Сæ куыстмызд фæфылдæр уыдзæн æрмæстдæр бюджетон уагдæтты куысджытæн. Сæрмагондæй та уæлдæр профессионалон ахуырады кусджытæн, кондадон ахуырады ахуыргæнджытæн, дохтыртæн, астæуккаг æмæ кæстæр медперсоналæн, культурæйы фадгуыты кусджытæн.
Фæллойы министр куыд зæгъы, афтæмæй сентябры мæйæ иууыл тынгдæр мызд фæфылдæр уыдзæн, социалон фадыджы чи кусы, уыдонæн. «Социалон кусджытæй, иунæг цæрæг æмæ æвæгæсæг зæрæдтæм æмæ инвалидтæм чи зилы, уыдон истой мизерон мыздтæ. Ныр сæ мыздтæм бафтдзæнис фондз мин сомы бæрц. Зонад-иртасæн куыст чи кæны æмæ кæстæр медицинон персоналæн та сæ мыздтæм бафтдзæнис цыппар мин сомы. Иууыл къаддæр куыстмызд фæфылдæр уыдзæн астæуккаг медперсоналæн, æрмæстдæр 970 сомы».
Гаглойты Олег ма куыд зæгъы, афтæмæй куыстмыздтæм æфты Уæрæсейы Федерацийы фæрæзты хыгъдæй. Уыцы уагæвæрдыл къух фыст æрцыд 2016 азы Республикæ Хуссар Ирыстон æмæ Уæрæсейы Федерацийы ‘хсæн Сразыдзинады фæлгæтты. Куыд зонæм, афтæмæй куыстмызд фæфылдæр кæныны процедурæ арæзт хъуамæ цæуа æрвылаз дæр. Цæгат Кавказы республикæты мызды æмвæзадмæ схиза.
Фæллойы министр ма куыд зæгъы, афтæмæй ивгъуыд азы бæрæг аххосæгтæм гæсгæ куыстмызд нæ фæфылдæр. Фæлæ ацы аз 6 майы УФ-йы коллегæтимæ æрфыстой сæ къух уыцы хъуыддагон гæххæттыл.
2024-09-14
