Ивгъуыд сабатæй хуыцаубонмæ æхсæвы Хуссар Ирыстоны Сыгъдæг Мадымайрæмы аргъуаны ауагъд æрцыд бæрæгбонон аргъуыд.

Куадзæны рухс бæрæгбоныл сæмбæлынмæ аргъуанмæ æрбацыдысты республикæйы Президент Тыбылты Леонид, Хицауады Сæрдар Хъуылымбегты Доменти, Парламенты Сæрдар Бибылты Анатоли, Генералон прокурор Дзæгъиаты Уырызмæг, афтæ ма чырыстон диныл хæст уырнонтæ.

Куадзæны бæрæгбонон аргъуыд уагъта Цхинвалы аргъуантыл аудæг иерей Хетæгкаты Иаков.

Фыд Иаков раарфæ кодта аргъуанмæ æрбацæуджытæн Чырыстийы рухс бæрæгбоны сæраппонд æмæ сын йæ цæст бауарзта сабырад æмæ хæрзиуæг.

«Абон мах кад кæнæм Хуыцауæн, мах иууылдæр аргъуанмæ кæй æрæмбырд стæм, уый тыххæй, — загъта Хетæджы фырт. — Чырыстийы бæрæгбон у куыд удгæсты, афтæ не ’хсæн чи нал сты, уыдоны дæр, уымæн æмæ ацы рухс бæрæгбоны уыдонæн гом сты арвы дуæрттæ æмæ нæм уырдыгæй сæ хъус дарынц».

Хетæгкаты Иаковы ныхæстæм гæсгæ ирæтты фыдæлтæ уыдысты уырнонтæ æмæ уыцы уырнынад хызтис фæлтæрæй-фæлтæрмæ æмæ уыдоны руаджы уыцы уырнынад тыхджынæй тыхджындæр кодта.

«Нæ фыдæлтæ уыдысты тыхджын чырыстонтæ, уырнонтæ, — загъта сауджын. — Бирæ зындзинæдтæ бахъуыд æвзарын мах, фæлæ сæ аиуварс кодтам, къахдзæф къахдзæфы фæстæ нæ республикæйы дидинæфтыдмæ цæугæйæ. Бирæ туг ныккалд нæ зæххыл, тынг бирæ сты, сæ сæртæ Райгуырæн бæстæйы тыххæй нывондæн чи рхастой, æмæ абон мах ам кæй стæм æмæ кæй кувæм, уый у уыдоны руаджы æмæ Хуыцауы стыр хæрзиуæг».

Цхинвалы аргъуантыл аудæг бузныг загъта Тыбылты Леонидæн, аргъуанмæ кæй æрбацæуы динон сæйрагдæр бæрæгбонты рæстæджы, афтæ банысан кæнгæйæ, зæгъгæ, ахæм традици алы паддзахады нæй.

Бæрæгбонон мадзалы чырыстонтæн раарфæ кодта паддзахады сæргълæууæг, йæ цæст сын бауарзта хæрзиуджытæ æмæ Хуыцауы аудындзинад, афтæ ма банысан кодта, Чырыстийы рухс бæрæгбон кæй у иууыл ахсджиагдæр чырыстон бæрæгбон.

«Махæн чырыстонад у сæйраг уырнынад, уымæн æмæ нæ уырны, уартæ ма нæ фыдæлтæ — алантæ ирон зæххыл хицæуттæ куы уыдысты, уæдæй фæстæмæ, — загъта Тыбылты Леонид. — Чырыстонад арф йæ уидæгтæ ауагъта нæ царды, æмæ, уадз, нæ удтæ кæддæриддæр уæт ахæм сыгъдæг, куыд Куадзæны сыгъдæг бæрæгбон».

Президент æрсидт чырыстонтæм, цæмæй цæуой аргъуанмæ æмæ кувой — кувой кæстæрты, æввахс хиуæтты, йæ фæндагыл бирæ зындзинæдтæ чи бавзæрста, уыцы адæмы тыххæй.

«Царды æнцонæй къухты ницы æфты, тырнын хъæуы хорз хъуыддæгтæм, хъæуы æууæндын æмæ уæд Хуыцауы фæрцы алцыдæр уыдзæнис хорз», — банысан кодта Тыбылы фырт.

Сыгъдæг Куадзæны бæрæгбоны сæраппонд паддзахады сæргълæууæг раарфæ кодта Хуссар Ирыстоны дислокацигонд 4-æм æфсæддон базæйы æфсæддон службæгæнджытæн дæр.

«Уадз, ацы бæрæгбон аудæг уæт нæ республикæйы уæвæг Уæрæсейы Федерацийы æппæт æфсæддон службæгæнджытыл, — загъта Президент. — Уыдоны руаджы Хуссар Ирыстон дидинæг æфтауы æмæ ирæттæн ис хорз фидæн».

Куадзæны рухс бæрæгбоны уырнонтæ дзуарджын цыдæй æрзылдысты аргъуаны алыварс, стæй бæрæгбонон аргъуыд дарддæр цыдис.

Comments are closed, but trackbacks and pingbacks are open.