2016 азы 16 марты Уæрæсейы æмæ Хуссар Ирыстоны паддзахадты сæргълæуджытæ Владимир Путин æмæ Тыбылты Леонид сæ къухтæ цы Бадзырдыл æрфыстой, уый домæнтæ æххæст кæныны сæраппонд знон, 4 июлы Уæрæсейы æмæ Хуссар Ирыстоны Мидхъуыддæгты министрадтæ æмгуысткæнынад æмæ кæрæдзийæн æххуыс кæныны тыххæй къухтæ æрфыстой сразыдзинадыл.
Уæрæсейы ’рдыгæй сразыдзинадыл къух бафыста Уæрæсейы мидхъуыддæгты министры хæдивæг инæлар-булкъон Игорь Зубов. Хуссар Ирыстоны фарсæрдыгæй та сразыдзинадыл йæ къух æрфыста Хуссар Ирыстоны Мидхъуыддæгты министр, инæлар-майор Лæууойты Æхсар. Сразыдзинадыл къухтæ æрфыссыны цытджын церемони байгом кодта æмæ дзы раныхас кодта Хуссар Ирыстоны Президенты Администрацийы къухдариуæггæнæг Джиоты Алан. Цытджын церемонийы хайадисджытæн раарфæ кæныны фæстæ уый банысан кодта, зæгъгæ, абон мах ардæм æрæмбырд стæм ахсджиаг æмæ зæрдылдарæн цауы тыххæй. Уæрæсейы æмæ Хуссар Ирыстоны мидхъуыддæгты министрадты разамонджытæ сæ къухтæ æрфысдзысты кæрæдзийæн æххуыс æмæ æмгуысткæнынады тыххæй сразыдзинадыл.
Банысан ма кодта уый, куыд Уæрæсейы, афтæ Хуссар Ирыстоны мидхъуыддæгты министрадты разамонджытæ сразыдзинад бацæттæ кæныныл хорз кæй бакуыстой, уый дæр æмæ бузныг загъта Игорь Зубов æмæ Лæууойты Æхсарæн.
Йæ раныхасы Уæрæсейы мидхъуыддæгты министры хæдивæг Игорь Зубов бузныджы ныхæстæ загъта Хуссар Ирыстоны Президент Тыбылты Леонид æмæ Хуссар Ирыстоны мидхъуыддæгты министр Лæууойты Æхсарæн. Уыдон архайдтой ахсджиаг æмæ æнæ-мæнгхъæуæг къахдзæфтæ аразыныл æмæ абон ахæм сразыдзинадыл нæ къухтæ кæй фыс-сæм, уый, сæйраджыдæр, у уыдон æнувыд архайды фæстиуæг.
Уыимæ ма банысан кодта, зæгъгæ, ацы сразыдзинад ноджыдæр фæхуыздæр кæн-дзæнис, æнæуыйдæр нын цы хорз ахастытæ ис, уыдоны. Уый фæстæ бахатыд, цæмæй цы хъæуæг документ бацæттæ кодтой, ууыл къухтæ фыст æрцæуа.
Лæууойты Æхсар та загъта, зæгъгæ, ацы сразыдзинад æрмæст нæ куыстæн нæ, фæлæ ма фæахъаз уыдзæнис Уæрæсейы мид-хъуыддæгты министрадæн. Уыимæ сæ социалон, афтæ сæ цардуагон уавæртæ фæ-хуыздæр уыдзысты хуымæтæг адæмæн дæр, фæкъаддæр уыдзысты фыдракæндон цаутæ, фæхуыздæр уыдзæнис æдасдзинады уавæр.
Сразыдзинадыл къухтæ æрфыссыны фæстæ Хуссар Ирыстоны Президент Тыбылты Леонид йæхимæ райста, куыд сразыдзинадыл къухтæрфысджыты, афтæ ма дзыллон информацийы фæрæзты минæвæртты дæр. Йæ раныхасы банысан кодта, зæгъгæ, Уæрæсеимæ цы Бадзырд сарæзтам, уый домæнтæ æххæст цæуынц графикмæ гæсгæ. Куыд зонæм, афтæмæй къухтæ æрфыстой Уæрæсейы æмæ Хуссар Ирыстоны мидхъуыддæгты министрадтæ, тагъд ахæм сразыдзинадыл сæ къухтæ æрфысдзысты Уæрæсейы æмæ Хуссар Ирыстоны хъахъхъæнынады министрадтæ дæр. Уыимæ ма банысан кодта, зæгъгæ, ацы бонты скъуыддзаг цæуы куыд мыздты, афтæ пенситæ фæфылдæр кæныны фарст дæр.
Сразыдзинадыл къухтæ æрфыссыны церемонийы æмæ Президентмæ химæрайсты чи раныхас кодта, уыдон се ’ппæт дæр банысан кодтой, Уæрæсеимæ бангомдæр кæныны сæраппонд ахсджиаг къахдзæф арæзт кæй æрцыдис, уый.
Уый фæстæ сразыдзинадыл къухтæ æрфыссыны церемонийы хайадисджытæ сдзуапп кодтой дзыллон информацийы фæрæзты минæвæртты фарстатæн.
Гæззаты Иван
Comments are closed, but trackbacks and pingbacks are open.