Ацы фæстаг бонты республикæйы разамындмæ цæуы бирæ хъæстытæ цæрджытæй. Адæм разы не сты Тагъд æххуысы куыстæй. Рынчыны медицинон æххуыс райсынмæ æнхъæлмæ кæсын бахъæуы сахаттæ нæ, фæлæ … бонтæ.
Кæй зæгъын æй хъæуы, медицинон кусджытæ дæр бынтон аххосджын не сты сæвзæргæ уавæры. Коронавирусæй кæуыл фæдызæрдыг вæййынц, уыцы адæймаджы уавæр фæхъæуы бæстондæр раиртасын, компьютерон томографи йын скæнын. Уымæ гæсгæ радгæс дохтырты архайд домы фылдæр бæрндзинад, адæймаджы рынчындоны сæвæрыны хъуыддаг дæр уайтагъд къухы нæ бафты. Арæх медицинон кусджытæ сæхæдæг дæр вирусæй фæрынчын вæййынц æмæ сæ бахъæуы раивын. Тагъд æххуысы куыст ма тынг къуылымпы кæны уый дæр æмæ сæ адæм æнæхъуаджы дæр тынг кæй тыхсын кæнынц. Адæм афтæ тарст сты æмæ сæ исчи куы схуыфы кæнæ куы æрæхснырсы, уæддæр дохтыртæм ныффæдис кæны. Æмæ æцæг рынчынтæ та медицинон æххуыс рæстæгыл нæ райсынц.
Адæмы хъæстыты фæдыл республикæйы Сæргълæууæг Битарты Вячеслав бабæрæг кодта «Тагъд æххуыс»-ы станцæ. Куыд сбæрæг кодта, афтæмæй 32 машинæйæ æрмæстдæр куыстой æмæ рынчынтæн лæггад кодтой 12 машинæйы, иннæтæ уыдысты цалцæг кæнинаг.
Уый фæдыл ведомствоты разамонджытæн оперативон æмбырд ауагъта республикæйы Сæргълæууæг æмæ сæ карзæй æрдомдта куыст æмбæлгæ уагыл саразын. Куыд банысан кодта, афтæмæй нырæй фæстæмæ, Тагъд æххуысы машинæтæй уæлдай, цыдæриддæр поликлиникæты, амбулаториты, фелсырон-акушерон пунктты транспорт æмæ дохтыртæ ис, уыдон, цалынмæ низ фæсабыр уа, уæдмæ хъуамæ сæхи куысты уæлдай æххæст кæной тагъд æххуысы куысты домæнтæ дæр. Уыимæ, цыбыр рæстæгмæ хъуамæ цалцæг æрцæуой хæлд машинæтæ.
«Кæд æмбæлон ведомствоты бон нæу сæ размæ æвæрд хæстæ æххæст кæнын, уæд мæхæдæг сбаддзынæн рулыл дохтыримæ æмæ рæстæгыл бакæндзыстæм медицинон æххуыс. Бахъуыды йæ кæнут, адæмы дзæбæх кæнын хъæуы æхсæвæй-бонæй. Рынчын æххуысмæ сахатæй фылдæр ма хъуамæ æнхъæлмæ кæса. Ацы тыхст заман Тагъд æххуысы машинæтæ, чысыл сæм базилыны тыххæй, æнæхъуаджы цæмæн лæзæрынц гаражы? Ахæм фæдисы рæстæг чидæриддæр йæ хъуыддагмæ æбæрнон цæстæй кæсы, уый йæ куыстæй ацæуæд», – загъта Битарты Вячеслав.
Куыд рабæрæг, афтæмæй уал Дзæуджыхъæуы администрацийы сæргълæууæг Фæрниаты Тамерлан уæлæмхасæн фараст рог автомашинæ радта республикæйы поликлиникæтæн. Уыдон дохтырты ласдзысты рынчын-тæм, æххæст кæндзысты Тагъд æххуысы службæйы домæнтæ.
Нæ уацх.
Comments are closed, but trackbacks and pingbacks are open.