Рæстæг куыд цæуы, афтæ йемæ хæссы алыхуызон ивындзинæдтæ. Адæймаг знон дæр хъуыды кæуыл нæ акодтаид, ахæм ногдзинæдтæ фæзындысты æмæ сæ хъуамæ пайда кæна йе ‘рвылбонон архайды, уымæн æмæ нын рог кæнынц нæ куыст. О, уый хорз у, фæлæ алцæмæн дæр бæрц зонын хъæуы. Ам æз интернеты кой кæнын. Бынтон йæ уацары бахауæм, уый не ‘рхæсдзæн пайда нæдæр, нæ дунеæмбарынад æмæ сæйраджыдæр та не ‘нæниздзинадæн.
Интернетæй адæмы иу хай кæй пайда кæнынц, уымæ гæсгæ фæсвæд аззадысты мыхуыры фæрæзтæ, нал кæсынц газеттæ æмæ журналтæ, чингуытæ. Хъыгагæн, уый раст нæу, алкæмæн йæ бар йæхи, фæлæ газеты æрмæджытæ вæййынц бæстон æмæ раст, редакцийы коллектив фæархайы, цæмæй йæ кæсджытæ зонгæ кæной æрцæугæ цаутимæ рæстæгыл. Чиныг зонды суадон æнæхъуаджы нæ хонынц, уымæн æмæ автортæ цы аивадон, историон æмæ æндæр æрмæджытыл фæфыдæбон кæнынц, уыдон кæддæриддæр фæндаг ссарынц йæ кæсджыты зæрдæтæм. Чиныг дæ къухмæ куы райсай, уæд уымæн йæ тых æмæ ахадындзинад уæлдæр лæууы.
Фæлæ банысан кæнын хъæуы иу æппæрццаг архайд, кæцы мæгуырауæрдæм æндавы чиныгкæсджыты активондзинадыл, чиныгмæ сæ иумиаг цымыдисыл. Цæвиттонтæ æрхæсдзынæн, махмæ цы чингуытæ фæзыны, уыдон тыххæй. Авторы чиныг мыхуыры куы рацæуы, уæд йæ тираж иууыл фылдæр вæййы 300 экземпляры æмæ уый та у бынтон цъус. Фæстаг рæстæг нæм рухс цы чингуытæ федтой, уыдон нымæцы ис Галаты Барисы куыстыты æмбырдгонд «Осетинские народные песни». Уый фыццаг хатт мыхуыры рацыд 1964 азы æмæ дзы ис 100 зарæджы, уыцы нымæцы хъæбатырты зарджытæ, уарзон чызджы зарджытæ, фыййауы зарджытæ, чындзæмбæлтты зарджытæ, инструменталон кафты цæгъдтытæ, нырыккон дуджы зарджытæ æмæ æндæртæ. Ацы чиныджы фæзындæй рацыд æрдæг æнусæй фылдæр æмæ ногæй рухс федта амæйразмæ, уыд ын презентаци дæр. Чиныгыл тынг фæцин кодтой кæмæ бафтыд, уыдон, фæлæ уæд иннæтæ та цы фæуой, уымæн æмæ нæй йе ссарæн. Цалдæргай чингуытæ рацыд Дзабиты Зарбег, Мæргъиты Ирбег æмæ æндæр автортæн, бæргæ баххæст кæниккой уыдонæй дæр сæ хæдзарон библиотекæтæ, фæлæ… Бацыдтæн Хъайтарты уынджы чингуытæ уæйгæнæн магазинмæ æмæ дзы разындысты Хъазиты Мелитоны чингуытæ, иннæтæ уым нæ разындысты.
Абонæй нæу ацы хъуыддаг, кæсæг цы чингуытæм фæбæллы, уыдон йæ къухты нæ бафтынц, фæлæ сæ кæм агура æмæ кæмæй кура,уымæн дæр йæ бон ницы у.
Хуыбиаты Никъала
Comments are closed, but trackbacks and pingbacks are open.