Фыдыбæстæ хъахъхъæнæджы бон куы æрбалæууы, уæд  нæ цæстытыл ауайынц нæ хæствæллад лæппутæ. Уыдон сæ удтыл æнæауæрдгæйæ тох кодтой знаджы ныхмæ æмæ сын лæвæрдтой аккаг ныхкъуырд. Алчидæр сæ хъахъхъæдта йæ райгуырæн зæхх. Хъæбатырдзинад, æхсардзинад æвдыстой кæддæриддæр. Уымæ гæсгæ сын мах уæлдай кад фæкæнæм Фыдыбæстæ хъахъхъæнæджы боны. Уыцы нысанæн нæ горæты æмæ районты иумæйаг ахуырадон æмæ культурон уагдæтты бацæттæ кæнынц номарæн æмæ бæрæгбонон мадзæлттæ.

Иу ахæм мадзал бацæттæ кодтой Сатихъары библиотекæйы сæргълæууæг Æлборты Маринæ, Хелцуайы библиотекæйы сæргълæууæг Чысиаты Таня æмæ Хелцуайы культурæйы хæдзары къухдариуæггæнæг Лолоты Джульеттæ.

Мадзалмæ æрбахуыдтой хъæуы цæрджыты æмæ уыцы хæстон азты Хелцуа æмæ Сатихъары фæсивæдæй сæ хъæутæ чи хъахъхъæдтой, уыцы лæппутæй иу къорды – Дыгъуызты Никъала, Мераб, Геннади, Джыккайты Алик, Чысиаты Ростик, Алан, Вова æмæ Уырызмæгы.

Райдианы Сатихъары библиотекæйы сæргълæууæг Æлборты Маринæ зæрдыл æрлæууын  кодта 1774 азæй Ирыстон барвæндæй Уæрæсеимæ  куы баиу, уæдæй абоны онг ирон адæм намысджынæй кæй службæ кæнынц Уырысы æфсады. Иумæ хъахъхъæнынц сæ райгуырæн зæхх. Уыдоны фæрцы стæм хæдбар республикæ. Абон дæр нæ ирон лæппутæ Украинæйы зæххыл Уырысы æфсадимæ цæсгомджынæй æххæст кæнынц сæ хæс.

«Нæ фыдæлтæ хæстон рæстæджыты алы хатт дæр æвдыстой æхсардзинад, уæлахизы тыххæй никуы ауæрстой сæ удтыл. Уый ирдæй разынд Стыр Фыдыбæстæйон хæсты. Уæлахизы сæрвæлтау сæ сæр нывондæн æрхастой Ирыстоны мингай минæвæрттæ. Æмæ та нæ фæсивæды тох кæныны сæр куы бахъуыд ивгъуыд æнусы нæуæдзæм азты, сæ райгуырæн зæхх бахъахъхъæныны тыххæй, уæд дæр аккагæй дарддæр кодтой сæ кадджын фыдæлты хæстон традицитæ.

Махæй никуы ферох уыдзысты гуырдзиаг неформалтæ Ереды хъæуы удæгасæй цы 12 ирон сагсур лæппуйы баныгæдтой, Зары хъæды кæй фæцагътой, уыдон. Хелцуайы хъæуы зæронд лæджы цæстытæ куыд скъахтой, удæгасæй йе `нгуылдз кæмæн ралыг кодтой. Æппæт уыцы фыдбылызтæй та фервæзтыстæм нæ хæстон лæппутæ æмæ Уæрæсейы фæрцы», – загъта Маринæ æмæ Фыдыбæстæ хъахъхъæнджытæн йæ цæст бауарзта æппæт хæрзиуджытæ æмæ амонд, мауал сæ бахъæуæд æхсæнгарз райсыны сæр.

Уый фæстæ æмырæй алæууынæй  ссардтой 1989-2008 азты Хелцуа æмæ Сатихъары хъæутæй фæмардуæвæг лæппуты рухс ном.

Иумæйаг мадзал

Сатихъары хъæусоветы хистæр, Фыдыбæстæ хъахъхъæнæг Дыгъуызты Мераб æрдзырдта Дменис, Сатихъар æмæ Хелцуайы фæсивæды хъайтардзинад тынгдæр кæй рабæрæг гуырдзиаг-ирон хæсты рæстæджы. Сæ къухмæ æхсæнгарз райсгæйæ, мæлæтæн комкоммæ йæ цæстытæм кæсгæйæ, уыдон бахъахъхъæдтой сæ хъæутæ æмæ абон мах нæ цард дарддæр кæнæм. Украинæйы зæххыл чи службæ кæны æмæ нæ сæрибардзинады тыххæй хъæбатырæй чи фæмард сты, уыдоны дæр, нæ зæрдыл  дардзыстæм æмæ сын кад кæндзыстæм. Сымахæн та уæ абонæй, уæ сомбон рæсугъддæр уæд.

Мадзалы хайад райстой Сатихъары астæуккаг скъолайы ахуырдзаутæ. Уыдон сæ музыкæйы ахуыргæнæг Джыккайты Хаджумаримæ бацæттæ кодтой концертон программæ. Сæ зарджытæ баст уыдысты Фыдыбæстæ хъахъхъæнджытимæ. Аив бакастысты ацы темæйыл æмдзæвгæтæ.

Мадзалы азарыдысты æмæ æфсæддон зарджытæ сæххæст кодтой Сатихъар æмæ Хелцуайы библиотекæты сæргълæуджытæ æмæ культурæйы хæдзары къухдариуæггæнæг æмæ мадзал уымæй фæаивдæр.

              БЕСТАУТЫ Валя

Comments are closed, but trackbacks and pingbacks are open.