14 декабры горæты библиотекæйы ауагъд æрцыдис Никалай Некрасовы райгуырдыл 195 азы сæххæсты цытæн литературон-музыкалон мадзал. Хайад дзы райстой Колыты Аксойы номыл лицей, фæндзæм скъола æмæ «Альбион»-ы ахуырдзаутæ. Ардæм æрбацыдысты культурæйы министрады кусджытæ, ахуыргæнджытæ, библиотекæйы чиныгкæсджытæ, мыхуыры æмæ информацийы фæрæзты минæвæрттæ. Мадзал кæд уазал æмæ къуындæг хатæны уагъд цыд, уæддæр рауад иттæг хорз. Библиотекæйы кусджытæ мадзалмæ сæхи хорз бацæттæ кодтой: сарæзтой цалдæр къуымы, спайда кодтой алыгъуызон цæстуынгæ æрмæджытæй. Ахæм къуымтæ куыд «Уарз дæ райгуырæн къуым», «Николай Некрасов æмæ йæ чингуытæ», «Къоста нывгæнæг» стыр цымыдисдзинад сæвзæрын кодтой æрбацæуджытæм. Библиотекæйы кусджытæй рохуаты нæ баззадысты Стыр Фыдыбæстæйон хæсты ирон хъæбатырты нæмттæ, уыдоны ныв-тæ конд сты зынæн ран.
Мадзал бацæуæн ныхасæй байгом кодта æмæ Николай Некрасовы тыххæй цыбыртæй æрдзырдта библиотекæйы директор Прокопенко Иринæ. Уый банысан кодта, зæгъгæ, Николай Некрасов йе сфæлдыстадон куыст æмæ адæмы уæззау царды уавæртæ æнкъарын райдыдта хæрзæвзонгæй, авд азы йыл куы сæххæст, уæд. Йæ уацмыстæ се ‘ппæт дæр сты лæгъз, æнцонкæсæн æмæ хъуыдыджын. Николай Некрасов уарзта уырыссаг зарджытæ æмæ йын йæхи дæр уый сразæнгард кодта зарджытæ фыссынмæ. Адæм сæ уарзтой æмæ сæ зарыдысты стыр æхцондзинад æнкъаргæйæ.
Ныййарæг мад æмæ хъæбулы ‘хсæн ахасты тыххæй уæды æмæ абоны фысджытæ цъус нæ фыстой æмæ фыссынц, фæлæ йæ рæстæджы фысджытæй бирæ чидæртæ банысан кодтой се ‘ппæтæй фылдæр мадыл кæй фыста поэт Николай Некрасов.
Уый фæстæ ахуыргæнинæгтæ æрдзырдтой Николайы Некрасовы цард æмæ сфæлдыстады тыххæй. Николай Некрасов кæд фыссын райдыдта тынг раджы, уæддæр йæ æмдзæвгæтæ никæмæн æвдыста цалынмæ йыл 15 азы сыххæст, уæдмæ. Уый фæстæ сæ равдыста, æмæ алкæйы зæрдæмæ дæр фæцыдысты, фæцин кодтой бирæ чидæртæ. Хицæн чиныгæй дæр ын сæ мыхуырæй рауагътой, фæлæ, йæхæдæг куыд загъта, афтæмæй, уæдмæ цы поэтты уацмыстимæ базонгæ ис, уыцы уацмыстæй сæ лæмæгъдæрыл кæй банымадта. Уый тыххæй азылд, кæм сæ уæй кодтой, уыцы магазинтæ æмæ ларектыл, æруыгъта сæ æмæ сæ иууылдæр басыгъта.
Николай Некрасов бирæ уарзта кæстæр фæлтæры æмæ йæ уацмысты иу ха-йы ирдæй æвдыст æрцыд сабиты цард, ахуыр æмæ архайды тыххæй. Ахуыр-дзаутæ иттæг хорз кастысты поэты фыст æмдзæвгæтæ æмæ уацмыстæй скъуыддзæгтæ. Колыты Аксойы номыл лицейы ахуыргæнинæгтæ та сæ музыкæйы ахуыргæнæг Цхуырбаты Жаннæйы разамындæй æххæст кодтой музыкалон номыртæ.
Ахуыргæнинæгты тыххæй ма мæ зæгъын фæнды уый дæр, æмæ сын кæд мадзалмæ бацæттæ кæныны тыххæй уыд цъус рæстæг, уæддæр сæ хæстæ сæххæст кодтой иттæг хорз, аивадон амæлттæй арæхстджынæй спайда кæнгæйæ. Ахæмты нымæцмæ хауынц Тедеты Надя æмæ Арсен, Чысиаты Аланæ æмæ Виктория, Джиоты Кристинæ, Пухаты Владимир, Багаты Алан, Гаглойты Джульетта æмæ æндæртæ.
Николай Некрасовы мадзалы фæдыл ма сæ хъуыдытæ загътой Хуссар Ирыстоны культурæйы министры хæдивæг Дзеранты Джульеттæ æмæ Колыты Аксойы номыл лицейы музыкæйы хайады гæс Цхуырбаты Жаннæ.
Уый фæстæ мадзалы хайадисджыты библиотекæйы кусджытæ схорзæхджын кодтой грамотæтæй, бакодтой сын зæрдылдарæн лæвæрттæ.
Кæронбæттæны мадзалы æппæт хайадисджытæ се ‘нувыд æмæ арæхст-джын архайды тыххæй арфæйы ныхæстæ загътой мадзал бацæттæгæнджытæ Хъæцмæзты Ванда æмæ Букуылты Маринæйæн.
Гæззаты Иван
Comments are closed, but trackbacks and pingbacks are open.