Чиныг кæддæриддæр у рухс цардмæ фæндагсгарæг æмæ историйы хæрзиуджытæй сæ иу. Ног чиныджы фæзынд куыд авторæн йæхицæн, афтæ æхсæнадæн дæр вæййы стыр цины хъуыддаг. Рæхджы та хуссарирыстойнаг чиныгкæсджытæ сæ къухтæм райсдзысты æмæ хуыздæр базонгæ уыдзысты нæ фыдæлты хъæздыг культурæ, истори æмæ традицитæ бæстонæй æмæ цымыдисонæй æвдыст кæм æрцыдысты, ахæм ног чиныджы фæрстыл.
Æрæджы Республикæ Хуссар Ирыстоны сгуыхт журналист, историон зонæдты кандидат, Хетæгкаты Къостайы номыл паддзахадон премийы лауреат Хъуылымбегты Робертæн уырыссаг æвзагыл æртæсæдæ экземплярæй Ростовы мыхуыры рацыд йæ радон ног чиныг «Южная Осетия. Хроники культурной жизни», зæгъгæ, ахæм номимæ. Уæлдæрбанысангонд чиныджы мыхуырмæ бацæттæ кодтой рауагъдад «Республикæ»-йы, кæцы рухс федта Республикæ Хуссар Ирыстоны культурæйы министрады финансон æххуысы фæрцы. Ныр авторы нымадмæ гæсгæ йæ æстæм чиныгæй фæхъæздыгдæр кæндзæн Хуссар Ирыстоны чингуыты фонд.
Хъуылымбегты Роберт ныр цалдæр азы дæргъы газет «Республикæ»-йы фæрстыл мыхуыр кæны нæ истори, культурæ, аивад, æгъдæуттæ æмæ националон традициты темæтыл цымыдисон уацтæ, кæцыты ис бæстон информаци. Газеткæсджытæ æмæ æхсæнады дæр аккаг аргъ кæнынц Роберты бакуыстгонд æрмæджытæн, уымæн æмæ йæ ныхасы сæр цæуыл у, уыдонæй бирæтæ абон ферох сты, кæнæ та фендæргъуызон сты, афтæмæй аззадысты ивгъуыды. Цæмæй нæ фыдæлты хъæздыг истори ма рох кæнæм æмæ хъахъхъæд цæуой, уый тыххæй стыр ахъаз сты Роберт йæ чиныгмæ цы æнæмæнгхъæуæг зонадон хуынтæ æрбахаста, уыдон.
Чиныгмæ цы æрмæг хаст æрцыдис, уыдоныл автор бакуыста дæс азы дæргъы:. «Фыццаджыдæр мæ бузныджы ныхæстæ фæнды зæгъын чидæриддæр бацархайдта чиныг рауадзыны хъуыддагыл, æппæт уыдонæн. Сæрмагондæй та бузныг дæн газет «Республикæ»-йы сæйраг редактор Хъоцыты Андрейæ, кæй мæ разæнгард кодта чингуытæ уадзынмæ, уый тыххæй. Кæй зæгъын æй хъæуы, æнæ финансон æххуысæй абон æз мæ къухтæм нæ райстаин ахæм гъæдджын чиныг. Уыцы æххуысы хай та Зассеты Жаннæ Виссарионы чызджы фæрцы райстон.
Махæн нæ фыдæлтæ ныууагътой хъæздыг истори æмæ культурæ, сæ ферохы бар нын нæй. Чиныджы бакæсæн ис нæ театры историйы тыххæй, «Симд» куыд фæзынд, цавæр националон музыкалон инструменттæ нæм уыд, аивадон фильм «Фатимæ» куыд рацыд, ирон сылгоймаг кæлмæрзæн куыд дардта, чызджыскъæфт, нысан райсын, бинонты цард, зæгъæм, нæлгоймаг йæ худ куыд хъахъхъæдта, ирон къæбицы цы хæринæгтæ æмæ нуазинæгтæ уыдис, цы бæрæгбонтæ нысан кодтам æмæ бирæ æндæр цымыдисаг тексттæ. Хицæнæй дзы ской кодтон историон гоймæгтыл дæр, уыдон æхсæн сты: Ос-Бæгъатыр, Давид-Сослан, Коцты Бега, Айдарты Знауыр æмæ æндæртыл. Рохуаты нæ ныууагътон хъæуты цы цард фыхтис, уыдæттæ дæр. Мæнмæ гæсгæ, цымыдисон уыдзысты куыд хуымæтæг адæмæн, афтæ специалисттæн дæр. Чиныг уæрст æрцæудзæнис нæ республикæйы культурон æмæ ахуырадон уагдæттыл», – зæгъы Хъуылымбегты Роберт.
Ног чиныджы редактор Хъоцыты Андрей банысан кодта, зæгъгæ, Хъуылымбегты Роберты æрмæджытæ сты цымыдисон, æнцонæмбарæн æвзагыл фыст. Чиныг пайда уыдзæн канд ахуырдзау фæсивæдæн нæ, фæлæ ма йæ фыдæлты историмæ чи цымыдис кæны, æппæт уыдонæн. Чиныг у хуызджын, уацтæ та æххæст сты иллюстрацион æрмæгæй, зæгъæм, Хетæгкаты Къоста, Тугъанты Махарбег, Хъотайты Григол, Бежанты Вадим, Джусойты Инал, Къадзты Вадим æмæ æндæр нывгæнджыты куыстыты репродукцитæ. Æрмæджытæм лæмбынæг куы ркæсай, уæд сæ бæрæгæй зыны куыд зонад, афтæ журналистикæ дæр, ома, автор сыл бакуыста бындуронæй», – банысан кодта редактор.
ЦХУЫРБАТЫ Ларисæ
Comments are closed, but trackbacks and pingbacks are open.