Æрæджы мыхуыры рацыд Хуссар Ирыстоны Ветеранты советы фидиуæг «Ветеран». Газет йæ фыццаг фарсыл фыссы, Хуссар Ирыстоны ветеранон змæлд организацион æгъдауæй кæй райдыдта 1975 азы. Дарддæр дзы хъусын чындæуы, партийы Цхинвалы горкомы кæй равзæрстой оргкомитет Стыр Фыдыбæстæйон хæсты Ветеранты совет саразыны тыххæй æмæ дзы сты, йе скондмæ чи бацыд, уыдоны номхыгъд, стæй ма Ветеранты советы фыццаг сæрдар Дзабиты Савели æмæ йæ хæдивæг Джиоты Соломоны къамтæ. Абоны бон Республикæ Хуссар Ирыстоны Ветеранты советы сæрдар у Бесаты Вячеслав æмæ йæ уац «Хуссар Ирыстоны хæст, куыст, Гарзджын тыхтæ æмæ барад-хъахъхъæнæг органты республикон ветеранты æхсæнадон организаци», зæгъгæ, уым лæмбынæг æрдзырдта организацийы архайды фæдыл. Хуссар Ирыстоны Ветеранты советы сæрдары хæдивæг Уалыты Гайоз та йæ уац «Подвиг народа бессмертен»-ы фыссы, Хуссар Ирыс-тоны фæллойгæнджытæ Стыр Фыдыбæстæйон хæсты уæлахизмæ цы стыр хайбавæрд бахастой, уый фæдыл. Сты дзы фронты хайадисæг ветерантæй иу къорды къамтæ дæр. Уалыты Гайоз ма йæ уац «Николай Габараев – гражданин и ветеран!»-ы дзуры Стыр Фыдыбæстæйон хæсты хайадисæг æмæ ахуыргонд Гæбæраты Никъалайы хæстон сгуыхтдзинæдты тыххæй. Хуссар Ирыстонæй фыдгулы ныхмæ бирæ сагсур фæсивæд фæцыд тохы быдырмæ æмæ æхсарджынæй хæцыдысты йæ ныхмæ, уыдонæй дзæвгар лæппутæ сæ сæртæ нывондæн æрхастой Райгуырæн бæстæйы сæрвæлтау. Хуыгаты Миленæ йæ уац «Хуыгаты Падойы фырттæн сæ ном сæфт ма уæд!»-ы дзуры, Цъоны хъæуæй Хуыгаты цæхæрцæст лæппутæй тохы быдырмæ чи афæндараст æмæ æгас хæдзар чи нал ссардта, уыдоны тыххæй.
«Ветеран»-ы ма мыхуыр æрцыдысты хæстон темæйы фæдыл Козаты Павел, Уалыты Гайоз, Гатыгкоты Эдуард æмæ Чехойты Оляйы æмдзæвгæтæ «Уæ разы зоныгуыл кæнын», «Сом, мыййаг, куы райдайа хæст», «Уæлахиз» æмæ «Нæ номдзыд ветерантæн!». Ам ма фенæн сты горæт Цхинвалы ветеранты иу къорды къамтæ Хицауады Сæрдары хæдивæг Пухаты Эрикимæ. Газеты мыхуыр æрцыд Хуссар Ирыстоны ветеранты æхсæнадон организацийы Устав дæр.
ХУЫБИАТЫ Н.
Comments are closed, but trackbacks and pingbacks are open.