Азæй азмæ нæ республикæйы инвестицион климат хуыздæр кæй кæны, уый фадат дæтты фылдæр инвестортæ æрбахонынæн. Уыдоны архайды руаджы ныридæгæн æххæст æрцыдысты къорд проекты, æндæртæ та сты сæ реализаци кæныны стадийы.

Ныртæккæ æнтысгæйæ чи архайы, уыцы проекттæй сæ иу у суары завод «Ирыстоны суадæттæ».

Уый байгом дыууæ азы размæ нæ горæты, БАМ-ы районы, «Энергоресурс»-ы куыстуаты агъуысты кæрты. Байгом æй кодта компани «Владимирский стандарт» æмæ дзы «Осетинская» маркæйы бын уагъд цæуы минералон дон. Завод бакæныны рæстæджы «Владимирский стандарт»-ы вице-президент, амалиуæггæнæг Павел Антонов дзырдта, зæгъгæ, проект реализаци кæнгæйæ, ницы ныхдуртæ уыд сæ разы. Бæстыхай цæттæ кæй уыд, уый бирæбæрцæй фæтагъд кодта проект бакæныны хъуыддаг.

Заводы кусы æрмæстдæр иу хахх æмæ кусджыты нымæц та у 20 адæймаджы бæрц. Завод дон исы Згъубиры донгуырæнæй, бафтауынц æм газ æмæ уый фæстæ конд цæуы авгын æмæ пластикон мигæнæнты. Дон «Осетинская»-йæн фенæн ис нæ горæты магазинты дæр. Аив, æрдæглитруат мигæнæнтæ, фæлхасгæнæджы цæстæнгас здахынц сæхимæ.  Заводы къухдариуæгад куыд зæгъы, афтæмæй сæ зæрды ис куыстуат рауæрæх кæнын, уый тыххæй, дам, махæн ис хорз фадæттæ. Завод цы территорийыл ис, уый дзуапп дæтты æмбæлон куыст кæнынæн. Æвæрд ма æрцæудзæн дыккаг хахх дæр æмæ кусджытæ дæр фæфылдæр уыдзысты. Дон ист цы 9-æм донгуырæнæй истæуы, уырдыгæй  уыйбæрц дон цæуы, æмæ æппындæр нæ бандавдзæнис «Бæгъиат»-ы заводы куыстыл дæр.

«Владимирский стандарт»-ы компанийы къухдариуæггæнджытæ куыд зæгъынц, афтæмæй Хуссар Ирыстоны территорийыл цы дон уадзынц, уый реализаци цæуы Владимирский областы. Ныртæккæ бадзырдтæ арæзт цæуы æндæр горæттимæ дæр, цæмæй ацы минералон дон ласт цæуа, уыдон базарадмæ дæр. Ныридæгæн, дам, «Осетинская» популярон у Владимиры областы. Амалиуæггæнæг куыд загъта, афтæмæй йæ коллегæтæ-инвестортæ бирæ рæстæджы дызæрдыг кодтой, заводы сырæзт Хуссар Ирыстоны æфтиаг хæсдзæн æви нæ, ууыл.

Фæлæ, дам, Хуссар Ирыстоны территорийыл цы инвестицион климат арæзт æрцыд, уый фадат дæтты бизнес райтынг кæнынæн æмæ уымæй та бузныг сты нæ республикæйы къухдариуæгадæй. Куысты процесс тагъд цыд, уый æрхаста фæстиуæг. Иууыл цыбырдæр рæстæгмæ реализаци æрцыд ацы проект.

Бизнесæн йæхи фæткойтæ ис, фæстиуæг уадид нæ радты. Фæлæ дызæрдыг кæнын нæ хъæуы, нæ дон йæ хорз æууæлтæй, æфтиагхæссæг кæй суыдзæн ацы компанийæн.

Хуыцау зæгъæт, цæмæй ацы проекты фæстæ Ирыстонмæ ныккæлой инновацион технологиты æхсæнады минæвæрттæ, цæмæй Хуссар Ирыстон суа æууæнкджын партнер.

Уазæгты Марфа

Comments are closed, but trackbacks and pingbacks are open.