Ацы аз дæр та ирон литературæйы бындурæвæрæг Хетæгкаты Къостайы райгуырæн боны цытæн уагъд цæуынц алыгъуызон бæрæгбонон мадзæлттæ. Ӕниу, нырма ахæм аз нæ уыд, æмæ ирон адæмы фæтæджы ном 15 октябры ма ссарой йæ фæстагæттæ, ма йын скад кæной, ма йын саргъ кæной йе сфæлдыстадæн. Нæ республикæйы къухдариуæгад дæр бацархайдта, цæмæй ацы бæрæгбонон мадзæлттæ рауайой рæсугъддæр, æмæ ардæм æрхуыдтой Кæсæг-Балхъарæй Цгат-Кавказы паддзахадон аивæдты институты студенты æмæ ахуыргæнджыты сæ ректор Анатолий Рахаевы сæргълæудæй.
Цытджын уазджытæ сæ арæхстдзинад равдыстой Хетæгкаты Къостайы номыл паддзахадон драмон театры сценæйыл – сæххæст кодтой зынгæ композиторты классикон музыкалон уацмыстæ, адæмон зарджытæ æмæ кæфтытæ. Ацы диссаджы концертмæ æрбамбырд ис ахæм музыкæйæн табугæнджытæ, кæцытæ стыр æхцондзинад райстой музыкантты арæхстдзинадæй. Банысан кæнын хъæуы уый дæр, æмæ залы бандæттыл фæрсæй-фæрстæм бадыны бар нæ уыд коронавирусон низы тыххæй æмæ уымæ гæсгæ бадæнтæн се ‘рдæг афтидæй баззадысты.
Концерт сæ диссаджы зардæй байгом кодтой Президенты цур паддзахадон нæлгоймæгты хор. Уый фæстæ Хуссар Ирыстоны паддзахадон драмон театры аивадон къухдариуӕггӕнӕг Дзуццаты Тамерлан арфæйы ныхæстæ загътæ æрæмбырдуæвджытæн æмæ сценæмæ фæхуыдта Анатолий Рахаев æмæ Хуссар Ирыстоны паддзахадон университеты ректор Тедеты Вадимы. Дзуццаты Тамерлан куыд банысан кодта, афтæмæй Анатолий Рахаев у æрмæст аивæдты зонынады доктор нæ, фæлæ Цæгат-Кавказы федералон округы æппæт республикæты аивæдты аккаг архайæг.
«Мæнмæ куы бахатыдысты, зæгъгæ, Хетæгкаты Къостайы цы-тæн бæрæгбонон мадзæлттæм дæ хонæм, уæд мæхи уайтагъд-дæр арæвдз кодтон. Уымæн æмæ Къостайы хуызæн гоймæгтæ Кав-казы стæм уыдысты, – кæцыфæн-ды адæймагæн дæр Кавказимæ кæд исты иудзинад ис, уæд æнæмæнг зондзæнис ацы диссаджы поэты, кæцы йæ рæстæджы ныррухс кодта мæгуыр адæмы зæрдæтæ. Кæй зæгъын æй хъæуы, ирон адæммæ Къостайы фæстæ дæр бирæ зындгонд гоймæгтæ уыдис – Плиты Иссæ, мæ хæлар Гергиты Валери, бирæ æнтыстджын спортсментæ. Уымæй уæлдай ма æз лæгæй-лæгмæ зонгæ уыдтæн гениалон ирон адæймаг Абайты Васоимæ дæр. Абоны бон мах ардæм æрхастам концертон программæ, цæмæй уын равдисæм нæ арæхстдзинад æмæ уын барæсугъд кæнæм уæ бæрæгбон», – загъта йæ раныхасы Анатолий Рахаев.
Тедеты Вадим дæр бузныджы ныхæстæ загъта уазджытæн, кæй нæм саккаг кодтой æрцæуын æмæ ма фехъусын кодта, зæгъгæ дыууæ уæлдæр ахуыргæнæндоны бафыстой бадзырд æмгуысткæнынады тыххæй æмæ уый дарддæр стыр ахъаз фæуыдзæн квалификаци фæуæлдæр кæнынæн, фæлтæрддзинад райсынæн.
«Стыр бузныг мæ фæнды зæгъын нæ Президент Бибылты Анатолийæн, кæцы бацархайдта, цæ-мæй абоны бон ацы цытджын уазджытæ æрбалæууой нæ къæсæрыл. Цæгат-Кавказы паддзахадон аивæдты институт нымад цæуы æппæт Кавказы культурон цент-рыл. Уæлдай бузныг та мæ фæнды зæгъын нæ Культурæйы министрады сæргълæууæг Зассеты Жаннæйæн, уымæн æмæ, сæйраджыдæр, уый фæрцы бантыстис æрхонын ахæм диссаджы аивады дæсныты. Ӕз нæ цытджын уазджыты ныридæгæн зæрдæбынæй фæхуыдтон, цæмæй нæм фидæнмæ саккаг кæной ХИПУ-йы юбилейон бæрæгбонмæ», – банысан кодта йæ раныхасы Тедеты Вадим.
Зассеты Жаннæ бæстæйы Президент Бибылты Анатолийы номæй стыр арфæйы ныхæстæ загъта уазджытæн, банысан кодта, зæгъгæ, ныртæккæ Президент бынаты нæй, æндæра йæхæдæг дæр æнæмæнг æрбацыдаид концертмæ.
«Махæн бирæ азты дæргъы ис хъарм ахастытæ æмæ уый фылдæр баст у Анатолий Рахаевимæ, кæцы стыр уарзондзинадимæ кæсы нæ республикæмæ, нæ адæммæ. Абоны бон дæр та нæм æрцыдыстут, цæмæй та нын бахъæлдзæг кæнат нæ бæрæгбон, скад нын кæнат нæ фæтæгæн. Сымах нын абоны онг дæр бирæ лæггад кæнут – нæ сывæл-лæттæй бирæтæ ахуыр кæнынц уæ институты.
Хуссар Ирыстоны Президенты Указмæ гæсгæ, Цæгат-Кавказы паддзахадон аивæдты институты ахуыргæнæг Фатимат Цраева, бирæ азты дæргъы нæ республикæйæн аккаг кадртæ кæй хъомыл кæны æмæ йын стыр æнтыстытæ кæй ис зонадон-педагогон архайды, уый тыххæй йын лæвæрд æрцыд Хуссар Ирыстоны культурæйы сгуыхт кусæджы ном. Ацы хорзæх ын Президенты номæй цытджын æгъдауæй радта Зассеты Жаннæ.
Хицæн зæрдылдарæн лæвæрттæ ма райстой ноджы Анатолий Рахаев æмæ æндæр уазджытæ дæр. Ӕрцæугæ делегаци сæхæдæг дæр афтидарм нæ уыдысты – сæ зæрдылдарæн лæвæрттæ радтой Зассеты Жаннæ æмæ Тедеты Вадиммæ.
ДЖИОТЫ Алыксандр
Comments are closed, but trackbacks and pingbacks are open.