14-æм декабры РХИ-йы Культурæйы министрады цур Адæмон сфæлдыстады республикон центры хъæппæрисæй киноконцертон зал «Чермен»-ы уагъд æрцыд адæмон кафты 3-æм республикон фестиваль-конкурс «Ирон кафт», зæгъгæ, ахæм номимæ.
Фестиваль-конкурс «Ирон кафт»-ы хайад райстой куыд горæт Цхинвалы, афтæ нæ республикæйы районты сфæлдыстадон къордты минæвæрттæ, скъола-студиты ансамблтæ, хæдархайгæ коллективтæ. Коллективтæ адæмы рæгъмæ цы номыртæ рахастой, уымæй бæрæг уыдис, фестивалы программæ хъæздыг æмæ цымыдисон кæй уыдис, уый. Ирон националон кæфтытæй дарддæр ма дзы æххæст æрцыдысты абхазаг кæфтытæ дæр.
Конкурсы хайадисджыты профессионалондзинадæн аргъгæнæг уыдис компетентон жюри, кæцыйы сконды уыдысты РХИ-йы Культурæйы сгуыхт кусæг, Культурæйы министры хæдивæг Дзеранты Джульеттæ, Адæмон сфæлдыстады республикон центры директор Гуыцмæзты Эльзæ, Уæрæсейы Федераци æмæ Цæгат Ирыстон-Аланийы сгуыхт артист Булацаты Таймураз æмæ æндæртæ. Конкурсы хайадисджытæ фестивалы сæ арæхстдзинад æмæ профессионалондзинад цы кæфтытæй æвдыстой, уыдон уыдысты «Зилгæ кафт» æмæ «Чызджыты кафт».
«Ирон кафт»-ы фестиваль ауадзынæн цы егъау нысаниуæг ис æмæ Хуссар Ирыстоны фæсивæды цæуыл ахуыр кæнынц, æппæт уыдæтты фæдыл йæ раныхасы банысан кодта Дзеранты Джульеттæ. «Ацы фестиваль-конкурс уагъд æрцыдис цалдæр хатты æмæ йын ис стыр нысаниуæг. Ахæм мадзæлтты руаджы мах нæ фæсивæдæн дæттæм монон æмæ хæрзæгъдауон хъомылад », – банысан кодта жюрийы уæнг. Уый ма загъта, зæгъгæ, азæй азмæ хуыздæр кæны æрыгон кафджыты цæттæдзинад æмæ арæхстдзинад.
Хуссар Ирыстоны Культурæйы министрады цур Адæмон сфæлдыстады республикон центры директор Гуыцмæзты Эльзæ жюрийы уынаффæйы фæстæ конкурсæн сарæзта хатдзæгтæ æмæ банысан кодта, мадзал ауадзыны хъуыддагæн хъомыладон нысаниуæг кæй ис æмæ националон кæфтыты кæй хъæуы популяризаци кæнын. Центры директор фестивалы æппæт хайадисджытæн дæр загъта бузныджы ныхæстæ активон хайад кæй фæисынц конкурсы, афтæ ма сын ирон кафтмæ кæй ис аудгæ ахаст æмæ уарзондзинад.
Жюрийы уæнгты уынаффæмæ гæсгæ сфæлдыстадон коллективтæй конкурсы фыццаг бынат лæвæрд æрцыд Цхинвалы районы Дменисы хъæуы клубы сфæлдыстадон коллективæн. Скъола-студиты æхсæн та уæлахиздзаутæ систы ансамбль «Ирон» æмæ Сывæллæтты сфæлдыстады галуаны коллектив. Уæлахиздзаутæ дæр æмæ конкурсы хайадисджытæ дæр хорзæхджын æрцыдысты дипломтæй, бакодтой сын зæрдылдарæн лæвæрттæ дæр.
Цхуырбаты Ларисæ
Comments are closed, but trackbacks and pingbacks are open.