Ацы бонты РХИ-йы Экономикон рæзты министр Кокойты Геннади хыгъд радта Хицауады раз 2017 азы йæ дæлбаруæвæг ведомствойы бакæнгæ куысты тыххæй.

Министр йæ раныхасы райдианы сбæлвырд кодта, министрад экономикæ æмæ социалон рæзты фæдыл цы ахсджиагдæр хæстæ скъуыддзаг кæныныл куыста, уыдоны. Сæйрагдæртыл банымадта закъондæттынад хуыздæр кæнын, экономикæйы рæзт ифтонг кæнын, Инвестицион архайд хуыздæр кæнын, эффективон инвестицион политикæ бакусын, чысыл æмæ ас-тæуккаг амалиуæгадæн æххуыс кæнын, æргътæ æвæрыны къабазы паддзахадон политикæ æххæст кæнын æмæ цæрджыты царды æмвæзад бæрзонддæр кæнын.

Дарддæр æрдзырдта министрады управлениты архайды тыххæй.

Социалон-экономикон планкæнынад æмæ прогноз кæныны управленийы куысты фæдыл дзургæйæ, министр банысан кодта, уый йæ хæстæ кæй æххæст кодта йæ компетенцийы фæлгæтты, кæй куыста республикæйы национ экономикæйы фидар рæзт ифтонг кæнынмæ здæхт паддзахадон политикæ реализаци кæныныл.

Управлени фæстиуджытæ сарæзта 2017 азы республикæйы социалон-экономикон рæзтæн. Бакуыста 2018 азæн социалон-экономикон рæзты развæлгъау прогнозты проект, афтæ ма цыбырæмгъуыдон, астæуккаг æмгъуыдон æмæ дардæмгъуыдон рæстæджытæн республикæйы социалон-экономикон рæзты проекттæ бакусыны фæткы.

Бæрæг куыст цыд паддзахадон унитарон куыстуæтты хыгъдтæ бацæттæ кæныны фæдыл, афтæ ма 2008 азы сæ финансон-хæдзарады плантæ бацæттæ кæныны фæдыл. Уыдон фидар æрцыдысты паддзахадон унитарон куыстуæтты финансон-хæдзарадон архайдыл контролы фæдыл æхсæнведомствæйон къамисы рабадты.

Управлени бакуыста æмæ РХИ-йы Парламент сфидар кодта 2008 азы социалон-экономикон рæзты прогноз æмæ план.

Хыгъдон рæстæджы æркаст æмæ æмбæлон хатдзæгтæ сарæзта ахæм проекттæн, куыд «2018-2020 азтæн РХИ-йы Баст-дзинад æмæ дзыллон коммуникациты рæзты» паддзахадон къабазон программæ, «2017-2019 азтæн РХИ-йы рæзгæ фæлтæры удварнон-хæрзæгъдауон хъомылады» паддзахадон комплексон нысанмæздæхт программæ æмæ «2018 азæн РХИ-йы чысыл æмæ астæуккаг амалиуæгадæн æххуысы æмæ рæзты» паддзахадон нысанмæздæхт программæ.

Иууон паддзахадон инвестицион политикæ, афтæ ма æддагполитикон бастдзинæдты къабазы политикæ æххæст кæнынмæ здæхт уыди æддагэкономикон бастдзинæдтæ æмæ инвестицион архайды управленийы куыст.

Управлени кусы республикæйæн социалон-экономикон æххуыс бакæныны тыххæй Уæ-рæсейы Федерацийы Хицауад æмæ Республикæ Хуссар Ирыстоны Хицауады æхсæн сразыдзинад æмæ товартæй базар кæныны режимы тыххæй Уæрæсейы Федерацийы Хицауад æмæ Республикæ Хуссар Ирыстоны ‘хсæн сразыдзинад реализаци кæныныл.

Управленийы минæвæрттæ хайад райстой Абхазаг-уæрæсейаг æстæм хъуыддагон форумы, кæцыйæн йæ нысан уыдис æддагэкономикон бастдзинæд-тæ фидардæр кæнын æмæ фæсарæйнаг паддзахады æддаг-экономикон архайды информацийæн анализ аразын.

