Кадрон ивындзинæдтæ, хъæууонхæдзарадон сфыст æмæ æндæр фарстытæ

Пухаты Эрикы къухдариуæгадæй уагъд æрцыд РХИ-йы Хицауады рабадт. Уынаффæ дзы цыд социалон-экономикон фадыджы фарстатæ, бынæттон администрациты штатон сконды оптимизацийы тыххæй фæндæттыл, афтæ ма кадрон ивындзинæдтыл.

Йæхи фæндонмæ гæсгæ йæ куысты бынатæй сæрибар æрцыд Стандартизаци æмæ метрологийы комитеты сæрдары хæдивæг Бекъойты Алан, йæ бынатмæ та иумиаг фæндонæй фидаргонд æрцыд Кокойты Гульназийы кандидатурæ, уый раздæр куыста комитеты сæргълæууæгæй.

«Иумæйаг хъæууонхæдзарадон сфысты тыххæй» республикæйы закъоны проекты фæдыл фехъусын кодта Паддзахадон статистикон управленийы хистæр Тыбылты Инал.

Уый банысан кодта, зæгъгæ, ахæм закъон райсын бахъуыд хъæууонхæдзарадон зонæнтæ райсын æнæмæнг кæй у, уый тыххæй. Райсæн та сын нæй хъæууонхæдзарадон зонæнты хуымæтæджы æмбырд кæныны амалæй.

«Уæрæсейаг коллегæты æххуысæй бацæттæгонд закъоны проект рацыд экспертизæйы æппæт этаптыл æмæ фидаргонд æрцыд, уый фæстæ йæ алæвæрдæуыд Республикæйы Парламентмæ. Фæлæ, кæд хъæууонхæдзарадон сфысты закъон рæхджы райст æрцæуа, уæддæр уымæ цæттæгæнæн куыст аххæсдзæн бирæ рæстæг, уымæн æмæ ацы куыстыл бахъæудзæн бафыдæбон кæнын æмæ домы хæрдзтæ», – бæлвырдæй загъта Паддзахадон статуправленийы сæргълæууæг.

Пухаты Эрик банысан кодта, зæгъгæ, хъæууонхæдзарадон сфыст тынг ахсджиаг у раст социалон-экономикон планкæнынадæн æмæ уымæ гæсгæ хъуамæ уагъд æрцæуа закъоны уагæвæрдтæм гæсгæ. «Цæмæй республикæйы хъæууон хæдзарады фадæтты уавæр бæлвырд фенæм, уый тыххæй хъæууонхæдзарадон сфыстæн саразын хъæуы æппæт уавæртæ дæр. Фыццаджыдæр, ссарын хъæуы æхцайы фæрæзтæ æмæ рагацау батыхсын хъæуы йæ организацион бындурыл. Махмæ ис Уæрæсейы статуправлениимæ фæстиуæгджын æмгуыстады фæлтæрддзинад æмæ мæ фидарæй уырны, уыцы хъуыддаг æнтыстджынæй кæй адарддæр кæндзыстæм», – банысан кодта Пухаты Эрик.

Дарддæр Хицауады уæнгтæ хорзыл банымадтой «Милицийы тыххæй» республикæйы закъонмæ бахæсгæ ивддзинæдтæ. Уыдон хауынц Мидхъуыддæгты органтæм куыстмæ райсын æмæ службæйон фæтк хъахъхъæныны уавæртæм.

Афтæ ма æмбырды рæстæджы фидаргонд æрцыд иу удæн фæцæрыны минимумы бæрц. Экономикон рæзты министр Кокойты Геннадийы ныхæстæм гæсгæ, 2017 азы IV-æм кварталы уый уыд  9 464, 18 сомы.

Знауыры районы администрацийы сæргълæууæг Гæбæраты Инал бахаста фæндон Знауыры районы администрацийы штатон нымæц фæфылдæр кæныны тыххæй, Æнахъомты хъуыддæгты æмæ сæ бартæ хъахъхъæныны хайадæй йæ баххæст кæнгæйæ. Раст ахæм фæндонимæ ма ралæууыдысты Цхинва-лы æмæ Дзауы районы администрациты сæргълæуджытæ. Хицауады уæнгтæ иууылдæр ацы фæндоныл сразы сты.

Фидар æрцыд «Паддзахадон таможнæйон комитеты сконд æмæ кæройнаг штатон нымæц сфидар кæныны тыххæй» Хицауады уынаффæйы проект. Уый арæзт æрцыд, акцизон хайад арæзт кæй æрцыд, уый тыххæй.

«Акцизон фиддонтæ ист кæй цæуынц, уый фадат дæтты паддзахадон бюджет баххæст кæнынæн. Афтæ ма ахъаз у, фæлхасгæнджытæ иуæй-иу товарты хуызтæ куыд агурынц, ууыл æндавынæн. Уынаффæйы проект куы райстæуа, уæд уый фадат ратдзæн, цæмæй ацы хайад æххæстбæрцæй скуса», – загъта Цхуырбаты Мурат.