Инспекцион азылд

22-æм июны Хицауады Сæрдар Хъуылымбегты Доменти сарæзта инспекцион азылд горæты арæзтцæуæг объекттыл, кæцытæ бахаудысты 2015-2017 азты Хуссар Ирыстоны социалон-экономикон рæзтæн ахъазгæнæг Инвестицион программæйы номхыгъдмæ. Йемæ ма уыд Архитектурæ, арæзтад æмæ цæрæнуатон-коммуналон хæдзарады министр Зæгъойты Эдуард.

Райдианы Хицауады Сæрдар æмæ йе ’мбæлццæттæ бацыдысты, операцион-хирургион корпус арæзт кæм цæуы, уырдæм. Ацы арæзтады тыххæй арæзтады сæйраг инженер Хъантиаты Таймураз куыд загъта, афтæмæй графикæй иу чысыл зайынц фæсте, боныгъæдты аххосæй. Сывæллæтты реабилитацион центры арæзтадмæ дæр бацыдысты Хицауады Сæрдар æмæ Арæзтады министр. Объекты ныртæккæ кæнынц бæстонгæнæн куыстытæ, аразынц инженерон системæтæ. Ацы реабилитацион центр арæзт цæуы 60 рынчынæн. Уыдзæн дзы хистæр æмæ кæстæр кары сывæллæтты хайадтæ, хирургион хайад, рентгены кабинет, медицинон реабилитацион центр, спортивон зал, ленкгæнæн бассейн. Объект эксплуатацимæ хъуамæ лæвæрд æрцæуа ацы аз. Арæзтады инженер куыд зæгъы, афтæмæй арæзтадæн йæ 70 проценты ныридæгæн фæуд у. Абоны бон арæзтады кусы 80 кусæджы бæрц.

Архитектурæ, арæзтад æмæ цæрæнуатон-коммуналон хæдзарады министр Зæгъойты Эдуард куыд загъта, афтæмæй: «Ацы объекты арæзтады тыххæй махмæ ницы уайдзæфтæ ис, уымæн æмæ куыст цæуы гъæдджынæй».

Уый фæстæ Хицауады Сæрдар азылд, Инвестпрограммæйы фæлгæтты нæ горæты хæрзарæзт цы 11 уынджы æрцæудзæн, уыдоныл: Дзадтиайы фырты уынг, Хуыбылты Валерийы, Интернационалон, Гаглойты Владимиры, Хетæгкаты Къостайы, Горькийы, Тугъанты Махарбеджы, Кобылты Сергейы æмæ Сталины уынджы иу хай, Абайты Васойы уынгæй Пушкины уынджы онг. Ныридæгæн уыдонæй æхсæз уынг цæттæ сты. Хъуылымбегты Доменти æмæ Зæгъойты Эдуард бабæрæг кодтой, хæрзарæзт цы уынгтæ цæуынц, уыдон. Ацы уынгты ивынц зæххыбын коммуникацитæ, уыдон арæзт цæуынц капиталонæй, раздæрау, хайгай нæ, фæлæ. Хæрзарæзт цæуынц тротуартæ. Тротуарты кæрæтты æвæрд цæуынц бордюртæ. Иуæй-иу уынгтæ ныридæгæн цæттæ сты асфальт кæнынмæ. Уынгтæй хæрзарæзт чи фæци, уыдонæй иуæй-иутæ æрцыдысты цъæхвæлыст алыгъуызон декоративон дидинджытæй, газонтыл та байтыдтой кæрдæг.

Уый фæстæ Хицауады Сæрдар бабæрæг кодта Хетæгкаты Къостайы номыл паддзахадон драмон театры бæстыхайы арæзтад дæр. Ацы арæзтады директор Айрат Мусин куыд загъта, афтæмæй: «Куыстытæн фестæм сæ 70 проценты.

 

 

Сценæйы бынмæ æфсæнконструкцитæ монтаж кæныны фæдыл куыстытæ дæр кæронмæ фæхæццæ кæнынц. Уыдон куы фæуæм, уæд монтаж райдайдзыстæм сценæйон ифтонггæрзтæ».

