Инциденттæ ма æруадзын æмæ сæм хъусдард здахыны фæдыл механизмты фæлгæтты куыст æдзухон бындурыл уагъд цæуы 2009 азæй фæстæмæ. Механизмты фæлгæтты боны фæткы сæйраг фарст у арæнгæрон территоритыл æдасдзинад æмæ Хуссар Ирыстон æмæ Гуырдзыстоны ‘хсæн паддзахадон арæнтæ халыны цаутыл æруынаффæ кæнын.
Механизмты радон 120-æм фембæлдæн хатдзæгтæ аразгæйæ, Хуссар Ирыстонæй делегацийы сæргълæууæг, Постконфликтон фарстатæ бæстонкæнынады фæдыл РХИ – йы Президенты Æххæстбарджын минæвары хæдивæг Коцты Егор информацион фæрæзты минæвæрттæн афтæ радзырдта, зæгъгæ, механизмты фæстаг фембæлдæй фæстæмæ паддзахадон арæнтыл хынцыд не ‘рцыд бирæ фæткхалæн цаутæ. Хынцыд æрцыд, арæнты сæрты æнæзакъонæй чи ахызт, æрмæстдæр ахæм æртæ цауы. Уыдонæй дыууæ фæткхалæджы æнæ иварæй æрвыст æрцыдысты республикæйæн æддæмæ. Æртыккаг фæткхалæджы ныхмæ та конд æрцыд уголовон хъуыддаг æмæ уагъд цæуы фæдагурæн мадзæлттæ. Куыд банысан кодта, уымæ гæсгæ йын йæ хъысмæт бæлвырд кæндзæн тæрхондон.
Коцты Егоры ныхæстæм гæсгæ, бæрæг рæстæджы хынцыд не ‘рцыд, гуырдзиаг полицийы минæвæрттæ, науæд Евроцæдисы миссийы хъусдарджытæ раздæр куыд хæлдтой паддзахадон арæнты фæтк, ахæм цаутæ.
«Евроцæдисы минæвæрттæ арæнты фæтк кæй нал фехæлдтой, уый чизоны æнæнхъæлæджы у, æмæ чизоны та миссийæн ног сæргълæууæг Патриция Бугани кæй у, уый йыл бандæвта.
Фæлæ нæ уæддæр фидæнмæ кæсын хъæуы хъавгæ оптимизмимæ», – банысан кодта Егор.
Æнæпилотон тæхæн æрмæджытæ æнæзакъонæй кæй тæхынц æмæ кæй халынц Хуссар Ирыстоны уæлдæфон тыгъдад, уый фæдыл ныхасгæнæг дзырдта, зæгъгæ, хынцыд æрцыд æрмæстдæр иу ахæм цау.
Гуманитарон фарстатæ
Форматы фæлгæтты серьезон æмæ нысанмæздæхт куыст цæуы донхæры донæй ифтонгады фарстытыл.
«Практикон æгъдауæй ныртæккæ æнæкъуылымпыйæ дон исы Цъинагары зонæ. Дон цæуы Арцеуы донхæры къанауы дæр. Ацы иу фарсты фæдыл гуырдзиаг фарс æвдисы æмбаргæ ахаст æмæ цæрджытæ проблемæтæ не ‘взарынц”
Хъæуы серьезон куыст бакæнын
Хуссарирыстойнаг делегацийы минæвæрттæ æппынæдзух рæгъмæ хæссынц, Знауыры районы Уистæйы хъæуы дæргъвæтин рæстæджы гуырдзиаг полициæгты пост æнæзакъонæй кæй уæвынад кæны, уый. Ныхасгæнæг куыд банысан кодта, уымæ гæсгæ, раджы уа æви æрæджы, уæддæр ацы проблемæ аскъуыддзаг кæнын бафтдзæн нæ къухты. Ацы фастыл хъæуы серьезон æмæ егъау куыст бакæнын. Ныфс бавæрдта, æппынæдзух куыст ыл кæй цæуы æмæ абон уа – сом, уыцы пост ист æмæ иуварс æрцæудзæн Хуссар Ирыстоны территорийæ.
Банысан кæнын хъæуы уый, æмæ Фæскавказы æдасдзинады тыххæй Женевæйы дискусситы фæлгæтты уагъд кæй цæуынц Инциденттæ ма æруадзын æмæ сæм хъусдард здахыны фæдыл механизмты куыст. Хайад дзы исынц Хуссар Ирыстон, Уæрæсе, Гуырдзыстон, Евроцæдис æмæ ЕÆÆО-йы минæвæрттæ.
КЪÆБУЛТЫ Маринæ
