Президент фембæлд «Кафт»-имæ
Куыд ма хъусын кодтам, афтæмæй нæ республикæйы хореографион скъола-студийы ансамбль «Кафт» хайад райста Самарæйы æхсæнадæмон фестиваль «Аивад – змæлды» æмæ ссис фестивалы уæлахиздзау. Президент Гаглойты Алан фембæлд ансамблы къухдариуæггæнджытæ æмæ кафджытимæ.
Фембæлды Президент раарфæ кодта ансамблæн æмæ загъта: «Ирыстоны ном бæрзонд сисгæйæ равдыстат, нæ культурæ кæй ис бæрзонд æмвæзадыл, æрхастат уæлахиз æмæ уæ сæрыстыр стæм. Арфæ уын кæнын æмæ мæ фæнды,цæмæй уын уа æнæниздзинад, цæрат сабыр арвы бын, уат кæддæриддæр мидбылхудгæ æмæ æххæст кæной уæ фæндтæ, – загъта Гаглойы фырт. Бынаты цас фæнды ма кусæм, уæддæр республикæйæн æддейæ иу равдыстæн ис фылдæр нысаниуæг нæ культурæйы размæцыды хъуыддаджы. Уæлдайдæр та æвзонг фæсивæд сæ арæхстдзинад ахæм æмвæзадыл куы равдисой, уæд уый дзурæг у, аивады фæдыздæхты нæ Ирыстонæн рæсугъд фидæн кæй уыдзæн». Президент банысан кодта, Четион Мая, Джиоты Къоста, æмæ Кæркуысты Аленæйы хайбавæрд ансамблы уæлахизмæ æмæ сын загъта бузныджы ныхæстæ.
Республикæйы Культурæйы министр Зæгъойты Радæ загъта ныртæккæйы зын дуджы аивад æмæ культурæйы размæцыды ахсджиагдзинады тыххæй æмæ уый дæр раарфæ кодта уæлахиздзаутæн. «Дунейы адæм цы уæззау фæлварæнтæ æвзарынц, уый хынцгæйæ, уæлдай зындæр у культурæйыл дзурын. Фæлæ нацийæн йæ культурæ у йæ цæсгом, йе стыр хæзна æмæ цыфæнды зындзинæдты дæр хъуамæ архайæм йæ размæ кæныныл. Ацы хъуыддаджы куыд республикæйы, афтæ бæстæйæн æддейæ дæр ахсджиаг куыст чи кæны, уыдонæй сæ иу у Четион Мая. Нæ республикæйы хореографион скъолайы куысты уавæртæ хуыздæрхъуаг сты, æмæ афтæмæй коллективы цæттæдзинад та ис бæрзонд æмвæзадыл. Уый у, сæйраджыдæр, Маяйы куысты фæстиуæг.
Фæнды ма мæ банысан кæнын, куыд Уæрæсейы, афтæ махмæ дæр кæй ис уæззау финансон уавæр, фæлæ уымæ нæ кæсгæйæ, нæ бæстæйы сæргълæууæг ссары æппæтдæр нæ культурæ раразмæ кæнынæн. Уымæн цæвиттон – Самарæйы фестивалы хайадист», – загъта Зæгъойты чызг.
Радæ ма куыд загъта, афтæмæй скъола-студийæн нæй сæрмагонд агъуыст. Æрæджы сын радтам горæты библиотекæйы иу хатæн сæ дарæс æфснайынæн. Кæфтытæ та бацæттæ кæнынц 2-æм астæуккаг скъолайы хатæнтæй сæ иуы. Æввахс рæстæджы ацы скъолайы иу хай ногарæзт æрцæудзæнис æмæ уым студийæн рахицæн кæндзысты бынат. «Фæлæ уый дæр уыдзæн рæстæгмæ, цалынмæ йæхи агъуыст фæзына, уæдмæ», – загъта Радæ.
Четион Мая радзырдта Самарæйы фестивалы хайад райсыны тыххæй: «Фыццаджыдæр бузныг зæгъæм Хуыгаты Ростислав æмæ ирон æхсæнады уæнгтæн ахæм рæдау фембæлды тыххæй. Фестивалы рæстæджы систой ирон тырыса æмæ уымæй дæр равдыстой сæ уарзондзинад æмæ иудзинад райгуырæн бæстæмæ. Уый фæстæ акодтой сывæллæтты æмæ сын фенын кодтой Самарæйы фенддаг бынæттæ.
Фестивалы хайад истой 30 коллективы, равдыстой дзы 160 номыры. Жюрийы уæнгты иумæйаг хъуыдымæ гæсгæ систæм Гран-прийы хицау æмæ дыууæ номинацийы – адæмон кафт æмæ балетмейстерон авторон кафты I-аг къæпхæны лауреаттæ. Фестиваль уагъд цыд Болгари, Уæрæсе æмæ Казахстаны æмгуыстадæй, ацы аз ма сæм æрбаиу сты Иугонд Арабаг Эмираттæ дæр. Ацы бæстæйы минæвæрттæн тынг фæцыд сæ зæрдæмæ нæ ралæуд æмæ нæ апрелы мæйы кæрон сæрмагондæй фæхуыдтой Дубаймæ, радон фестивалмæ», – радзырдта Четион.
Ансамблы коллектив дæр раарфæ кодтой, сæ гастролон балцы сын чи балæггад кодта, æппæт уыдонæн æмæ сæ бацæттæгæнджытæн.
Ансамблы скондæн, нæ горæты скъолаты – 9, 10, 11 кълæсты 28 ахуыргæнинæгтæн бæстæйы сæргълæууæг, бакодта зæрдылдарæн лæвæрттæ æмæ уый фæстæ систой коллективон нывтæ.
ХУЫГАТЫ Миленæ
Comments are closed, but trackbacks and pingbacks are open.