ИРОН ЧЫЗГ – МÆСКУЫЙЫ ИУУЫЛ РÆСУГЪДДÆР ЧЫЗГ

Конкурс «Мисс Москва – 2021»-ы хайад райстой, 18- аздзыдæй 32 азы онг кæуыл цæуы, Мæскуыйы иууыл рæсугъддæр чызджытæ. Корона райсыныл тох кодтой 34 рæсугъд чызджы, кæцытæй бирæтæн ныридæгæн ис титултæ, архайынц хисæрмагонд бизнесы рæзтыл. Конкурс уагъта «Мисс Москва-2015» Оксана Воеводина. Уый конкурсы хайадисджытæн радта ахсджиаг уынаффæ. «Æз нымайын афтæ, æмæ мын столицæйы конкурсы мæ уæлахиз тынг баххуыс æмæ ахызтæн бирæ ныхдурты сæрты. Мæ зæрдæ зæгъы æппæт чызджытæн дæр æнтыстытæ. Уæ зæрдыл дарут, рæсугъддзинады конкурсы сæйраг уæлахиз кæй нæу, уый. Сæйраг у аккаг адæймаг уæвын», – загъта Малайзийы королы раздæры цардæмбал.

Ивгъуыд аз мадзал уагъд æрцыд digital-форматы. Ныр та конкурс уагъд æрцыд Et Cetera-йы театры. Конкурсанткæтæ хъуамæ равдыстаиккой æрмæст æддаг бакасты бæрæггæнæнтæ нæ, фæлæ курдиат æмæ эрудици дæр. Уыдон æххæст кодтой сæ зарджытæ, кафыдысты, дзуаппытæ лæвæрдтой космикон фадыджы тыххæй фарстытæн. Фарстой, зæгъгæ, легендарон атахты размæ Юрий Гагарин цы ныхас загъта, цал хатты æрзылд Зæххы алыварс фыццаг космонавт, кæцы планетæ у иууыл стырдæр, Марсы адæймаг уыд æви нæ, уыдæтты тыххæй.

Конкурсы сæйраг титул райста ирон чызг Саламты Аля. Уæлахиздзау куыд загъта, афтæмæй уый хæрзæвзонгæй фæндыд ахæм конкурсы хайад райсын æмæ фæуæлахиз уæвын. «Ис мын хистæр хо æмæ æз чысыл куы уыдтæн, уæд федтон, уый йæхи куыд цæттæ кодта æмæ рæсугъд къабатæ куыд кодта, уый. Æз мæхицæн аскъуыддзаг кодтон, зæгъын, куы сыстыр уон, уæд æнæмæнгæй хайад райсдзынæн конкурсы. Цæмæй хорз формæйы уон, уый тыххæй архайын джампинг-фитнесæй», – загъта Саламты чызг. Уый размæ та рамбылдта «Мисс Рублевская красавица»-йы конкурсы. Чызг фæнд кæны уæлдæр ахуырад райсын, бьюти-индустрийы бизнес саразын æмæ балцыты цæуын. Ныр Аля йæхи цæттæ кæндзæн æндæр масштабон цаутæм. «Ныр мæ фæнды конкурс «Краса России»-йы хайад райсын. Фæнды мæ уым дæр рамбулын. Уый фæстæ уыдзæн «Мисс Вселенная». Ноджы ма мæ фæнды англисаг æвзаг сахуыр кæнын», – банысан кодта Саламты чызг. Уый загъта, зæгъгæ, сæрыстырæй хæсдзæн йæ титул. Дыууæ азы размæ Аля Мæскуымæ æрцыд Сахалинæй. Саламты чызг Ирыстоны нæ цæры, уæддæр йæ ирон уидæгты тыххæй никуы рох кæны.

Рæсугъддзинады конкурс «Мисс Москва-2021» уагъд æрцыд 30 июны. Конкурсы æрвылазон партнер у «Комсомольская правда». Ацы аз конкурсыл сæххæст 25 азы. Хъæлæсæппæрст цыд 26-30 июны, цыран хайад райстой 20 мин адæймагæй фылдæр.