Советон Цæдисы Хъайтар Хъоцыты Къостайы номыл Цхинвалы 2-æм гвардион скъола æрæмбырд кодта гуманитарон æххуыс, сæрмагонд æфсæддон операцийы хайад чи исынц, уыцы æфсæддон службæгæнджытæн. Уый у ацы скъолайы æртыккаг гуманитарон æххуыс æфсæддон службæгæнджытæн.
«РЕС»-æн скъолайы директор Ольга Михайлиди куыд радзырдта, афтæмæй ахуыргæнджытæ ныййарджытæ æмæ сывæллæттимæ иумæ æрæмбырд кодтой æхцайы фæрæзтæ, кæцытæй балхæдтой, хæстонты иууыл тынгдæр чи хъæуынц, ахæм дзаумæттæ.
«Мах æрæмбырд кодтам 200 мин сомы. Ацы фæрæзтæй балхæдтам акъоппыты, блиндажты иууыл тынгдæр чи хъæуынц, ахæм дзаумæттæ – резинæ дзабыртæ, хъарм мидæггæгтæ, карематтæ, æрмкъухтæ снайпертæн, хъарм æфсæддон цъындатæ, газæй чысыл баллонтæ, фонартæн батарейкæтæ», – загъта Михайлиди.
Уый ма йæ ныхасмæ бафтыдта, зæгъгæ, сывæллæттæ хæстонтæм ныффыстой фыстæджытæ æмæ открыткæтæ æмæ сæ Хъахъхъæнæг зæды иконæтимæ нывæрдтой алы æрвитæггаджы дæр.
Директор ма куыд загъта, афтæмæй оргкомитет, кæцыйы сконды сты ахуыргæнджытæ, ныййарджытæ æмæ хистæркъласонтæ, батыхтой æрвитæггæгты. Знон уыдоны райста республикæйы президенты æххуысгæнæг, цæмæй сæ дарддæр арвита сæрмагонд æфсæддон операцийы хайадисджытæн.
Comments are closed, but trackbacks and pingbacks are open.