3-æм майы Республикæ Хуссар Ирыстоны сгуыхт журналист Зæгъойты Радмилæйы чиныг «90 лет служения национальному искусству»-йæн РХИ-йы Информаци æмæ мыхуыры паддзахадон комитеты пресс-центры уыд презентаци. Чиныг уагъд æрцыдис нæ паддзахадон театрыл 90 азы сæххæсты боны цытæн, кæцыйæн финансон æххуыс бакодта Республикæ Хуссар Ирыстоны Президент Бибылты Анатоли æмæ у юбилейон лæвар куыд театрæн, афтæ не ‘мбæстæгтæн дæр.

Автор йæ чиныджы адæмы рæгъмæ хæссы театры фæзынд æмæ йæ райрæзты фæндæгтæ. Куыд æмæ кæй фæрцы бахаста театр ногдзинад Ирыстоны культурон цардмæ, цавæр сфæлдыстадон фæндæгтыл цыдис æмæ цæуы, театры хъæздыг репертуар кæй фæрцы нæрыдис, чи йæ размæ кодта æмæ сценæйыл цæстæвæрæнæн чи баззадысты, уыцы профессионалон артисттыл дæр хицæнæй загъдгонд цæуы чиныджы райдианы. Чиныгмæ хаст æрцыдысты 90-æм уæззау азты театры цудын чи нæ бауагътой æмæ абон сценæмæкæсæгæн чи лæггад кæнынц, уыцы артистты æмæ театры кусджыты цард æмæ сфæлдыстады тыххæй. Чиныг у егъау æмæ хуызджын, бирæ фотоæрмæгимæ, кæцыйы, куыд фæзæгъынц, дæ къухмæ куы райсай, уæд æй æнæбафæрсгæ нæ фæуыдзынæ.

Чиныджы презентацимæ æрбацыдысты нæ бæстæйы сæргълæууæг Бибылты Анатоли, республикæйы фыццаг президент, Цыбырты Людвиг, профессор Плиты Гацыр, Хетæгкаты Къостайы номыл Хуссар Ирыстоны паддзахадон драмон театры аивадон къухдариуæггæнæг Дзудцаты Тамерлан, Тæбæхсæуты Балойы номыл Цæгат Ирыстоны паддзахадон академион театры аивадон къухдариуæггæнæг Уалыты Гиви, афтæ ма бынæттон журналисттæ, сфæлдыстадон æмæ зонадон интеллигенцийы минæвæрттæ.

Презентаци бацæуæн ныхасæй байгом кодта РХИ-йы Информаци æмæ мыхуыры паддзахадон комитеты сæрдар Хъотайты Мария. Уый æрæмбырдуæвджытæн арфæ ракодта ног чиныджы рацыды сæраппонд æмæ банысан кодта уымæн йæ ахадындзинад. Уый фæстæ ныхасы бар радта Дзудцаты Тамерланæн. Театры аивадон къухдариуæггæнæг куыд банысан кодта, афтæмæй стыр цины æнкъарæнтимæ сæмбæлдис юбилейон лæвар – ног чиныгыл. «Мæнæн тынг æхсызгон у абон ахæм диссаджы чиныджы презентацийы хайад кæй исæм, уый. Чиныг у лæвар нæ юбилеймæ æмæ-иу республикæйæн æдтейæ гастролон бал-цыты, фестивальты хайад куы исæм, уæд-иу сын æнæмæнг балæвар кæндзыстæм ацы чи-ныг. Уый та уымæн зæгъын, æмæ-иу нæ арæх гастролты кæй æрдомдтой нæ театры историйыл дзурæг чиныг кæнæ брошюрæ, фæлæ-иу нæ къухы ахæмæй ницы уыд. Ныр та сæрыстырæй æндæр театртæн лæвар кæндзыстæм нæ чиныг», – зæгъы Дзудцаты Тамерлан.

