Ирыстоны номдзыд хъæбулы мысгæйæ

27-æм февралы 98 азы сæххæст уыдаид Ирыстоны номдзыд хъæбул, ирон литературæйы æрттиваг стъалы, стыр ахуыргонд, Стыр Фыдыбæстæйон хæсты активон хайадисæг, ССРЦ æмæ ГССР-ы Сæйраг советты депутат, ГССР æмæ РХИ-йы бирæ паддзахадон хорзæхты кавалер, академик æмæ йæ райгуырæн бæстæйы æцæг патриот, Джусойты Нафи Григорийы фыртыл.

Йæ адæммæ æмæ культурæмæ йе гæрон уарзондзинад, йе нæрынцой зонд, йæ куыстхъомдзинад æмæ йæ дæсныйадыл æнувыддзинад, уыимæ йæ æрдзон курдиат, уыдон ын радтой ирзонынады бæрзонд æмвæзадмæ схизыны фадат. Ахуыргонд цымыдис цæмæ кодта, уыдон æххæссыдысты ирон æвзаджы этимологийæ нырыккон ирон дзырдаивады проблемæты онг. Нафийыл куы дзурæм, уæд мах дзурæм стыр адæймагыл. Уымæн йæ лæггæдтæ зонады æгæрон сты. Йæ сисы бынæй рацыд 400 зонадон куыстæй фылдæр, уыдон нымæцы 25 егъау монографийы, ирон литературæйы ахуыргæнæн чингуытæ, публицистикæ, дзырдуæттæ. Уымæн йæ зонадон куыстытæ æмæ аивадон уацмыстæн сæ фылдæр тæлмац æрцыдысты дунейы бирæ æвзæгтæм. Иудзырдæй, уæзгæ хуынтæй хъæздыг кодта мадæлон æвзаг æмæ литературæ æмæ уый фидæны фæлтæртæн бафæзминаг æмæ кад кæныны нысан у. Нафийы чидæриддæр зыдта, йемæ чи ныхас кодта, уыдоны дисы æфтыдта йæ зонындзинæдтæй. Уыимæ иумæ уый уыд хуымæтæг æмæ æргомзæрдæ, йæ кæстæр коллегæтæн та кадджын æмæ хæлар зондамонæг. Нафи арæх цыдис газет «Хурзæрин»-ы редакцимæ куы йæ уацты фæдыл, куы та нæуи. Уымæ гæсгæ нæ редакцийы кусджытæн дæр уыд хорз зонгæ, кæддæриддæр кады бынаты.

Райгуырæн бæстæ стыр аргъ скодта Нафийы зонадон æмæ æхсæнадон архайдæн. 1984 азы уый ссис ССРЦ-йы «Кады нысаны» ордены аккаг. Ирзонынады йе стыр æнтыстыты тыххæй та йын лæвæрд æрцыд «Республикæ Хуссар Ирыстоны зонады сгуыхт архайæджы» кадджын ном. Хуссарирыстойнаг зонады йæ лæггæдтæ нымад кæй æрцыдысты, уый ма фæбæрæг, дыууæ хатты йын Х. Къостайы преми, афтæ преми «Нарты фæткъуы» лæвæрд кæй æрцыд, уымæй дæр.

Нафийæн йæ ацыд а-дунейæ махæн у стыр хъыгаг хъуыддаг, уымæн æмæ фесæфтам стыр æмæ куырыхон адæймаджы. Кæд ыл 92 азы цыдис, уæддæр ыл æгас Ирыстон тынг фæрыстис. Фæлæ хъысмæты раз ничи лæууы, æнусон дæр стæмтæ вæййынц æмæ йын нæ бон у æрмæст дæр рухс зæгъын. Нафи, рухсаг у æмæ рухс дзæнæты бад.

Нæ уацх.