15-æм октябры – Хетæгкаты Къостайы райгуырæн боны цытæн цымыдисон мадзал бацæттæ кодтой Цхинвалы скъола-интернаты  8-æм къласы ахуыргæнинæгтæ сæ хъомылгæнджытæ Санахъоты Майя, Джиголаты Заринæ æмæ Бибылты Фатимæйы сæргълæудæй. Мадзал ауадзынæн сын баххуыс кодта скъола-интернаты драмон къорды къухдариуæггæнæг Хъотайты Сæрмæт. Мадзалы нысан уыд Хетæгкаты Къостайы цард æмæ сфæлдыстадмæ цымыдисдзинад æмæ уарзондзинад æвзæрын кæнын; Райгуырæн бæстæ уарзын, адæмыл аудын, царды æппæт фæзилæнты дæр уæздан уæвын – сты алы адæймаджы царды сæйраг хæстæ; Къостайы тыххæй ирон фысджытæ цы уацмыстæ ныффыстой, уыдонимæ ахуырдзауты зонгæ кæнын; Ахуыргæнинæгты зæрдæты ирон аив дзырдмæ, ирон аивадмæ уарзондзинад æвзæрын кæнын.

Цхинвалы скъола-интернаты ахуыргæнджытæ æмæ ахуырдзаутæ бацыдысты Къостайы цырты цурмæ æмæ уым ауагътой сæ мадзал. «Къоста! Ирон адæмы уарзондæр хъæбул, йæ намыс, йæ цæсгом, Иры цырагъдар, æфхæрд дзыллæты сæрхъызой, сидзæрты рæвдауæг, адæмты хæлардзинады зарæггæнæг. Нæ, ахæм стыр лæджы аккаг дзырдтæ æнцон ссарæн не сты. Къостайы ном алы адæймагæн дæр у тырысайау. Уый нæ хоны ахуырады бæрзæндтæм, рæсугъд фидæнмæ, хæлардзинад æмæ уарзондзинады уæлтæмæнмæ. Йе ‘нæмæлгæ «Ирон фæндыр» та нын у цырагъдар», – дзырдта мадзаламонæг Дзанайты Олег. Ахуыргæнинæгтæ Туаты Миленæ, Гасситы Ирбег, Дзабиты Руслан, Имаралиев Имарали, Æрсойты Сослан, Гæбæраты Эдуард, Дзанайты Олег, Касаты Кетино, Хъæцлæуты Гæмæ, Дзабиты Руслан, Гæбæраты Эдик, Бететы Сæрмæт, Плиты Жаннæ, æмæ æндæртæ аив бакастысты Къостайы фыст æмдзæвгæтæ. Ирон цагъд фæндырыл сæххæст кодта Бæгъиаты Георги, Дзукъаты Георги ацагъта гуымсæгыл. Ирон зарæг «Нæ урс хæхтæ» хорз азарыд Дзукъаты Сослан.

Къостамæ уарзондзинадæй райгуырд рæсугъд æгъдау: æппæтадæмон бæрæгбон поэты кадæн. Бæрæгбон фурды донау æнхъæвзы суанг Пятигорскмæ, Ставрполмæ, Украинæмæ, Мæскуымæ, Петербургмæ æмæ бирæ æндæр рæттæм. Йæ номыл уынгтæ ис Дзæуджыхъæуы, Тбилисы, Херсоны, Пятигорскы, Уфайы, Цхинвалы æмæ бирæ æндæр горæтты. Къостайы номыл бæрæгбоны ахуырдзаутæ цитатæтæ æрхастой ирон адæмы иннæ стъалы Абайты Васойы ныхæстæй: «Англисæгтæ дзурынц: махæн ис Шекспир, немыцæгтæ фæзæгъынц: махæн ис Гете, уырыссæгтæ зæгъынц: махæн ис Пушкин, æмæ мах, ирæттæ та зæгъæм: махæн та ис  Къоста, нæхи Къоста!

Мадзаламонæг загъта: 1939 азы Советон Цæдисы адæмтæ бæрæгбон нысан кодтой, Къостайы райгуырдыл 80 азы кæй сæххæст, уый сæраппонд. Юбилейы рæстæджы стыр уырыссаг фыссæг Фадеев, Къостайы схуыдта «ирон адæмы Леонардо да Винчи» æмæ загъта: «Ирон адæм сæрыстыр хъуамæ уой, Хетæгкаты Къостайы хуызæн фыссæг сын кæй уыд, уый тыххæй».

Мах нæ зæрдыл кæддæриддæр хъуамæ дарæм Къостайы фæдзæхст: «Адæмтæ, кæрæдзи уарзгæйæ цæрут!». Кæронбæттæны ахуыргæнинæгтæ сæххæст кодтой Къостайы «Балцы зарæг» æмæ хъæлдзæг зæрдæйы равгимæ здæхтысты фæстæмæ. Мадзал рауад тынг цымыдисон, ирдæй зынд ахуыргæнджытæ сæ хъомылгæнинæгтимæ хорз кæй бакуыстой, уый. Иннæ ахæм ахуырдзаутæ Къостайы æм-дзæвгæтæ куыд тынг зæрдæрайæ æмæ зæрдæмæхъаргæйæ кастысты, уымæй зæгъæн ис, уыдон цæрæнбонтæм кæй кад кæндзысты ирон адæмы генийæн.

Джиоты Екатеринæ

Comments are closed, but trackbacks and pingbacks are open.