Театр кæддæриддæр адæймаджы удварн чи хъæздыгдæр æмæ рæсугъддæр кæны, ахæм фæрæз кæй у, уый йæ раныхасы банысан кодта РХИ-йы Президент Бибылты Анатоли. «Абон æз бузныджы ныхæстæ зæгъын театры æппæт кусджытæн дæр. Куыд фæзæгъынц, театр культурæ æмæ царды айдæн у æмæ æнæ культурæйæ та иу наци æмæ адæмыхаттæн дæр цæрæн æмæ уæвæн нæй. Уымæ гæсгæ махæн нæ театр егъау бынат ахсы æхсæнадон æмæ культурон царды.

Абон артисттæ национ, уырыссаг æмæ фæсарæйнаг классикты хъайтарты кæй хъазынц æмæ уыцы рæсугъд истори кæй дарддæр кæнынц, уый дзурæг у, культурæ размæ кæй цæуы æмæ ноджыдæр хъусдард здæхт цæудзæнис нæ театрмæ. Махæн нæ театр алыгъуызон фæндæгтыл рацыд, бавзæрста зындзинæдтæ дæр. Егъау маст нын æрхаста, арт ыл куы сивæрзт æмæ куы басыгъд, уæд. Фæлæ ныр та нæ разы ис, нырыккон домæнтæн дзуапп чи дæтты, ахæм театры егъау бæстыхай. Стыр бузныг зæгъын труппæйæн, зындзинæдтæн кæй сфæрæзтой æмæ дарддæр кæй кæнынц сæ куыст. Мæнæн тынг æхсызгон у, арæх кæй ацæуынц гастролон балцыты Уæрæсейы Федерацийы æндæр æмæ æндæр регионтæм, цыран артистты арæхстдзинадæн скæнынц аккаг аргъ. Чиныджы тыххæй мæ фæнды зæгъын уый, æмæ кæй у рæсугъд æмæ хуызджын, йæ гъæд дæр у æмбæлон. Автор адæмы рæгъмæ хæссы хъæздыг æрмæг театры историйы тыххæй. Бузныг мæ фæнды зæгъын Зæгъойты Радмилæйæн йæ иузæрдион æмæ егъау куысты тыххæй, цæмæй рухс федтаид ацы чиныг, афтæ ма артисттæн, кæцытæ æппæт дæр аразынц, цæмæйдæриддæр дарддæр кæной нæ национ театры традицитæ. Стыр бузныджы ныхæстæ ма мæ фæнды зæгъын æппæт уыдонæн, кæцыты руаджы абон мах нæ къухтæм райстам ахæм чиныг. Тынг æхсызгон мын у, ацы хъуыддагмæ мæ хайбавæрд кæй бахастон, уый тыххæй сæрыстыр уыдзынæн цæрæнбонтæм», – банысан кодта Бибылты Анатоли.

Презентацийы ма чиныджы тыххæй йæ хъуыдытæ загъта Цыбырты Людвиг дæр æмæ банысан кодта, театрæн цы стыр нысаниуæг ис æхсæнады царды, уый. «Чиныг мæнæн дæр тынг фæцыдис мæ зæрдæмæ, ис дзы хъæздыг æрмæг, йæ бирæ нывтæ дæр дзурæг сты театры мидисджын репертуар æмæ историйыл. Уый тыххæй арфæ æмæ бузныджы ныхæстæ зæгъын Зæгъойты чызгæн.

Хетæгкаты Къостайы номыл Хуссар Ирыстоны Паддзахадон драмон театр байгом ис 1931 азы æмæ уæдæй абонмæ, 90 азы дæргъы, иузæрдион лæггад кæны сценæмæкæсджытæн. Уæд фæсивæд райдыдтой стыр цымыдис здахын театры цардмæ, æнæрхъæцæй-иу æнхъæлмæ кастысты ног спектаклтæм. Кæй зæгъын æй хъæуы, алыгъуызон уыдысты нæ театры фæндæгтæ æмæ мæ абон сæрмагондæй стыр бузныджы ныхæстæ зæгъын фæнды театры коллективæн. Уымæн æмæ уыдон, 90-æм азты цы уæззау дугæн бафæрæзтой, уый мачи зæгъæд. Сæрыстырæй зæгъдзынæн уый, æмæ артисттæ сæхи кæй равдыстой хъæбатырæй, æцæг патриоттæй. Уыдис ахæм рæстæг, æмæ-иу цалдæргай мæйты нæ райстой сæ мыздтæ, фæлæ коллектив нæ ныппырх, æгæрыстæмæй ма-иу хайад райстой фестивалты. Сæрмагондæй мæ бузныг фæнды зæгъын Дзудцаты Тамерланæн. Уый куы нæ уыдаид, уæд коллектив дæр нæ баззадаид», – загъта Цыбырты Людвиг.

