнынад æмæ диныл хæст адæм уæд ссæрибар кодтой Мæскуыйы тыхæйисджытæй.
«Уымæ гæсгæ 4 ноябрь у адæмы иумиаг бæрæгбон. Абон ахсджиаг у адæмон иудзинад хъахъхъæнын. Ууыл баст у адæмы хæлардзинад дæр. Уадз, ацы бон алкæмæндæр йæ зæрдыл лæууын кæнæт иу хъуыддаг – иудзинады нæ тых æмæ нæ фидардзинад кæй ис. Уадз, алчидæр æргом уæд хæлардзинадмæ, иунæг адæймæгтæ æмæ йæ фарсмæ балæууын кæмæн хъæуы, уадз, уыдон дæр ацы бон ма уæд рох», – дзырдта Таймураз.
Адæмон иудзинады официалон хайы цытджын церемони байгом Республикæ Хуссар Ирыстон æмæ Уæрæсейы Федерацийы Паддзахадон гимны зæлтæй.
Республикæ Хуссар Ирыстоны Президент Тыбылты Леонид дæр ацы бон банымадта нысаниуæгджын боныл. Ацы бон, зæгъгæ, дзурæг у ууыл, æмæ мах хъуамæ иу хъуыддагыл хæст уæм, цæмæй иумæ нæ райдзаст фидæнмæ æрцæуæм.
«Фæстаг азты мах æвдисæн стæм уымæн, æмæ нæ царды историйы , националон æмразыдзинад, адæмы иудзинад кæддæриддæр ахсы фыццаг бынат. Ацы бон уымæн нысан цæуы уæрæхæй. Адæмон иудзинад иу кæны алы фæлтæры адæмты, алы диныл хæст адæмты. Мах зонæм æмæ сбæлвырд кодтам уый. Нæ адæм зонынц æрбангом кæнын тыхст рæстæджы дæр æмæ сабыр рæстæджы дæр. Абон мах æнкъарæм Стыр Уæрæсейы æфсымæрон адæмы уæхск æмæ ацы нысаниуæгджын бон дзурæм стыр бузныджы ныхæстæ Уæрæсейæн нæ бæстæйæн, нæ адæмæн йе стыр æххуысы тыххæй.

Мах раст фæндагыл лæуд стæм. Бæстæйы къухдариуæгады, адæмы номæй æз сидын алкæмæ дæр, мадзалы хайадисджытæм, æгас дзыллæмæ, цæмæй бангом уæм æнустæм Уæрæсеимæ идеяйы алыварс. Кæй зæгъын æй хъæуы, не ‘взонг паддзахад фидарæй фидардæр кæнгæйæ, нæ паддзахады бындуры цы традицитæ æвæрд ис, уыдон хъахъхъæнгæйæ», – дзырдта Тыбылты Леонид.
Уый арфæ ракодта Ирыстоны адæмæн ацы нысаниуæгджын боны цытæн.
Мадзалы ма ныхасы рацыд нæ горæты 6-æм астæуккаг скъолайы ирон æвзаг æмæ литературæйы ахуыргæнæг Дыгъуызты Лианæ. Уый бæрæгбонон арфæйы ныхæстæ загъта алкæмæн дæр банысан кодта, арфмидисджын бæрæгбон кæй у ацы бон. Рох нæ, зæгъгæ, ма хъуамæ уа, Стыр Уæрæсе нæ цины дæр, нæ хъыджы дæр нæ фарсмæ кæй ис.
«Ма хъуамæ рох кæнæм уый дæр, æмæ сæйраджыдæр, иу хъуыдыйыл хæст хъуамæ уæм æмæ нын иудзинад уа. Уымæн æмæ иу тых, иу хъуыды æмæ национ идейя кæмæн ис, уымæн тыхгæнæг тых нæ ракæндзæн», – дзырдта уый.
Мах, зæгъгæ, тынг хорз адæм стæм, рæсугъд Ирыстоны хъæбысы цæрæм. «Ирон ахуыргæнæгыл бирæ хæс ис, уымæн æмæ бинонты фæстæ ирон хъуыды, ирондзинад ахуыргæнæг æвæры ахуыргæнинæгты зонды.
Джусойты Нафийы роман «Фыдæлты туг» ахуыргæнинаг куы ахуыр кæна, уæд Бегайы фæлгондзæй йæхицæн цæвиттон хъуамæ райса. Мах архайæм æмæ ноджыдæр архайдзыстæм ацы хъуыддагыл бындуронæй. Уæдæ иунæгæй ницы сараздзыстæм, балæууæм кæрæдзийы фарсмæ, нæ хицауады фарсмæ, чи цы бынаты ис, уым бацархайæм, цæмæй Ирыстон размæ цæуа, рæсугъдæй-рæсугъддæр кæна. Нæ куырыхон Президентæн дæр уæд æнцондæр уыдзæн кусын æмæ архайын Ирыстоны хæрзæбонæн», – банысан кодта Лианæ.
Мадзалы ма хайад райстой Хуссар Ирыстоны Абхазы æмæ Приднестровьейы минæварадты минæвæрттæ, уырыссаг дунеон тымбыл фынджы хайадисджытæ Елеонора Лаврик æмæ Бондаренко Ольгæ.
Адæмы сабырад чи хъахъхъæны, уыдонæн бузныджы нысанæн, Хуссар Ирыстоны хæдбардзинад æмæ адæмы сæ царды аргъæй чи бахъахъхъæдта, уыцы фидауынгæнæг тыхты салдаттæ æмæ афицерты номыл цырты раз цытджын уавæрты веноктæ æмæ дидинджытæ сæвæрдтой. Республикæ Хуссар Ирыстоны Президент Тыбылты Леонид Хицауады Сæрдар Хъуылымбегты Доменти, Парламенты Сæрдар Бибылты Анатоли, Хицауады бæрнон кусджытæ æмæ мадзалы хайадисджытæ.
Уырдыгæй патриотон алыгъды хайадисджытæ Хъайтарты уынджы араст сты нæ горæты 5-æм скъолайы кæртмæ. Уым, Ирыстоны сæрыл фæмардуæвджыты номыл æвæрд æрцыд дидинджытæ. Уырдыгæй колоннæ рараст киноконцертон зал «Чермен»-мæ. Уым æхгæд æрцыд алыгъды официалон церемони.
Мадзалы организатортæ уыдысты Республикæ Хуссар Ирыстоны Президенты Администраци, Хуссар Ирыстоны Уæрæсейы Федерацийы минæварад, уæрæсейаг 4-æм æфсæддон базæ, Уæрæсейы Федералон æдасдзинады Арæнгæрон управлени, Хъахъхъæнынады министрад, ХИПУ-йы Студентты совет, Ахуырады министрад, Мидхъуыддæгты министрад æмæ Рог атлетикæйы федераци.
Къæбулты М.

Comments are closed, but trackbacks and pingbacks are open.