Нæ артисттæ – гастролты

Ацы бонты Хуссар Ирыстоны паддзахадон драмон театры коллектив ис гастролты Уæрæсейы. Уыдон æввахс рæстæджы хайад райсдзысты æртæ Æппæтадæмон фестивалты. Бацæттæ кодтой æмæ равдисдзысты æртæ хицæн спектаклы. Уыдоныл хорз ба-куыстой, ныфсæвæрæн кæмæй ис, ахæм цалдæр æвзонг режисеры.

Гастролты ацæуыны хæдразмæ театры аивадон къухдариуæггæнæг Дзуццаты Тамерлан дзуаппытæ радта цалдæр фарстæн.

– Тамерлан, радзур-ма, хайад цы æртæ фестивалы райсдзыстут, уый тыххæй.

– 18 ноябры Санкт-Петербурджы хайад райсдзыстæм камерон театрты фестивалы. Кæсæг-Балхъарты театрыл 80 азы кæй сæххæст, уый тыххæй та нæ артисттæ 22 ноябры Налцыччы горæты хайад райсдзысты Æппæтадæмон фестиваль «Южная сцена»-йы. Уый фæстæ 23 ноябры та – Дзæуджыхъæуы Хуыгаты Георы номыл Æппæтадæмон националон театрты 8-æм фестиваль «Сцена без границ»-ы.

– Сценæмæкæсджытæ æмæ жюрийы уæнгты размæ цахæм спектаклтæ рахæсдзыстут?

– Мах ацы театралон фестивалтæм бацæттæ кодтам æртæ спектаклы. «Фандо и лис» равдисдзыстæм Санкт-Петербурджы. Ацы спектаклыл бакуыста æв-зонг режиссер Ян Яновский. Спектакль «Лес»-та равдисдзыстæм Налцыччы горæты. Ацы спектаклыл та бакуыста Мæскуыйæ æрхонгæ, æвзонг режиссер Андрей Цисарук. Цæгат Ирыстоны столицæ – Дзæуджыхъæуы та ирон æвзагыл равдисдзыстæм зынгæ ирон фыссæг Гаглойты Владимиры фыст пьесæ «Тугæйдзаг чындзæхсæв». Спектакль бацæттæ кодта Цæгат Ирыстоны сгуыхт артист  Тъехты Васили.

– Гастролтæм цал артисты ацæудзæнис? Исты зындзинæдтыл амбæлдыстут?

– Ницы зынддзинæдтыл амбæлдыстæм. Культурæйы министрад нын уадид аскъуыддзаг кодта нæ ацыды фарст. Ахæм гастролты тыххæй нæ артисттæ дæр бацин кодтой. Æдæппæт гастролты хайад райс-дзæнис 25 артисты бæрц. Уыдонæй цалдæр, алы спектаклы дæр райсдзысты хайад. Иннæтæй та алчидæр хицæн спектаклты æххæст кæндзæнис æрмæстдæр йæхи роль. Уый махæн у æнтыст.

– Куы æрыздæхат, уæд цахæм спектаклтæй барухс кæндзыстут цхинвайлаг сценамæкæсджыты зæрдæтæ та?

– Иурæстæджы цæттæ кæнæм цыппар спектаклы. Ныртæккæ цæттæ кæнæм италиаг автор Альдо де Бенедеттийы фыст пьесæ «От четверга до четверга». Цæттæ ма кæнæм Жана Ануяйы пьесæ «Антигона». Афтæ ма цæттæ кæнæм Гуыцмæзты Михалы пьесæ «Бирæгътæ». Ног азы улæфтыты рæстæджы не ‘взонг сценæмæкæсджытæн та равдисдзыстæм «Волшебное зеркало».

Æрмæг мыхуырмæ бацæттæ

кодта ГÆЗЗАТЫ Иван