Нæ горæты мидхъуыддæгты управленийы æнахъомты хъуыддæгты фæдыл хайады инспектортæ нæ республикæйы хъахъхъæнынады министрады кусджытимæ иумæ нæ горæты æххуысхъуаг бинонтæн хæлцадон продукттæй баххуыс кодтой ацы бонты. Кæй зæгъын æй, хъæуы, ацы категоримæ цы бинонтæ хауынц, уыдонæн ацы æххуыс стыр æххуысыл нымад цæуы. Уымæн æмæ ныртæккæйы зын рæстæджы, уæлдайдæр дын æнахъом сывæллæттæ куы уа, уæд сæ хъомыл кæнын æмæ сæ сæ къахыл слæууын кæнын зын у.
Нæ горæты мидхъуыддæгты уп-равленийы æнахъомты хъуыддæгты фæдыл хайады инспектортæ, йæ сæргълæууæг булкъон Гатайты Лалийы æххуысæй ахæм æххуыс фыццаг хатт нæ кæнынц. Ацы хайады кусджытæ æввахс зонгæ сты, нæ горæты хыгъды цы æвддæс æххуысхъуаг бинонтæ лæууы, уыдоны цардуагимæ. Уымæ гæсгæ сæ бон куыд у, афтæ сæм сæ хъус дарынц, рæстæгæйрæстæгмæ сæм се ’ххуысы къух фæдаргъ кæнынц. Гатайты Лали куыд загъта, афтæмæй, уыдонæн куыддæр фадат фæзыны, афтæ сын баххуыс кæнынц. «Кæй зæгън æй хъæуы, мидхъуыддæгты министрад хæрзаудæн организаци нæу, фæлæ уымæ нæ кæсгæйæ нæ хайады кусджытæ ацы категоримæ хауæг æмбæстæгтæн канд хæлцадон продукттæй нæ баххуыс кæны, фæлæ ма сæ фарсмæ балæууæм æмæ семæ кæнæм профилактикон куыст дæр. Сæ проблемæтимæ сын, кæй зæгъын æй хъæуы, зонгæ стæм, æмæ нæ бон куыд вæййы афтæ сын баххуыс кæнæм»-банысан кодта Гатайты Лали.
Ацы хæрзаудæн куыст милицийы кусджытæ кæнынц иумæ, сæхи сæрмагонд æхцайы фæрæзтæй. Уыимæ иумæ ма не ’мбæстæгты ’хсæн ис ахæмтæ дæр, кæцытæ уазал цæстæй нæ кæсынц æххуысхъуаг бинонтæм. Уыцы адæймæгты ’хсæн сты, куыд дзаумæтты магазинты, афтæ хæлцадон продуктты магазинты хицæуттæ дæр. Уыдонæн сæ бон куыд вæййы, афтæ баххуыс кæнынц куыд хæлцадон продукттæй, афтæ уæлæдарæсæй дæр. Уæлдай æххуыс бакæнынц бæрæгбонты рæстæджы, зæгъæм, ног азы агъоммæ”, — загъта Гатайты чызг.
Ныры зын дуджы æххуысхъуаг бинонтæн баххуыс кæнын, адæймагдзинадыл нымад цæуы. Уымæн æмæ ныртæккæ акалинаг никæмæн ницы ис, фæлæ ирон адæм кæддæриддæр хæларзæрдæ адæмыл нымад цыдысты æмæ дарддæр дæр нæ сафынц сæ ирондзинад.
Гатайты чызг нын куыд фехъусын кодта, афтæмæй æххуысхъуаг бинонтыл нымад чи цæуы, уыдонæн нæ Хицауады фарсæрдыгæй дæр, закъон куыд домы, уымæ гæсгæ цæуы социалон æххуыс дæр.
Æххуысхъуаг бинонтæн ацы бонты цы æххуыс æрцыд, уыцы хъуыдыйы инициатор уыд нæ республикæйы Хъахъхъæнынады министры хæстæ æххæстгæнæг Пухаты Владимир.
