Гуырдзыстоны æмбæстаджы мæлæты фæдыл Джиоты Мураты комментаритæ

Æрæджы нæ республикон соматикон рынчын-доны цы гуырдзиаг ахст æмбæстаг – Арчил Татунашвили фæзиан лæмæгъ зæрдæйы аххосагæй, уый активон хайадисæг уыд 2008 азы августы Хуссар Ирыстоны ныхмæ хæстон архайдтыты. Уымæй дарддæр уый æмгуыстад кодта Гуырдзыстоны спецслужбæтимæ æмæ цæттæ кодта ног диверсион акттæ нæ республикæйы территорийыл Уæрæсейы Федерацийы президентон æвзæрстыты хæдразмæ. Уыцы хъуыддаджы зæрдæхсайгæ кæй уыд, уымæ гæсгæ уыд нæ Паддзахадон æдасдзинады органты цæстдарды бын æмæ йæ архайдтыты тыххæй ахст æрцыд.

Ацы цауы фæдыл знон Постконфликтон фарстатæ бæстонкæныны фæдыл РХИ-йы Президенты æххæстбарджын Джиоты Мурат информацион фæрæзтæн чысыл брифинджы рæстæджы афтæ радзырдта:

– Гуырдзыстоны æмбæстаг Арчил Татунашвилийы мæлæты фæдыл арæнгæрон хъæу Ергнетмæ хæстæг уагъд æрцыд техникон фембæлд Гуырдзыстоны фарсы инициативæмæ гæсгæ. Кæй зæгъын æй хъæуы, мах мæсæллæйы ныхæстæ загътам фæмардуæвæджы бинонтæн. Фæлæ цæмæй ацы æмбæстаджы амæлæты фæдыл алыгъуызон хъуыдытæ ма уа, уый тыххæй мах бамбарын кодтам Гуырдзыстоны минæвæрттæн, уагъд кæй æрцыд экспертизæ йæ мæлæт сбæлвырд кæныны нысанæн. Цæмæй ноджы бæлвырддæр æрцæуа йæ мæлæты аххосаг, уый тыххæй ма уæлæмхас уагъд æрцыд хæдбар экспертизæ дæр. Йæ фæстиуджытæм æнхъæлмæ кæсæм æмæ уый фæстæ экспертизæимæ лæвæрд æрцæудзæн йæ мард буар гуырдзиаг фарсмæ. Хæдбар экспертизæ уымæн арæзт æрцыд, æмæ цæмæй, куыд ма йæ загътон, уымæ гæсгæ алыгъуызон хъуыдытæ ма уа æмæ цау политизаци ма цæуа. Æнæуый, лæмæгъ зæрдæйы аххосагмæ гæсгæ кæй амард, уый бæлвырд æрцыд развæлгъау басгæрстмæ гæсгæ дæр.

Джиоты Мураты ныхæстæм гæсгæ Хуссар Ирыстоны къухдариуæгадмæ уыд фарстытæ ацы æмбæстагмæ, фæлæ йæ æнæнхъæлæджы мæлæтæй фадат нал фæцис йæ бафæрсын. Хуссар Ирыстон æмæ Гуырдзыстонæн æнæуый дæр вазыгджын ахастытæ ис æмæ ацы цау ноджы æвзæрырдæм цæмæй ма бандава уавæрыл, уый тыххæй дзырд цыд ацы техникон фембæлды рæстæджы. Гуырдзыстоны минæвæртты цымыдис кодта Татунашвилиимæ ма цы дыууæ гуырдзиаг æмбæстаджы ахст æрцыд, уыдон хъысмæт. Уыдон нырма сты Ленингоры районы. Бæрæг фæдагурæн мадзæлтты фæстæ уыдонæн фадат уыдзæн сæ хæдзæрттæм ацæуынæн.

Бæрæг куыд у, уымæ гæсгæ Гуырдзыстон ацы цауы фæдыл бахатыдысты дунеон æмæхсæнадмæ, Евроцæдисмæ, ЕÆÆО-мæ, Женевæйы дискусситæм. Сæ хъуыдытæ загътой мисситы минæвæрттæ, фæлæ сæ фæндиаг иу у, цæмæй объективон фæдысгарæн мадзæлттæ уагъд æрцæуа æмæ йын вазыгджын фæстиуджытæ ма уа.

Арчил Татунашвилийæн йæ нана цæры Ленингоры æмæ арæх цыд уырдæм. Йемæ цы дыууæ гуырдзиаг æмбæстаджы æрцыд ахст, уыдонæн дæр уыд уадзæн пункт «Раздæхæн»- ыл фæхуымæтæггонд хуызы арæныл хизыны бары гæххæттытæ. Гуырдзиаг информацион фæрæзтæ куыд фыссынц, уымæ гæсгæ Татунашвили архайдта базарады хъуыддаджы – уæй кодта дыргътæ.

Къæбулты Марина