8-æм сентябры Цхинвалы Театралон фæзуаты уагъд æрцыд Цоциты Алан Резойы фырты мысæн акци. Уырдæм цхинвайлæгты æрбамбырд кодта Цоциты Аланы хъæлæс… Уартæ  20-æм æнусы 80-æм азты кæрон, 90-æм азты райдианы, хуссайраг ирæт-тæн хъысмæтхæссæн историон рæстæджы куыд уыд, афтæ.

Хуссарирыстойнаг паддзахаддзинады бындурæвæрæджы мысæн акцийы организатортæ баиу кодтой уникалон ныффыстытæ – митингты, «Адæмон Ныхас»-ы ра-бадтыты, парламенты сесситы Алан Резойы фырты раныхæстæ.

Æрмæстдæр уымæн уыд йæ бон республикæйы цæуæг процесстæ æмæ архайдтыты стратегийæн æнæлаз, раст формулировкæтæ радтын. Уыцы æнæлаздзинад сбæрæг кодта нæ историйы дарддæры цыд. Театралон фæзуаты æрæмбырд сты антифашистон фронт «Адæмон ныхас»-ы Цоцийы фырты æмтохгæнджытæ, уыцы легендарон æрсидтыты парламенты депутаттæ, республикæйы къухдариуæгады минæвæрттæ президент Гаглойты Аланы сæргълæудæй, столицæйы æмæ районты цæрджытæ.

Мысæн акци сорганизаци кодтой антифашистон фронт «Адæмон Ныхас»-ы ветерантæ, æхсæнадон организаци «Æмбæстагон платформæ», амалиуæггæнджыты цæдис, медиа-центр «Ир», цыртдзæвæнтæ хъахъхъæныны фæдыл æхсæнад.

Митинг уадзæг Гобозты Вячеслав куыд загъта, афтæмæй абоны акци у пълангонд цалдæр акцийæ фыццаг, цалынмæ Цоциты Аланы мард буары æртхутæг йæ Райгуырæн бæстæмæ нæ фæхæццæ кæной, уæдмæ. Кæрæдзи ивгæйæ, национ змæлды лидеры тыххæй сæ мысинæгтæ дзырдтой йе ‘мтохгæнджытæ – Харебаты Леонид, Битарти Зоя, Дзиццойты Юри, Плиты Бэлæ, Цоциты Зарæ, тæрхондонон процессты Цоциты Аланы адвокат Хуыгаты Анатоли, историк Хъуылымбегты Роберт, журналист Турманты Фатимæ.

Паддзахаддзинады бындурмæ, ирон зонадмæ Цоциты Аланы хайбавæрдæн зын саргъгæнæн у. Национ гени цардæй æцæгæлон бæстæйы кæй ахицæн, уыцы факт у национ трагеди, куыд йæ ныхмæ барæй арæзт тæрхондонон хъуыддæгтæ, афтæ. Æнæмæнгхъæуæг у Цоцийы фырты æххæст политикон æмæ барадон реабилитаци – ахæм уыд æппæт раныхæсты лейтмотив.

Цоциты Аланы бинонтæ æмæ хиуæттæн мæсæллæйы ныхæстæ загъта президент Гаглойты Алан. «Ирыстоныл æрцыд уæззау зиан, цардæй ахицæн нæ паддзахаддзинады бындурæвæрæг Цоциты Алан. Трагеди уый мидæг ис, æмæ Хуссар Ирыстоны хæдбардзинад æмæ сæрибардзинадыл чи тох кодта, уыцы адæймаг цардæй кæй ахицæн æцæгæлон бæстæйы æмæ Райгуырæн бæстæйы йæ баныгæнынæн кæй ис бæрæг зындзинæдтæ. Фæлæ мах ныхас кодтам æмбæлон структурæтимæ æмæ ацы фарстыл уынаффæ цæуы. Республикæйы къухдариуæгад æнхъæлмæ кæсы Цоциты Аланы бинонты уынаффæмæ йæ баныгæныны церемони сорганизаци кæныны тыххæй. Арæзт æрцæудзæн къамис йæ ном ын сæнусон кæныны тыххæй», – загъта йæ раныхасы Гаглойты Алан.

Паддзахад Аланийы йæ сырæзтмæ чи æркодта, уыцы историон процессты хайадисджытæм  паддзахады сæргълæууæг æрсидт, цæмæй ныууадзой «амбициты тох», кæцытæ арæх æркæнынц уыцы рæстæджы цаутæн алыгъуызон аргъ кæнынмæ, уыцы нымæцы Цоциты Аланы гоймаджы ахасты дæр, æмæ йын æмбæлон кад райдыдтой æрмæстдæр ныр.

«Хъæуы бæлвырд историон факттæ. Историйы цъус рæдыдтытæ не ‘рцыд, фæлæ нын, хъыгагæн, зондзонæн нæ фесты. Нымайын афтæ, æмæ нæ бæстæйæн уыцы хъысмæтхæссæн цауты хайадисджытæ хъуамæ фембæлой, зæгъой сæ хъуыдытæ, радзурой уыцы рæстæджы цауты бæлвырд фактты тыххæй, кæцытæ уый фæстæ хъуамæ хаст æрцæуой скъолайы ахуыргæнæн чингуытæм. Æвзонг фæлтæр хъуамæ зоной æппæт рæстдзинад, æнæмæнгхъæуæг у историйы раст ахуыргæнæн чиныг, кæцы æппынфæстагмæ хъуамæ арæзт æрцæуа», – загъта Гаглойты Алан.

Уый æрсидт акцийы организатортæм, информацион куыст фæтыхджындæр кæнынмæ, иннæ мадзæлттæм паддзахадон структурæты æрбакæнгæйæ.

Митинджы кæрон æрæмбырдуæвджыты раз раныхас кодта Цоциты Аланы чызг – Аннæ. «Мæ фыд цы вазыгджын фæндаг æмæ фыдæвзарæнтыл рацыд, уымæ нæ кæсгæйæ мæ сымахæн  зæгъын фæнды уый, æмæ мæ фыд кæй уыд амондджын адæймаг. Уый уарзта æмæ йын йæхи дæр уарзтой. Цы къабæзты архайдта, уым ын уыд зынгæ æмæ бындурон æнтыстытæ. Политикæйы – паддзахаддзинады бындурæвæрæг æмæ идеолог, спорты – йæ хъомылгæнинæгтæ  систы зындгонд тренертæ, зонады уый у Нартиадæ ахуыр кæныны ног ахасты бындурæвæрæг.

Иууыл сæйрагдæр та мæ зæгъын фæнды уый, æмæ йæ цуры алы хатт дæр кæй уыдысты йæ хæлæрттæ æмæ æмтохгæнджытæ, æууæнкджын адæймæгтæ, кæцытæй алчи дæр у нацийы исад. Уыдон кæд бирæ нæ уыдысты, уæддæр уыдысты йæ цуры. Ам дæр, Дзæуджыхъæуы, Мæскуыйы æмæ, æгæрыстæмæй, Германы дæр уыд ирæттæ, кæцытæ æппæт дæр арæзтой, йæ идейæтæ йын размæ кæнынæн, зын минутты йын æвдыстой сæ фарсхæцынад. Уый тыххæй сæ æз дæн æгæрон бузныг. Абон мæ фæнды мадзалы организатортæ æмæ президентæн мæ фыды мысынады тыххæй бузныджы ныхæстæ зæгъын», – загъта Цоциты Аннæ.

Comments are closed, but trackbacks and pingbacks are open.