Дæргъвæтин рæстæджы «Иры Стыр Ныхас»-ы Ленингоры районы хайадæн нæ уыд сæргълæууæг. Фæлæ Хацырты Филипп районы администрацийы сæргълæууæджы бынаты кусын куы райдыдта, уæд бакуыста ацы фарстыл. 2017 азы 15-æм декабры Ленингоры поселочы уагъд æрцыд ацы организацийы конференци, цыран хайад райстой «Иры Стыр Ныхас»-ы хуссарирыстойнаг хайады сæрдар Гаглойты Роберт, йæ хæдивæг Коцты Сергей æмæ ацы змæлды фæсивæдон хайады сæрдар Плиты Серго,  Цхинвалы районон организацийы сæрдар Дудайты Альберт. Конференцийы сæйраг фарст уыд Ленингоры районон хайадæн сæрдар сæвзарын. Раразмæгонд æрцыд Цъинагары хъæуы цæрæг Дзукъаты Хазбийы кандидатурæ æмæ йыл конференцийы хайадисджытæ иу-уылдæр сразы сты.

Ацы бонты Цъинагары хъæуы бынæттон администрацийы та уагъд æрцыд æмбырд Дзукъаты Хазбийы сæргълæудæй. Æмбырды хайад райстой районы администрацийы сæргълæууæг Хацырты Филипп, культурæйы хайады хистæр Битарты Бессарион, бынæттон хъæууон администрацийы сæрдар Быценты Вадим. Боны фæткы уыд дыууæ фарстайы – ирон адæмы æгъдæуттæ бахъахъхъæнын æмæ «Иры Стыр Ныхас»-ы Ленингоры районон хайады куырыхонты советмæ Цъинагары хъæууон администрацийы цæрджытæй сæвзарын. Дыууæ фарстыл дæр лæмбынæг æрдзырдта Дзукъаты Хазби. Уый æрæмбырдуæвджытæн радзырдта, зæгъгæ, 2017 азы Дзæуджыхъæуы уагъд æрцыд ирон адæмы æнæрадон съезд, цыран рæгъмæ рахастой бирæ ахсджиаг фарстытæ, уыцы нымæцы, мадæлон æвзаг æмæ нæ фыдæлты хорз традицитæ бахъахъхъæныны фарст дæр. Дзукъайы фырт сдзуапп кодта æрæмбырдуæвджыты цымыдисгæнæг фарстытæн. Æввахс рæстæджы ахæм æмбырдтæ уагъд æрцæудзысты Ленингоры районы æндæр хъæуты дæр. Æмбырды раныхас кодта районы администрацийы сæргълæууæг Хацырты Филипп.

Ацы организацийы районы хайадмæ æвзæрст æрцыдысты авд куырыхон нæлгоймаджы.

Уалыты Зоя,

Цъинагар

 

Comments are closed, but trackbacks and pingbacks are open.