Республикæ Хуссар Ирыстоны дзыллон информацийы  фæрæзтæ цæттæ сты уæрæсейаг регионты медиаимæ æмгуыстад кæнынмæ, – фехъусын кодта РХИ-йы Информаци æмæ мыхуыры паддзахадон комитеты сæрдар Хъотайты Мария Цæгат Кавказы дзыллон информацийы фæрæзты фæндзæм форумы пленарон рабадты.

«Ахæм фæзуæтты хайадист регионалон дзыллон информацийы фæрæзтæн фадат дæтты кæрæдзийы фæлтæрддзинад амонынæн, æндæр республикæты журналистты фæлтæрддзинад ахуыр кæнынæн», – загъта Хъотайты Мария.

Уый банысан кодта, зæгъгæ, регионалон дзыллон информацийы фæрæзтæн сæ бон у сæ республикæтæн позитивон имидж саразыныл бандавынæн.

«Кæддæр конфликттæ кæм цыдысты, уыцы регионæн ног фæлгондз саразынæн, сæрмагондæй, ахъаз кæндзæн культурæ æмæ спорты фадыджы æнтыстытæ æвдисын», – йæ ныхасмæ бафтыдта РХИ-йы Информаци æмæ мыхуыры паддзахадон комитеты сæргълæууæг.

Дæнцæджы хуызы уый æрхаста, æрæджы Санкт-Петербурджы турнир «Северная Венеция»-йы хуссарирыстойнаг гимнасткæтæ кæй фæуæлахиз сты, уый.

Хъотайты Мария лæууы хуссар-ирыстойнаг делегацийы сæргъ Цæгат Кавказы дзыллон информацийы фæрæзты 5-æм юбилейон форум «Россия-2018. Кавказский ракурс»-ы. Форум уагъд цæуы Мæхъæлы Республикæйы. Делегацийы сконды сты информацион агентад «Рес»-ы директор Уазæгты Юри æмæ РХИ-йы Президенты Администрацийы мидæггагон политикæйы фæдыл управленийы хистæры хæдивæг Джусойты Алан.  Мадзалы хайад исынц медиафадгуыты æмæ экспертон æмæхсæнады 700 минæварæй фылдæр.

Comments are closed, but trackbacks and pingbacks are open.