Æрæджы та ногæй республикæйы культурæйы уагдæтты бабæрæг кодта РЦИ-Аланийы Сæргълæууæджы хæстæ рæстæгмæ æххæстгæнæг Битарты Вячеслав. Йемæ ма уыдысты Хицауады Сæрдары хæдивджыты хæстæ рæстæгмæ æххæстгæнджытæ Огъуаты Алан, Дзанайты Барис, культурæйы министры хæстæ рæстæгмæ æххæстгæнæг Атай-ты Мæдинæ æмæ филармонийы аивадон разамонæг Махъоты Ацæмæз. Битары фырт сæйраг æргом аздæхта, паддзахадон филармони æмæ Национ музейы цалцæггæнæн куыстытæ куыд цæуынц, уымæ.

Ацы дыууæ ахсджиаг культурон куыстуаты агъуыстытæ раууатмæ раджы æр-цыдысты, бирæ азты дæргъы æмбæлгæ цалцæггонд кæй нæ уыдысты, уый тыххæй. Уавæр йæ бынатæй феггуырсыд дзæнæты бадинаг Æгъуызарты Тамерланы бардзырдмæ гæсгæ.

Ацы бæстыхæйттæ республикæйы культурон царды ахсджиаг бынат кæй ахсынц æмæ сæ тагъддæр сæ къахыл слæууын кæнын кæй хъæуы, уый тыххæй уыд Битарты Вячеславы ныхас аразджытимæ. Уый бафарста архитекторты, проектаразджыты, цалцæггæнджыты куыд æмæ сæ цас рæстæг бахъæудзæн куыстытæ кæронмæ ахæццæ кæнынæн, цы хъуаг сты, цæуыл къуылымпы кæнынц.

Йæ фарстытæн ын бæлвырд дзуаппытæ радтой арæзтады разамонджытæ Гуситы Игорь, Куыдзиаты Тимур, Хъалаты Батрадз æмæ Пхалæгаты Тимур. Сæ ныхасмæ гæсгæ, филармонийы куыстытæ кæд æрвылбон цæуынц, уæддæр дзы ис, ивддзинæдтæ кæдæм бахæссай, ахæм фарстатæ æмæ цæмæй уыдон тагъддæр лыггонд æрцæуой, уый тых-хæй сæм хъæуы иумæ æркæсын.

Атайты Мæдинæ радзырдта музейы арæзтады тыххæй:

— Цæмæдæр гæсгæ ацы ахсджиаг паддзахадон культурон артдзæст цыппар азы размæ хаст не ’рцыд федералон программæ «Уæрæсейы культурæ»-мæ. Растдæр зæгъгæйæ та йæ чидæр уырдыгæй систа. Цæмæй фæстæмæ уыцы программæмæ хаст æрцæуа, уый тых-хæй бирæ дзурын бахъуыд федералон чиновниктимæ. Хъуыддаг бахæццæ бæстæйы Президент Владимир Путинмæ дæр. Уый тыххæй бацархайдтой Тотоонты Алыксандр, Хацъæты Олег, Мамсыраты Таймураз æмæ иннæтæ. Ныр нæхи цæстæй уынæм, арæзтад йæ тыхы кæй бацыд, æмæ нæ фидарæй уырны, къуылымпыдзинæдтæ дзы кæй нал уыдзæн. Æз бузныг зæгъын, нæ фарсмæ цы æххуысгæнджытæ æрбалæууыд, уыдонæн. Ахæм хæрзгæнджытæ сты гом акционерон æхсæнад «Рокос»-ы разамонæг Мырзахъулты Анатоли, фирмæ «Жираф» æмæ ма цалдæр куыстуаты.

Битарты Вячеслав æмæ йе ’ххуыс-гæнджытæ баныхас кодтой, ам цы фарс-тытыл дзырдæуыд, уыдоны фæдыл та иннæ къуыри кæй фембæлдзысты, уый тыххæй.

Comments are closed, but trackbacks and pingbacks are open.