Къуайсайы астæуккаг скъолайы къласæн æдде хайы гæс Хуыгаты Альбинæ, пионерты раздзог Джиоты Ангелинæ æмæ къласгæстæ бацæттæ кодтой иумиаг бæрæгбонон мадзал.
«Æрвылаз дæр мах æрæмысæм, нæ Райгуырæн бæстæ хъахъхъæнгæйæ Стыр фыдыбæстæйон хæсты 1991 азæй 1945 азмæ йæ адзал чи ссардта, уыдон нæмттæ. Хъыгагæн, историйы уый фæстæ азты дæр цыдысты хæстон архæйдтытæ æмæ та сæ цардыл æнауæрдгæйæ тох кодтой ирон фæсивæд, ногæй ныккалд сæ туг. Уыдоны нæмттæ мах хъуамæ дарæм нæ зæрдыл æмæ сæ фæлтæрæй-фæлтæрмæ дæттæм нæ фæдонтæм», – радзырдта мадзаламоджытæй сæ иу.
Ахуыргæнинæгтæ сæххæст кодтой бæрæгбоны традицион зарджытæ, хæстон æмæ ирон национ кæфтытæ радзырдтой æмдзæвгæтæ.
«Гуырдзиаг-ирон æмæ мæхъæлон-ирон хæстыты не скъолайы рауагъдонтæ цалдæрæй ныууагътой сæ цард: Тедеты Владик, Гæджиты Валерæ, Хуыгаты Вадим, Бæззаты Эдуард, Джуссойты Цезарь. Хуыгаты Радислав æмæ Зассеты Ахмæт та фæмард сты Украинæйы зæххыл нацизмы ныхмæ тохгæнгæйæ. Уыдон се ‘ппæт дæр сты Иры хъайтартæ æмæ сын мах кæддæриддæр сæ кад исдзыстæм бæрзонд», – радзырдта мадзаламонæг. Уый фæстæ уæрæх экраныл равдыстой хъатарты цардыл ист видео-роликтæ сæ хæстон архæйдтытимæ æмæ иу минут æмырæй алæугæйæ ссардтой фæмардуæвджыты ном.
Мадзаламонджытæ раарфæ кодтой лæппутæн æмæ сын чызджытæ та скодтой лæвæрдтæ.
***
Бæрæгбоны фæлгæтты ма скъолайы физикон цæттæдзинады ахуыргæнджытæ Хъæцмæзты Анатоли æмæ Хуыгаты Дзерассæ хистæр кълæсты ‘хсæн ауагътой ерыстæ стъолы теннис æмæ воллейболæй.
«Стъолы теннисæй ерысты хуыздæр цæттæдзинад равдыстой 10-æм къласы ахуыргæнинæгтæ æмæ ссисты уæлахиздзаутæ. Хуыгаты Артур та нымад æрцыд хуыздæр хъазæгыл.
Воллейболæй ерысты уæлахиздзаутæ систы 11-æм къласы ахуыргæнинæгтæ. Хуыздæр хъазджытыл жюри банымадтой Хуыгаты Виктория, Наниты Хетæг, Сæрмæт, Зассеты Аслан, Теблойты Камиллæ æмæ Куымæридтаты Саниславы», – загъта Хуыгаты Дзерассæ.
Хъæцмæзты Анатоли, Хуыгаты Альбинæ æмæ Дзерассæ ма бæрæгбоны цытæн ауагътой «Хъæлдзæг старттæ». Хайад дзы райстой кæстæр кълæсты ахуыргæнинæгтæ. Жюрийы уæнгтæ Хуыгаты Суликъо, Хуыгаты Иринæ æмæ Хуыгаты Тенгиз хуыздæр командæйыл банымадтой «Алантæ»-йы.
ХУЫГАТЫ Миленæ
Comments are closed, but trackbacks and pingbacks are open.