— Мæнмæ æрбахатыд нæ республикæйы мидхъуыддæгты министры хæстæ æххæстгæнæг Пухаты Владимир, уыимæ аныхасгæнгæйæ, бамбæрстон, кæй йæ фæнды, нæ горæты цы æххуысхъуаг бинонтæ ис, уыдонæн хæлцадон продукттæй баххуыс кæнын. Ацы хъуыдыйыл æз сæмбæлдтæн тынг æхсызгонæй, нæхимæ дæр ма уыд цъус ’хцайы фæрæзтæ, кæрæдзимæ сæ баиу кодтам æмæ балхæдтам дæс бинонты фаг хæлцадон продукттæ. Хыгъды нæм лæууы æвддæс бинонтæ. Фæлæ равзæрстам иууыл тынгдæр æххуыс цы бинонтæ домынц, уыдоны. Фæсидтыстæм сæм бынатмæ æмæ сын сæ байуæрстам. Кæй зæгъын æй хъæуы, уый егъау æххуыс нæу, фæлæ сын рæстæгмæ сæ къух фæрог кодтам.
Гатайты Лали ма нын куыд фехъусын кодта, афтæмæй уыдонмæ æххуысы фæдыл æрмæст хыгъды чи лæууы, ахæмтæ не ’рбахатынц, фæлæ ма хуымæтæг æмбæстæгтæ дæр. Уымæн æмæ ныртæккæйы царды алкæмæн уыцы фадæттæ нæй, сæ къух сæ нæ амоны, уы-мæйдæр ма дын цалдæр сывæллоны куы уа, уæд. Уыдон ма фæнд кæнынц ног ахуыры азмæ сын баххуыс кæнын дæр. Ацы къахдзæф, гæнæн ис, æмæ нæ горæты цæрджытæй бирæтæ райсой, куыд хи æппæлын, афтæ. Уый алкæмæн дæр йæхи бар у. Фæлæ ацы управленийы инспектортæ, афтæ ма ацы хъуыддаджы хайад чи райсы, уыдон ацы хæрзиуæгон хъуыддаг æнхъæлцау нæ аразынц, фæлæ йæ аразынц сыгъдæг зæрдæйæ æмæ сын æнтысгæ дæр кæны.
Бикойты Аннæ у æвзонг сылгоймаг, иунæгæй хъомыл кæны цыппар æнахъом сывæллоны. Ныры тыхст рæстæджы зын у иунæг сылгоймагæн цыппар сывæллоны хъомыл кæнын. Уымæ гæсгæ Аннæйæн æхсызгон вæййы ахæм æххуысы къух æм куы фæдаргъ кæнынц, уæд. Йæ ныхæстæм гæсгæ, æххуысы хуызы уый канд хæлцадон продукттæ нæ райсы, фæлæ ма райсы дзаумæттæ йæ сабитæн. Аннæ нын куыд загъта, афтæмæй ахæм æххуыс уый райсы арæх. Уый арфæ кæны æххуысы къух æм чи фæдаргъ кæны, уыдонæн.
Нæ горæты æххуысхъуаг бинонтæм хауынц Бесаты Анарайы бинонтæ дæр. Анара дæр у æртæ æнахъом сывæллоны ныййарæг. Кæд йæ фарсмæ цардæмбал ис, уæддæр не ’ххæссынц сæ кæстæрты сæхи фæрæзтæй хъомыл кæныныл. Уымæн æмæ Анарæйæн йе ’нæниздзинадимæ проблемæтæ кæй ис, уымæ гæсгæ никуы кусы, исы бынæттон социалон пенси. Йæ цардыæмбал кусы, фæлæ ныртæккæ алцыдæр зынаргъ у æмæ сæхи бон нæу сæхи фæрæзтæй сæхи дарын уымæ гæсгæ ахæм æххуыс уыдон нымайынц егъауыл, æмæ йын стыр аргъ кæнынц.
Гатайты Лалийы ныхæстæм гæсгæ, уыдон, хъахъхъæнынады министрадимæ иумæ, дарддæр дæр æххуыс кæндзысты нæ горæты æххуысхъуаг бинонтæн.
ТАНДЕЛАТЫ Виленæ
Comments are closed, but trackbacks and pingbacks are open.