МАДÆЛОН ÆВЗАДЖЫ БОНЫ ЦЫТÆН

Æрвылаз дæр ирон æвзаджы боны бæрæгбон нæ республикæйы нысан æрцæуы уæрæхæй. Ныр дæр та уыд афтæ. Ацы нысаниуæгджын боны иувæрсты нæ ахызтысты горæт Къуайсайы культурæйы хæдзар Зассеты Владимиры сæргълæудæй æмæ сывæллæтты библиотекæ Багаты Асиаты къухдариуæгадæй. Уыдон иумæ сорганизаци кодтой диссаджы бæрæгбонон мадзал мадæлон æвзаджы боны цытæн, кæцы уагъд æрцыд сывæллæтты библиотекæйы. Уыцы бон уырдæм æрбацыдысты горæты цæрджытæ.

Мадзал байгом æрцыд  æмдзæвгæ «Мæ райгуырæн Ирыстон»-æй, кæцыйы  аив бакаст Бестауты Миленæ. Горæты Культурæйы хæдзары фæндырдзæгъдæг Козаты Аринæ æмæ гуымсæгылдзæгъдæг Козаты Тотырбег сæххæст кодтой зарæг «Райгуырæн урс хæхтæ».

Уый фæстæ сценæмæ рахызт мадзаламонæг, Культурæйы хæдзары вокалы ахуыргæнæг Зассеты Алан. Уый æрæмбырдуæвджытæн ракодта бæрæгбонон арфæтæ. Мадæлон æвзагæн цы ахсджиаг нысаниуæг ис, уый тыххæй æрбамбырдуæвджытæн радзырдта Къуайсайы сывæллæтты библиотекæйы сæргълæууæг, РХИ-йы культурæйы сгуыхт кусæг Багаты Асиат. Уый æрсидт æрæмбырдуæвджытæм, цæмæй дзурой сæ мадæлон æвзагыл, Стыр Къостайы æнæмæлгæ æвзагыл. «Ма рох кæнæм, нæ рагфыдæлтæ  скифтæ, сæрмæттæ æмæ нын алантæ цы диссаджы æвзаг ныууагътой, уый. Хъуамæ йыл дзурæм, уымæн æмæ æвзагыл цас фылдæр адæм дзурой, уыйбæрц фидардæр кæны æмæ йæ афтæмæй фæлтæрæй-фæлтæрмæ дæттæм мах дæр. Не ‘взаг, нæ культурæ, нæ рæсугъд æгъдæуттæ куы фесæфой, уæд махæн, ирон адæмæн, хорз фидæн нæ уыдзæн. Дæргъвæтин азты дæргъы не знæгты аххосæй цы фыдæвзарæнтæ бавзæрстам, уыдон нын хъуамæ зонд-зонæн уой æмæ не ‘взагæн авгау æрхауынæй тæрсæм. Йæхи ирон чи хоны, уыдонæй алкæйы хæс дæр у се ‘рвылбонон царды нæ рæсугъд мадæлон æвзагыл дзурын», – дзырдта уый.

Багаты Асиат ма радзырдта, фæстаг азты нæ республикæйы ирон æвзаджы рæзты тыххæй цы куыст цæуы, уый тыххæй дæр.

Вокалон къорд «Браво»-йы уæнгтæ сæххæст кодтой æртæ зарæджы: «Цины зарæг», «Мады зарæг» æмæ «Мæ уарзон Ирыстон». Бацæттæ сæ кодта Зассеты Алан. Кафджыты къорды къухдариуæггæнæг Зассеты Зурабы сæргълæудæй чызджытæ акафыдысты: «Чызджыты кафт» æмæ «Акушинский». Мадæлон æвзагыл фыст æмдзæвгæтæ кастысты Хуыгаты Ларисæ, Танделаты Анастасия, Хуыгаты Элинæ, Хъæцмæзты Альбинæ, Хуыгаты Аслан æмæ æндæртæ. Багаты Асиат ауагъта викторинæ рагон зæронд ныхæсты æмæ сæ нысаниуæджы тыххæй. Сывæллæттæ равдыстой сценкæтæ. Мадзал фæцис Къостайы æмдзæвгæйы рæнхъытæй. Бæрæгбонон мадзалы хайадисæг сывæллæттæн балæвар кодтой открыткæтæ æмæ ручкæтæ, викторинæйы хорз зонындзинæдтæ кæй равдыстой, уый тыххæй.

Нæ уацх.