Арæзтадон фирмæ «Эверест»-ы директор Айрат Мусин ма куыд загъта, афтæмæй арæзтады кусы 120 бынæттон кусæджы, инженерон-техникон кусджыты куынæ банымайæм, уæд.

Ацы культурон уагдоны иумæйаг фæзуат у 8700 квадратон метры. Фойе æмæ кæсæн зал фæлыст æрцæудзысты национ колоритмæ гæсгæ. Кæсæн залы уыдзæн 500 бынаты. Актерты коллективæн уыдзæн комфортон уавæртæ сфæлдыстадон куыст кæнынæн. Бæстыхайæ дарддæр хæрзарæзт æрцæудзæн йæ алыварс территори дæр.

Хицауады Сæрдар æркаст æмæ базонгæ ис техникон хъусдарды фиппаинæгты журналимæ дæр.

Дарддæр Хицауады Сæрдар бацыд Æрыгон техникты бæстыхаймæ. Ацы бæстыхай хъыгдард баййæфта хæсты рæстæджы. Ам ныртæккæ цæуы капиталон цалцæггæнæн куыстытæ. Ракалдтой йын йæ къулты зæронд сæрстытæ, кæнынц дзы агъуындæн куыстытæ æмæ та тагъд рæстæджы уый дæр арæзт фæуыдзæн. Ацы станцы уыдзæн æппæт уавæртæ, цы кружоктæ дзы архайынц, уыдонæн.

Ацы арæзтадон фирмæ «Золотое сечение»-йы прораб Сиукъаты Ауызби куыд зæгъы, афтæмæй Æрыгон техникты бæстыхай эксплуатацимæ лæвæрд æрцæудзæн 2016 азы октябры мæйы.

Хъуылымбегты Доменти йæ инспекцион азылды рæстæджы бабæрæг кодта Тыбылты Алыксандры номыл паддзахадон университеты комплексы арæзтад.. Ам арæзт æрцæудзæн цыппаруæладзыгон ахуыргæнæн бæстыхай, универсалон спортивон зал, культурон-административон комплекс. Уыдзæн дзы актон зал, телестуди, музей, чиныгкæсæн зал, библиотекæ. Объекты арæзтадыл бахардз уыдзæн 650 милуан сомы. Университеты арæзтад йæ проектмæ гæсгæ эксплуатацимæ лæвæрд æрцæудзæн 2017 азы сентябры мæймæ.

Хицауады Сæрдар ма бацыд æмæ йæхи цæстæй федта Цхинвалы дзулфыцæн комбинаты ног бæстыхайы арæзтад. Куыд зонæм, афтæмæй уый арæзт цæуы комбинаты территорийыл æмæ эксплуатацимæ лæвæрд хъуамæ æрцæуа ацы аз. Уым æвæрд æрцæудзысты ног ифтонггæрзтæ.

Арæзтадон куыстытæ цæуынц бирæпрофилон колледжы ахуыргæнæн æрмадзты бæстыхай дæр. Уырдæм дæр бацыд бæрæггæнæг Хъуылымбегты Доменти. Ам колледжы ахуыргæнæн корпус куы сырæза, уæд ифтонг æрцæудзæн æнæмæнгхъæуæг ифтонггæрзтæй æмæ зынгæ фæахъаз уыдзæн нæ республикæйæн астæуккаг цæджы специалисттæ цæттæ кæнынæн.

Инспекцион азылды фæстæ Хицауады Сæрдар Хъуылымбегты Доменти журналисттимæ ныхасы æрдзырдта, инспекцион басгæрсты рæстæджы цы цухдзинæдтæ рафæлгъуыдта, уыдоныл. Уый куыд банысан кодта, афтæмæй «2015-2017 азтæн Инвестпрограммæйы фæлгæтты арæзтцæуæг объекттæ цахæм темптæй арæзт цæуынц, уымæ йæ хъус лæмбынæг дары нæ республикæйы хицауад. Цухдзинæдтæ цы арæзтадон фирмæтæ уадзой, уыдон ныхмæ ист цæудзæн æмбæлон мадзæлттæ», — загъта Хицауады Сæрдар.

УАЗÆГТЫ М.