Цæмæй республикæйы инвестицион архайд фæхуыздæр уа, уый тыххæй управлени хыгъдон рæстæджы бацæттæ  кодта «Инвестицион архайды тыххæй» РХИ-йы Закъоны проекты ног редакци. Афтæ ма бацæттæ æрцыдысты дæлзакъонон акттæ дæр.

Инвестицион архайды къабазы куыст цыдис инвестицион проекты инициатортæн информацион-методикон æмæ организацион æххуыс бакæныны фæдыл.

Республикæйы инвестицион потенциал сбæрæг кæныны тыххæй куыст цыдис куыд Цхинвалы, афтæ районты дæр æмæ бæлвырд æрцыдысты, инвестицион проекттæ æххæст кæм цæудзысты, уыцы бынæттæ. Афтæ ма куыст цыдис 2015-2017 азтæн Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты инвестортæн паддзахадон æххуыс бакæныны фæдыл.

Цæгат Кавказы хъуыддæгты фæдыл Уæрæсейы Федерацийы министрадимæ бакуыст æрцыд 2015-2017 азтæн Инвестпрограммæйы фæлгæтты паддзахадон æххуыс бакæныны тыххæй æвзæрст чи æрцыдысты, уыцы инвестицион проектты номхыгъд, кæцытæ сты 39 912, 31 мин сомы аргъ.

Министр дарддæр æрдзырдта хыгъдон рæстæджы чысыл æмæ астæуккаг амалиуæгадæн æххуысы управленийы архайды фæдыл дæр. Банысан кодта, зæгъгæ, уый йæ куыст кодта чысыл æмæ астæуккаг амалиуæгады иууон паддзахадон политикæ бакусын æмæ реализаци кæныны фæдыл. Анализ арæзта амалиуæгады уавæрæн, æххуыс кодта чысыл æмæ астæуккаг амалиуæгады субъекттæн бизнес-плантæ æмæ кредиттæ райсыны тыххæй документтæ аразыны. Хыгъдон рæстæджы управленимæ балæвæрдæуыд 43 куырдиаты бизнес организаци кæнын æмæ рауæрæх кæныны фæдыл. Консультативон куыст кодта амалиуæггæнджытимæ. Оперативонæй æвзæрстой чысыл æмæ астæуккаг амалиуæгады субъектты куырдиæттæ, цæмæй сæ бартæ æмæ закъонон интерестæ хъахъхъæд цыдаиккой республикæйы амалиуæгадон архайд æххæст кæнгæйæ. Управлени бакуыста 2018 азæн чысыл æмæ астæуккаг амалиуæгадæн æх-хуысы программæ.

Йæ разы цы хæстæ æвæрд уыд, уыдон йæ компетенцийы фæлгæтты æххæст кодта хыгъдон рæстæджы. Æргътæ æвæрын æмæ фæлхасадон базар бæстон кæныны управлени дæр. Йæ кусджытæ дырыс банымадтыты бындурыл бæрæг кодтой электроэнергийы, доны, газы, бастдзинады, дзулы, бæлццæттæ ласыны, типографон хæрдзты æмæ бирæ æндæр ахæмты æргътæ.

Управленийы кусджытæ æрвылквартал дæр бæлвырд кодтой цæрынæн иууыл къаддæр бæрц фæрæзтæ, мониторинг уагътой хæлцадон продуктты оптом æмæ розницæйон æргътыл. Æрвылмæй дæр управлени æркæсы хæлцадон продукттæ Цхинвалы скъола-интернатæн, РХИ-йы Хъахъхъæнынады министрадæн, Цхинвалы администрацийы ахуырады управленийæн, Аивæдты паддзахадон лицейæн æмæ РХИ-йы Æнæниз-дзинад хъахъхъæныны æмæ социалон рæзты министрадæн балхæныны тыххæй фыстæджытæм.

Кæронбæттæны Хицауады Сæрдар загъта йæ критикон фиппаинæгтæ хыгъды фæдыл.

Бестауты Валя

Comments are closed, but trackbacks and pingbacks are open.