Карантин бандæвта автомобилон-транспортон управленийы куыстыл дæр. Рæстæгмæ  фæкъаддæр кодтой рейстæ районтæм æмæ хъæутæм дæр. Уымæй размæ уал РХИ-йы Хицауады уынаффæмæ гæсгæ транспортон управлени рæстæгмæ æрурæдта горæты æхсæнадон транспорты змæлд.

 «Къуыри æртæ хатты цы хъæутæм цыд автобус, уырдæм ма ныр цæуы æрмæстдæр дыууæ хатты. Къуайса, Знауыр æмæ Дзаумæ æрвылбон дæр цæуынц автобустæ. Транспорты змæлд фæкъаддæр кодтам, коронавирусы инфекци цæмæй ма апарахат уа, уый нысанæн. Æхсæнадон транспорт кусы микрорайонтæ «Хурзæрин» æмæ «Цæгаттаг»-мæ. Уымæн æмæ уыцы районты нæй фæлхасадон магазинтæ, дыргътæ æмæ халсæрттæ æлхæнынмæ та цæрджытæ фæцæуынц горæтмæ. Цалынмæ автобусты шофыртæ райсом куыстмæ нæ рахизынц, уæдмæ сæ автобустæ æрцæуынц дезинфекци. Бæлццæттæ дæр архайынц, цæмæй хъахъхъæд цæуой санитарон нормæтæ», – загъта автомобилон-транспортон управленийы сæргълæууæг Дудайты Альберт.

Дудайты Альберты ныхæстæм гæсгæ карантины размæ нæ горæты районон центртæ æмæ сæ хъæутимæ иумæ бæлццæттæн лæггад кодта 23 автобусон рейсы. Уыдон райсомы 8 сахатæй изæры  8 сахатмæ æххæст кодтой сæ маршрутон рейстæ, фаг бæлццæттæ цыд æви нæ, уымæ нæ кæсгæйæ. Куыддæр карантин ист æрцæуа æмæ коронавирусæй тас нал уа, афтæ маршрутон транспорт кусдзæн йæ раздæры графикмæ гæсгæ. Уыдоны нымæцы Цхинвал-Дзæуджыхъæу æмæ ма Цхинвал-Мæскуыйы рейстæ дæр. Фæстаг маршрутыл автобус цыд 2 къуыри иу хатт.

Comments are closed, but trackbacks and pingbacks are open.