Рæзгæ фæлтæримæ баст сты ныййарджыты царды æппæт хъуыддæгтæ дæр. Уымæ гæсгæ алчидæр хъуамæ йæхицæн хæсыл нымайа, сабитæн æппæты хуыздæр уавæртæ аразын, сæйраджыдæр, та сын се ‘нæниздзинад бахъахъхъæнын.

Хъыгагæн, ныртæккæ бирæ сабиты сæ райгуырдæй фæстæмæ бахъæуы медицинон æххуыс. Æмæ уæд алы ныййарæг дæр уæд бахаты йæ медицинон зонындзинæдтæ фылдæр кæмæн вæййынц, ахæм педиатртæм. Фæлæ ма йæ медицинон зонæнты бæрзонд æмвæзады æмрæнхъ, педиатр хъуамæ зона сабиты психологи сæ кармæ гæсгæ, уа йын æнахъомтимæ иумиаг æвзаг ссарыны арæхстдзинæдтæ. Уый афтæ куы нæ уа,  уæд дохтырæн амынддзинæдтæ нæ уыдзысты ахадгæ.

Ацы хъуыдыимæ разы сты Цхинвалы Сабиты поликлиникæйы ныййарджыты иу къорд æмæ æрбахатыдысты нæ газеты редакцимæ, цæмæй мах нæгазеты фæрстыл раарфæ кæнæм поликлиникæйы сæйраг дохтыр Хæныкъаты Ларисæйæн йæ бæрнон куысты æмæ æндæр хæрзиуджыты тыххæй.

Поликлиникæйы коллектив сæхæдæг куыд зæгъынц, афтæмæй уыдон Ларисæйы домæнмæ гæсгæ лæуд сты уæлдæр ранымадгонд принциптыл æмæ се ‘хсæн ис хъæрмуд ахаст. Ам ничи никæмæн у нæдæр «паддзах» æмæ нæдæр «фæсдзæуин», алчи дæр æххæст кæны йæхи хæстæ, фæлæ кæд бахъæуы, уæд та æрбалæууынц кæрæдзийы фарсмæ æмæ уымæй фæрогдæр кæнынц кæрæдзийы проблемæтæ.

Хæныкъаты Ларисæ ацыуагдоны  сæргъ слæууыд 2008 азы. Æвæццæгæн, махæй алкæмæн дæр зындгонд сты нæ республикæ уæдæй  фæстæмæ цы зын фæндагыл рацыд. Фæлæ,  æвзонг чызг уæвгæйæ, Ларисæ нæ фæтыхст, уыцы уæззау дуджы поликлиникæ цы зындзинæдтыл æмбæлд, уыдонæй. Уый хыгъд, уый ардта алыгъуызон амæлттæ поликлиникæ йæ къахыл слæууын кæнынæн. Абон мах стæм æвдисæн, Ларисæ ацы фарстаты фæдыл кæй бакодта ахсджиаг куыст æмæ йын кæй бантыст тынг бирæ.

Ныртæккæ Сывæллæтты поликлиникæйы уæвынад кæны медицинæйы алы фадыджы дохтыр-педиатр дæр, куыд зæгъæм,  окулист, лор-дохтыр, кардиолог, аллерголог æмæ æндæртæ. Кусы дзы 15 педиатрион хайады. Ис ма сæм церебралон æндзыгнизæй, сæкæрнизæй, бронхиалон астмæйæ, зæрдæнизтæй рынчын сабиты номхыгъдтæ æмæ уыдон се ‘ппæт дæр медикаменттæ райсынц æнæаргъæй. Афтæ ма æнæ аргъæй медикаменттæ лæвæрд цæуынц, æртæ азы онг кæуыл цæуы, уыцы сабитæ дæр. Ам ма ис ультразæлон диагностикæйы аппарат дæр.

Афтæ, æмæ Ларисæйы æнувыд æмæ хæларзæрдæ ахастæй райгонд сты куыд поликлиникæйы кусджытæ, афтæ ныййарджытæ дæр.

«Ацы медицинон куыстуаты æппæт уавæртæ дæр арæзт æрцыдысты йæ сæйраг дохтыр Хæныкъаты Ларисæйы æнувыд ахасты руаджы. Афтæ ма Ларисæ у, йæ дæсныйады сусæгдзинæдтæ хорз чи зоны æмæ сæ парахатæй сабиты хæрзиуæгæн, уыдоны æнæниздзинады сæраппонд æнæвгъауæй чи пайда кæны, ахæм дохтыр. Ларисæ кæддæриддæр йæ хæларзæрдæ уагæй æмæ йæ фæлмæн ныхасыгъæдæй ссары алы сабийы зæрдæмæ дæрфæндаг»,- загъта поликлиникæйы ныййарджытæй сæ иу Аджиты Фатимæ.

Ларисæйы удыхъæды хорз миниуджытыл ма дзырдтой йе ‘мкусджытæ дæр. уыдонæй алчидæр райгонд у йæ къухдариуæггæнæджы архайдæй. Куыд дохтыр, афтæ Ларисæ у бæрзондквалификациджын педиатр. Йæ куыстмæ йын кæддæриддæр ис æнувыд æмæ бæрнон ахаст. Бирæ хæттыты афтæ вæййы, æмæ ныййарджытæ сæ сабиты æрбакæнынц куысты рæстæджы куы фæвæййы, уæд. Фæлæ Ларисæ æппындæр никæй фæхъыг кæны, райсы сæ æмæ сæ басгары, бакæны сын æмбæлон æххуыс.

Афтæ ма, куыд æмкусæг, афтæ дæр у, тыхст рæстæджы йе ‘мгары фарсмæ чи æрбалæууы, ахæм æнувыд къухдариуæггæнæг. Коллективы ‘хсæн, æвæццæгæн, нæй иунæг ахæм адæймаг дæр, Ларисæ кæй фæхъыг кодта. йæ хорз зæрдæйы равг парахат кæны коллективыл дæр æмæ сты кæрæдзийæн хорз æмгæрттæ», – загъта поликлиникæйы кусæг Хъуылымбегты Светланæ.

Апрелы мæйы Ларисæ банысан кодта йæ райгуырæн бон æмæ йын уый цытæн йæ коллектив фæкодтой зæрдиаг арфæтæ. Арфæтæ ма йын кæнынц сабиты ныййарджытæ дæрæмæ йын сæ цæст уарзы царды æппæт хæрзиуджытæ.

Сылгоймаджы æмæ ныййарæджы амондæй æххæст у кæддæриддæр æххæст кæнæд дæ рухс бæллицтæ.

Хуыгаты М.

Comments are closed, but trackbacks and pingbacks are open.