30-æм августы Мыхуыр æмæ информацийы комитеты «Æргом хицауад»-ы проекты фæлгæтты ауагъдæуыд пресс-конференци республикæйы сæйраг санитарон дохтыр Коцты Маринæимæ.

Пресс-конференцийы райдианы Коцты Маринæ æрдзырдта, азы фыццаг æмбис йæ дæлбар комитетæн цы куыстытæ бакæнын бантыст, ууыл.

Уыдонæй та сæйрагдæр у, ныртæккæ нæ адæмы иууыл тынгдæр цы фарст тыхсын кæны, ома, доны хæтæлты цы дон цæуы, уый гъæды тыххæй. Комитеты сæргълæууæджы ныхæстæм гæсгæ ныртæккæ паддзахадон унитарон куыстуат «Водоканал»-ы цы гидролизон ифтонгад æвæрд æрцыд, уый фæрцы бæрæг фæхуыздæр доны гъæд. «Фаронимæ абаргæйæ ацы аз 50 % фæкъаддæр сты тъæнгты низтæ æмæ уый комкоммæдæр баст у доны гъæдимæ. Мах дыууæ къуырийы иу бон аразæм донæн мониторинг æмæ нæ зæрдæ рухс кæны хорз фæстиуджытæй», – зæгъы Коцты Маринæ.

Пресс-конференцийы рæстæджы уый æрдзырдта, сæ комитеты материалон-техникон базæ бæрæг кæй фæуæрæх – дæр кодтой, ууыл. Уый та, зæгъ нын уавæртæ дæтты бирæ алыгъуызон лабораторон иртасæнтæ аразынæн. Фæстаг рæстæджы комитет аразы бактериалон иртæст доны гъæдæн. Вирусон анализ-иу æрвыст цыд Цæгат Ирыстон-Аланийы лабораторимæ. Ис ма нæм иммуноферментон анализ аразæн кусæнгæрзтæ æмæ формальдегиды лаборатори.

Коцты Маринæ ма куыд загъта, афтæмæй тагъд самал кæндзысты газохроматограф, кæцы бæрæг кæндзæнис хæлцадон продуктты алкологон иуæгтæ цæй бæрц ис, уый. Комитеты дæлбар ма ис ПЦР лаборатори дæр, кæцы аразы молекулярон диагностикæ, уый фæрцы бæрæг цæуынц вирустæ микроорганизмты. Лабораторон дзуапп та лæвæрд æрцæуы суткæйы æмгъуыдмæ.

Коцты Маринæ ма куыд банысан кодта, афтæмæй Хуссар Ирыстоны цæрæг æмбæстæгты фæлхасадон культурæ бонæй-бонмæ хизы уæлдæр æмвæзадмæ. «Боныфæстагмæ, нæ адæм дæр чысылгай райдыдтой цæуын «Югосетпотребнадзормæ» сæ бартæ бахъахъхъæныны тыххæй. Ахæм дæнцæгтæ æрхæссын мæ бон у цалдæр», – зæгъы республикæйы сæйраг санитарон дохтыр.

Уый куыд банысан кодта, афтæмæй фæлхасгæнджыты куырдиæттæ æмæ хъæстытæн ис ахадгæ бындур, цæрджытæн социалон лæггæдтæ кæм кæнынц, уыцы объектты басгарынæн.

«Мах комитетæн æрмæстдæр афæдз иу хатт ис базарадон объекттæ, салонтæ, æхсæнадон хæрæн бынæттæ басгарыны бар. Ис ахæм амалиуæггæнджытæ, кæцытæ нæ басгæрсты фæстæ дарддæр халын райдайынц фæлхасгæнджыты бартæ  иннæ басгæрсты онг.

Уымæ гæсгæ тынг ахсджиаг у, цæмæй фæлхасгæнæг зона æппæт йæ бартæ æмæ йын хъахъхъæд куынæ цæуой, уæд махмæ бахата», – загъта Коцты Маринæ.

