Анахарсисы номыл республикон библиотекӕйы уагъд ӕрцыд мадзал Фыдыбӕстӕ хъахъхъӕнӕджы боны цытӕн. Бацӕттӕ йӕ кодтой библиотекӕйы кусджытӕ, нӕ горӕты 5-ӕм астӕуккаг ӕмӕ скъола «Альбион»-ы ахуыргӕнинӕгтӕ. Фӕхуыдтой йæм Цхинвалы горӕты Ветеранты советы сӕрдар Гобозты Ӕхсар, йӕ хӕдивӕг Козаты Павел, скъолаты ахуыргӕнджытӕ ӕмӕ ахуыргӕнинӕгты. Фыдыбӕстӕ хъахъхъӕнӕджы боны тыххæй ӕрдзырдта библиотекӕйы кусӕг Икъаты Аринӕ ӕмӕ банысан кодта, нӕ раздӕры Цӕдисы бирӕнацион адӕмты минӕвӕрттӕ, уыцы нымӕцы ирон адӕмы фырттӕ дӕр Стыр Фыдыбӕстӕйон хӕсты хъӕбатырдзинад ӕмӕ ӕхсардзинады цӕвиттон кӕй равдыстой, стӕй нӕ сагсур фӕсивӕды удуӕлдай тох гуырдзиаг лӕгсырдты ныхмӕ.Уый фӕстӕ адӕмы размӕ рахызт ӕмӕ сын йӕ диссаджы аивадӕй сӕ зӕрдӕтӕ балхӕдта Хуссар Ирыстоны паддзахадон драмон театры артисткӕ Къуезерты Фатимӕ Уый аив бакаст Галуанты Людӕйы ӕмдзӕвгӕтӕ «Гӕздӕнты авд ӕфсымӕры» ӕмӕ «Гимн Ирыстоны хъайтартыл». Зӕрдӕмӕдзӕугӕ сӕххӕст кодтой скъола «Альбион»-ы ахуыргӕнинӕгтӕ зарӕг «Ариаг дӕн, ирон» ӕмӕ «Ӕнӕнкъуысгӕ кафт». 5-ӕм астӕуккаг скъолайы ахуырдзаутӕ аив бакастысты Хуссар Ирыстоны сӕрыл ӕхсарджын тохгӕнджытӕ, дзӕнӕттӕгтӕ Джиоты Эльбрус, Кӕсойты Ибрагим, Гӕззаты Вадим, Табуты Радик ӕмӕ Дзабиты Геннадийы тыххӕй поэт Плиты Феликсы фыст ӕмдзӕвгӕтӕ. Бацӕттӕ сӕ кодта ацы скъолайы ирон ӕвзаг ӕмӕ литературӕйы ахуыргӕнӕг Еналдыты Жаннӕ.
Уый фӕстӕ фембӕлды хайадисджыты раз раныхас кодтой Стыр Фыдыбӕстӕйон хӕсты ветерантӕ Уалыты Лидӕ, Дзеранты Шота, культурӕйы министры хӕдивӕг Дзеранты Джульеттæ, библиотекӕйы хъуыддӕгты фӕдыл сӕйраг специалист Дриаты Нателæ æмæ библиотекӕйы директор Кокойты Валерия.
Хуыбиаты Никъала
Comments are closed, but trackbacks and pingbacks are open.