Нӕ горӕты хорзӕрдӕм цы ивындзинӕдтӕ цӕуы, уыдоны нымӕцмӕ хауынц уынгты хӕрзарӕзтад дӕр. Дзӕвгар куыстытӕ бакӕнын бантыст аразджытӕн ацы хъуыддаджы ӕмӕ уый та хорзӕрдӕм фӕзынд ӕмткӕй нӕ уарзон горӕты рӕсугъддзинадыл.
Цасдӕр рӕстӕджы аразджытӕ коммуникацион куыстытӕ ӕххӕст кӕнынц Харебаты Исахъы уынджы кӕройнаг хайы ӕмӕ сын ӕнтысгӕ дӕр кӕны. Фӕлӕ зӕгъын хъӕуы, уымӕ ӕввахс Я. Гогебашвилийы уынг хаст нӕ уыд ацы азы Инвестпрограммӕмӕ. Ацы уынг у бынтон нарӕг, стӕй рагӕй нӕ уыд цалцӕггонд ӕмӕ ӕппӕт уыдӕтты тыххӕй зындзинӕдтӕ ӕвзӕрстой уынджы цӕрджытӕ. Сӕ уавӕр ӕрбӕстон кӕнынмӕ сын лӕмбынӕг ӕркаст Арӕзтад ӕмӕ архитектурӕйы министрад ӕмӕ дзы арӕзтадон-цалцӕггӕнӕн куыстытӕм ӕрӕвнӕлдтой майы мӕйы ӕмбисы. Уыцы ӕнӕмӕнгхъӕуӕг хӕстӕ ӕххӕст кӕнынмӕ уал бавнӕлдта паддзахадон унитарон куыстуат «Водоканал»-ы коллектив (йӕ директор Цхуырбаты Алан). Бӕрӕг кӕныны рӕстӕджы кусджыты уӕлхъус баййӕфтон бригадир Гӕбӕраты Азӕмӕты ӕмӕ йӕ хъус лӕмбынӕг дардта, иу кӕнӕ ӕндӕр куыст куыд цӕуы, ӕппӕт уыдӕттӕм. Раппӕлыд уӕззау техникӕйыл кусӕг Жажиты Вадим, кусджытӕ Багаты Руслан, Теделури Гога, Гӕбӕраты Серги, Джавахишвили Эдик, Тыджыты Раман, Джиоты Игорь, Хъуылымбегты Уырызмӕг ӕмӕ ӕндӕртӕй. Куыд банысан кодта, афтӕмӕй сӕм сӕххӕст кӕнын цы куыстытӕ хауы, уыдон ахицӕн кӕндзысты ӕввахс бонты. Дарддӕр йӕ схӕрзарӕзт кӕнынмӕ та бавналдзысты фæндагаразджытæ.
ХУЫБИАТЫ Никъала
Comments are closed, but trackbacks and pingbacks are open.