Советон Цæдисы ныппырхимæ æмæ нæ царды Интернеты æмæ алыгъуызон нырыккон технологиты фæзындимæ чиныгæн уадиссаг кад нал уыд. Фæлæ, фæстаг азты кæд раздæрау нæ, уæддæр адæм чиныгагур цæуын райдыдтой библиотекæтæм, чиныгуæйгæнæн магазинтæм. Кæй зæгъын æй хъæуы, змæст æмæ хæстон азты нæ республикæйы библиотекæты чингуыты фонд бынтон скадавар, фæлæ фæстаг цалдæр азы хъуыддаг хуыздæрырдæм ивын райдыдта.

Æрæджы Æвзæнгты æмæ Сывæллæтты республикон библиотекæты чингуыты фондтæ бæрæг фæхъæздыгдæр сты алыгъуызон чингуытæй. Хуссар Ирыстоны Уæрæсейы минæварады «Россотрудничество»-йы минæвæрттæ Сергей Скворцовы сæргълæудæй дыууæ библиотекæйæн дæр балæвар кодта алыгъуызон чингуыты стыр партитæ.

«Балæвар нын кодтой куыд уырыссаг классикты чингуытæ, афтæ ма æндæр чингуытæ дæр. Мах хъусынгæнинаг сарæзтам Интернеты, цæмæй ацы ног чингуыты тыххæй базоной нæ чиныгкæсджытæ. Дæс азы бæрц ахæм хорз æмæ хъæуæг чингуытæ никуыуал райстам», – банысан кодта Æвзæнгты республикон библиотекæйы директор Дриаты Нателæ.

Райгондæй баззадысты «Россотрудничество»-йы лæварæй Сывæллæтты республикон библиотекæйы кусджытæ дæр сæ директор Джиоты Аллæйы сæргълæудæй сæ чингуыты фонд сын кæй баххæст кодтой, уый тыххæй. «Дæргъвæтин хæстон азты дæргъы нæ чингуыты фонд мæгуырæй-мæгуырдæр кодта, фæлæ фæстаг азты райсæм ног чингуытæ. «Россотрудничество»-йы минæварад нын арæх балæвар кæны чингуыты партитæ æмæ нын уымæй барухс кæнынц нæ чысыл чиныгкæсджыты зæрдæтæ, афтæ ма хайад райсынц нæ уагдоны уагъдцæуæг алыгъуызон мадзæлтты», – банысан кодта Сывæллæтты библиотекæйы директор.

Ацы библиотекæты кусджытæ сæ директортæ Джиоты Аллæ æмæ Дриаты Нателæйы сæргълæудæй бузныг зæгъынц уæрæсейаг дипломатон миссийы къухдариуæггæнæг Сергей Скворцовæн æмæ иннæ минæвæрттæн сæ радон лæвары æмæ æппынæдзухон æххуысы тыххæй.

ДЖИОТЫ Екатерина

Comments are closed, but trackbacks and pingbacks are open.