Ацы аз уалдзæджы Хуссар Ирыстоны Паддзахадон университет æмæ федералон уагдон «Никитскы ботаникон зайæгойхъомылгæнæндон – Уæрæсейы зонæдты академийы Национ зонадон центр»-имæ æмгуыстады фæдыл бафыстой бадзырд. Бадзырды фæлгæтты сбæрæг кодтой æмгуыстады ахсджиагдæр фæдыздæхт – ХИПУ-йы зæххы фадыджы ботаникон зайæгойхъомылгæнæндон саразын. Уымæ гæсгæ æрæджы Цхинвалмæ фæуазæг сты уæлдæрбанысангонд зонадон федералон центры директор, Уæрæсейаг зонæдты академийы уæнгкорреспондент, хъæууон хæдзарады зонæдты доктор, профессор Юрий Плугатарь æмæ йæ коллегæтæ Николай Ермаков (флорæйы лабораторийы сæйраг зонадон кусæг), Оксана Шевчук (техникон культурæтæ æмæ биологион активон буарадты хайады гæс), Владимир Герасимчук (дендрологи, паркзонынад æмæ ландшафтон архитектурæйы лабораторийы гæс). Уый тыххæй нын фехъусын кодтой Паддзахадон университеты пресс-службæйы.
Хуссар Ирыстоны Паддзахадон университеты ректор Тедеты Вадим Ботазы фырт цытджын уазджытыл сæмбæлд хæларæй университеты бæстыхайы. Сæйраджыдæр, фембæлды рæстæджы дзырд цыдис нæ республикæйы фенддагдæр районтæй сæ иу Дзауы районы Кърозы хъæуы ботаникон зайæгойхъомылгæнæндон саразыны фарстыл. Ацы хæххон хъæуы университетæн ис йæхи зæхх æмæ сæ фæнды, цæмæй флорææфснайæн музей сырæза æмæ пайда хæсса куыд университетæн, афтæ æхсæнадæн дæр.
Цæмæй специалисттæ хуыздæр базонгæ уыдаиккой хæххон бынат æмæ куысты уавæртимæ, уый тыххæй сæ университеты разамынад скодтой Кърозы хъæумæ. Ацы кусæгон экскурсийы хайад райста Дзауы районы администрацийы сæргълæууæг Тыбылты Вандæ дæр.
«Фæлтæрдджын специалисттæ бынаты бæрæг кодтой ботаникон зайæгойхъомылгæнæндон саразынæн реалонæй цавæр фадæттæ ис, цæмæй бынаты æндæр æмæ æндæр бæстæты, афтæ ма нæхимæ чи зайынц, уыцы зайæгойтæ культивацигонд æмæ ахуыргонд цæуой зонадон æгъдауæй», банысан кодтой университеты пресс-службæйы.
Никитскы ботаникон зайæгойхъомылгæнæндон ис Сау денджызы былгæрон Ялтайы, поселок Никитайы. Йæ рæстæджы ацы ботаникон фæзуат сырæзт 1811 азы. Æмткæй фæзуат у 1100 гектары æмæ дзы зайы бирæ алыгъуызон диссаджы рæсугъд æмæ хъæуæг зайæгойтæ. Ис ын хайæдтæ æмæ филиалтæ Хъырым æмæ Херсоны областы. Ацы уæрæх зайæгойхъомылгæнæндон ис Хъырымы республикæйы Хъæууон хæдзарады министрады дæлбар æмæ Уæрæсейы зонæдты академийы цæстдарды бын. Уый у уникалон зонадон æмæ иртасæн уагдон.
Нæ уацх.
