Киноныв – Хетæгкаты Къостайы тыххæй

Режиссер Джусойты Мурат исы Хетæгкаты Къостайы тыххæй киноныв. Уыдзæн чысыл новеллæ. Дзурдзæн, Къоста Херсонмæ фæстаг хатт æрвыст куы æрцыд, уый размæ рæстæджы тыххæй. Киноныв у паддзахадон телерадио-компани «Алани»-йы проект. Йæ презентаци уыд 6-æм октябры медиа-фестиваль «Восхождение»-йы. Эфиры та æвдыст æрцæудзæн Къостайы райгуырæн боны 15-æм октябры.

Мотор, камерæ – æмæ кадры сæвзæры Хетæгкаты Къоста. Алы сценæ дæр хъуамæ уа иттæг хорз ист. Уымæ гæсгæ режиссер алы кадр дæр цалдæр хатты исын кæны.

Джусойты Мурат Къостайы тыххæй кинойыл бакусыныл уайтагъд не сразы, йæ ныфс нæ хаста. Фæлæ йын йæ цард æмæ сфæлдыстадимæ лæмбынæгдæр куы базонгæ, уæд сразы ис.

Хетæгкаты Къостайы канд Ирыстоны номдзыд фырты нæ, фæлæ куыд хуымæтæг адæймаджы равдисын – ахæм хæс йæ размæ сæвæрдта Берозты Таймураз. Уый хъазы сæйраг ролы. Лæппу уындæй дæр Къостайы хуызæн у. Гримерты хъуыд æрмæст йæ цæсгомыл æнцъылдтæ сныв кæнын æмæ зачъетæ сурс кæнын. Таймуразæн фыццаг роль у кинойы. Къостайы сурæт саразынæн ын баххуыс кодта поэты сфæлдыстад. Арæх-иу æрбацыд музеймæ дæр, экспонаттæм кæсгæйæ йæ фæндыд Къостайы миддуне хуыздæр банкъарын, æмæ уый йæ къухы бафтыд.

Кинонывы æвдыст цæуы 1898-æм аз  Къоста фæстаг хатт Херсонмæ æрвыст куы æрцыд, уый размæ рæстæг. Джусойты Мураты ныхæстæм гæсгæ, нырыккон Дзæуджыхъæуы 18-æм æнус равдисын æнцон нæу.

Кино истой 3 раны – дендрарийы, Къостайы хæдзар-музейы æмæ æфсæддон городокы.

Цæмæй 18-æм æнусы дуг равдиса, уый тыххæй режиссер спайда кодта алыхуызон мадзæлттæй. Афтæ, кинойы хъайтартæ Къостайы проспекты бирæуæладзыгон хæдзары подъездмæ бахизынц – уый горæты æппæтæй зæронддæр цæрæн хæдзæрттæй у иу , мидæмæ та бахауынц музейы агъуыстмæ.

Кинонывы фылдæр архайынц, фæлтæрддзинад кæмæ нæй, ахæм актертæ. Æнæмæнг дзы ис профессионалтæ дæр. Уæрæсейы сгуыхт артист Валерий Балкизов ссыд Кæсæг-Балхъарæй. Куыд зæгъы, афтæмæй йын кæд чысыл роль ис, уæддæр ын Къостайы тыххæй кинонывы архайын бæрнон у.

«Къоста» у чысыл аивадон киноныв. Цы цаутæ дзы æвдыст цæуынц, уыдон, гæнæн ис, æмæ, æцæгдæр, нæ уыдысты. Зæгъæм, иу сценæйы Хетæгкаты Къоста фембæлд Байаты Гаппоимæ, Цæголты Георгиимæ æмæ Джиоты Христофоримæ. Фæлæ ахæм фембæлдæн доку-менталон æвдисæнтæ нæй.

Киноныв «Къоста» у паддзахадон теле-радиокомпани «Алани»-йы проект. Цæттæгонд цæуы ног телесезонмæ.

Кинонывы æрмæг ист у, ныртæккæ йæ райдыдтой монтаж кæнын. Зæгъын хъæуы уый, æмæ аивадон кинонывтæ телерадиокомпанийы рагæй нæ истой. Ацы проектæй хъуамæ уыцы куыст сног уа.