Цхинвалы районы цӕрӕнуатон-коммуналон хӕдзарады (йӕ хистӕр Хъотайты Б.) раз бирӕ скъуыддзаггӕнинаг хӕстӕ фӕлӕууы æмæ сӕ сӕххӕст кӕныныл кусынц хицӕн ӕмӕ хицӕн хъӕуты, уымæй сын рог кӕнынц сӕ къух. Цӕвиттон, цы куыстытӕ ахицӕн кӕнынц ӕмӕ хъӕууон фӕллойгӕнджыты зӕрдӕ цӕмӕй барухс кӕнынц, уыдон нымӕцмӕ хауынц ахӕмтӕ, куыд хъӕуты мидӕг фӕндӕгтӕ ӕрбӕстон кӕнын, нуазыны донӕй сӕ сифтонг кӕнын, хидты арӕзтад, сӕ цалцӕг кӕнын ӕмӕ афтӕ дарддӕр.

Цӕрӕнуатон хӕдзарады ӕххуыс ӕмӕ аудындзинад ӕнкъарынц Къостайыхъӕуы цӕрджытӕ дӕр. Ӕндӕр ӕмӕ ӕндӕр рӕстӕджыты ацы хъӕуы уыдон бацархайдтой хъӕумӕ нуазыны дон ӕруадзыныл, бынӕттон уынгты иу хайыл хуыр ӕркалын, схӕрзарӕзт сӕ кӕныныл ӕмӕ афтӕ дарддӕр. Ӕрӕджы дӕр та хӕдзарады шофыртӕ хуыр ластой ӕмӕ йӕ ӕркалдтой Алантӕ ӕмӕ Ирӕтты уынгты иу хайы. Кӕй зӕгъын ӕй хъӕуы, нырма бынӕттон уынгтӕ иууылдӕр хӕрзарӕзт не ‘рцыдысты, иуӕй-иу бынӕтты сӕ мӕгуырау боныгъӕдты ахизӕнтӕ нӕ вӕййы, куыд автотранспортæн, афтӕ фистӕгӕй цӕуджытӕн дӕр. Фӕлӕ зӕгъын хъӕуы, хӕдзарад алы куыстытӕ сӕххӕст кӕныныл алы хатт нӕ феххӕссы бӕрӕг аххосӕгтӕм гӕсгӕ. Уӕддӕр зӕрдӕдарӕн ис, хъӕуы иннӕ уынгтӕ схӕрзарӕзт кӕныныл дӕр ӕввахс рӕстӕджы кӕй бакусдзысты, уымӕй.

Хуыбиаты Никъала

Comments are closed, but trackbacks and pingbacks are open.