Плиты Гацыр дæр презентацийы стыр аргъ скодта Зæгъойты Радмилæйы чиныгæн æмæ банысан кодта, зæгъгæ, театры тыххæй цы чингуытæ рацыд, уыдонимæ Радмилæйы чиныг кæй у цыппæрæм, уый, æртыккаг та у йæхи. «Абон мах цин кæнæм, нæ театры истори парахатæй кæм разынд, нæ уыцы ног хæзнайыл. Уый стыр хæрзиуæгон хъуыддаг у æмæ æппæтæн дæр арфæ кæнын, чиныг рухс кæй федта, уый сæраппонд. Цы бирæ къамтæ дзы уынæм, уыдон дзурæг сты нæ театры историйыл. Мах нæ ивгъуыд куы нæ зонæм, уæд нæ абон дæр нæ зондзыстæм. Ацы чиныджы рацыдыл чи цин кæны, уыдонæй сæ иу дæн мæхæдæг. Чиныг у диссаджы чиныг. Йæ хуыз дæр æмæ дзы цы бакæсинаг æрмæг ис, уый дæр у цымыдисон. Чиныджы ис театры цард, театр йæ рæзты къахыл куы слæууыд, уæдæй абоны онг цы къахдзæфтæ æмæ фæндæгтыл рацыд, уыцы ис-тори. Радмилæ бирæ кусы театры ацы хъуыддагыл æмæ йын мæ зæрдæ ноджыдæр зæгъы стыр æнтыстытæ йе сфæлдыстадон куысты. Ацы чиныг цæрæнбонтæм цæрдзæнис æмæ уый тыххæй бузныг зæгъын Бибылты Анатолийæн, чиныг рауадзыны хъуыддаджы финансон æххуыс кæй бакодта æмæ абон не ‘ппæты дæр кæй æрбамбырд кодта. Мæнмæ гæсгæ нæ дзыллæйад чиныгыл сæмбæлдзысты зæрдæбынæй æмæ иннæ чингуыты æмрæнхъ тæрхджытыл ссардзæнис йæхи бынат», – банысан кодта Плиты Гацыр.

Ног чиныджы редактор, газет «Республика»-йы сæйраг редактор Хъоцыты Андрей дæр бузныджы ныхæстæ загъта Бибылты Анатолийæн, йе ‘ххуысы къух сæм кæй фæдаргъ кодта æмæ сын финансон æххуыс кæй бакодта чиныг рауадзынæн, уый тыххæй. Андрей ма арфæ ракодта йе ‘мкусæг Зæгъойты Радмилæйæн, бирæ йын кæй бантыст саразын, цæмæй ахæм хъæуæг чиныг бацæттæ кодтаид. «Бузныджы ныхæстæ ма мæ фæнды зæгъын нæ театры аивадон къухдариуæггæнæг Дзудцаты Тамерланæн, арæх-иу æй кæй бахъыгдардтам нæ куысты рæстæджы, уый сæраппонд. Чиныджы цы къамтæ ис, уыдонæн сæ фылдæр сты нæ газеты архивæй, уымæн æмæ-иу театры нæ уыдысты», – зæгъы Хъоцыты Андрей.

Презентацийы кæрон арфæйы ныхæстимæ æрæмбырдуæвджытæн зæрдылдарынæн пресс-центры фысымтæ балæвар кодтой ног чиныгæй, кæцыйæн  йæ тираж  та у  500 экземпляры.

ЦХУЫРБАТЫ Ларисæ

 

Comments are closed, but trackbacks and pingbacks are open.