Уый ма куыд банысан кодта, афтæмæй фæстаг рæстæджы фæлхасгæн-джытæн фæзынд ахæм бар дæр, цæмæй иу кæнæ иннæ дуканимæ бацæуыны рæстæджы сæрибарæй æрдомой про-дуктты æргътæ, хъæстыты чиныг, санитарон чиныг æмæ а.д. Фыццаг рады уыдæттæ хауынц цæттæ хæринæгтæ цы къæбицты ис, уыдонмæ. Уымæн æмæ медицинон чиныг цы адæймагмæ нæй, уый алыхатт дæр хæссы тæссагдзинад, инфекцион низтæ апарахат кæнынæй. Ацы домæнтæ æххæст куы нæ æрцæуой, уæд «Югосет-потребнадзорæн» ис бар æрмæст объект ивар кæнынæн нæ, фæлæ ма йæ бынтондæр сæхгæнынæн. «Мæ бон у иу ахæм цауы тыххæй зæгъын. Уый уыд нæ горæты, бирæнымæц адæм куы фæхъæстæ сты, уæд сын уæлибыхтæ цы къæбицы цæттæ кодтой, уый мах амындмæ гæсгæ æрцыд æхгæд. Æнæмæнгхъæуæг домæнтæ куы сæххæст кодтой йæ кусджытæ, уæд амалиуæггæнæгæн ногæй лæвæрд æрцыд бар, йæ архайд адарддæр кæнынæн», – зæгъта Коцты Маринæ.

Уый зæгъы, зæгъгæ, ахæм цаутæ арæх вæййы, фылдæр та амалиуæггæн-джытæ æрцæуынц ивар. Ивар та баст у фæткхалыны цауимæ. Зæгъæм, йе ‘мгъуыд цы продукцийæн ацыд, уый уæйгонд куы цæуа, уæд уæйгæнæг ивар цæуы 10-20 мин сомы онг. Юридикон гоймаг куы уа, уæд та 20-35 мины онг. Сæйраг санитарон дохтыр ма загъта, иуæй-иу хатт чысыл фæткхæлдтыты рæстæджы «Югосетпотребнадзоры» кусджытæ сæ цæстытæ кæй сæхгæнынц æмæ рекомендацитæ кæй радтынц, кæд æмæ дзы фæлхасгæнæджы æнæниздзинадæн разиан кæныны тас нæ вæййы, уæд.

Республикæйы сæйраг санитарон дохтырмæ лæвæрд æрцыд фарст африкæйаг емынæйы тыххæй дæр.

«Ацы фарст махæй дарддæр хауы Хъæууонхæдзарады министрадмæ дæр. Уыдон уадзынц мадзæлттæ хуыты африкæйаг емынæ ныннымæг кæныны фæдыл. Африкæйаг емынæйы фæзынд нæ республикæйы фыццаг хатт нысан æрцыд августы райдианы, Дзауы районы. Уым низ скуынæг кодта хуыты. Фæстæдæр низ апарахат Цхинвал æмæ Знауыры районты дæр. Ныр уагъд цæуынц æппæт æнæмæнгхъæуæг мадзæлттæ. Хуытæ цы бынæтты ныццагъдысты, уыдон дезинфекцийæн рахицæн æрцыд 470 мин сомы æмæ уыцы куыстытæ æххæст кæны Хъæууонхæдзарады министрад. Мах амындмæ гæсгæ баконд æрцæудзæн карантин æртæ азы æмгъуыдмæ, цæмæй хуытæ ма хизой сæрвæтты æмæ конд уой сæрмагонд бынæтты. Африкæйаг емынæйы профилактикæйы тыххæй хъуамæ ист цæуой карз мадзæлттæ – фермерон хæдзарадтæ кæмæн ис, уыдон фос хъуамæ хизой хицæнæй, æндæр хъæуты фосимæ контакт ма хъуамæ кæной. Фос иу бынатæй иннæ бынатмæ хъуамæ конд цæуа æрмæстдæр районы ветеринарон службæйы разыдзинадæй. Ныр уал та цалдæр хъæумæ бахизæнты æвæрд æрцыд дезбарьертæ. Хуссар Ирыстоны базарадон объектты хуыйы фыд уæй кæныны бар нæй, мах амындмæ гæсгæ», – зæгъы Республикæйы сæйраг санитарон дохтыр.

Уазæгты Марфа

Comments are closed, but trackbacks and pingbacks are open.