Зæххы къорийы иууыл дæргъвæтиндæр æмæ тугкалæндæр хæсты стыр сгуыхтдзинæдтæ равдыстой Ирыстоны цæхæрцæст фырттæ æмæ чызджытæ дæр. Хæстон азты йæ хъайтардзинæдты тыххæй йæхицæн æмæ йæ радтæг Ирыстонæн стыр кад чи скодта, уыдонæй иу уыд Дзауы районы Гуфтайы хъæуккаг Джиоты Серги Цопаны фырт.

Уый райгуырд 1908 азы 20-æм февралы Гуфтайы хъæуы. 6-аздзыдæй райдыдта фыййау цæуын, 12-аздзыдæй та æххуырсты цыд сыхаг хæххон хъæуты хъæздыг цæрджытæм.  Сергийы кæд тынг фæндыд ахуыр кæнын, уæддæр ын ликбезтæм бацæуын бантыст æрмæстдæр 17-аздзыдæй. Уым бацыд Фæскомцæдисы рæнхъытæм дæр. 1929 азы кусæгон фæсивæдон скъола каст фæуыны фæстæ ацыд Мæскуымæ. 1930-1933 азты ахуыр кодта кусæгон факультеты (рабфак). Уый фæстæ службæ кодта Сырх Æфсады рæнхъыты. Демобилизацийы фæстæ Серги бацыд Советон Цæдисы Прокуратурæйы институты юридикон факультетмæ. Уым раззагон студенты райстой Коммунистон партийы рæнхъытæм. 1937 азы партион органты мобилизацимæ гæсгæ Джиоты Серги æрвыст æрцыд Паддзахадон æдасдзинады органтæм. Цыбыр рæстæгмæ æвзонг контрразвæдсгарæг слæууыд Советон Цæдисы Паддзахадон æдасдзинады Адæмон къамисариаты централон аппараты хайады сæргъ. Уæд райдыдта æвзонг ирон развæдсгарæджы вазыгджын, фæлæ легендарон цард. Сергийы кадджын цардвæндаджы тыххæй радзурæн нæй иу уацы, фæлæ газеткæсджыты рæгъмæ хæссæм йæ царды хицæн эпизодтæ.

1941 аз ноябрь… Немыцаг фашисттæ бырсынц Мæскуымæ. Гитлеры фæнд уыд 7-æм ноябры Сырх Фæзуаты Вермахты æфсæдты парад ауадзын. Немыцаг æфсæдтæ райстой парадон уæлæдарæс. Берлинæй æрцыдысты кинодокументалисттæ «Мæскуыйы басаст æмæ гитлерон æфсæдты парад»  сисыны тыххæй. 1941 азы 6-æм ноябры командæкæнынад Джиоты Сергимæ радта хонæн билет Мæскуыйы советы цытджын æмбырды хайад райсыны тыххæй. 19 сахаты æмæ 30 минут. Метро «Маяковская»-йы станцы æрæмбырд сты æрхонгæ адæм. Уыдоны цымыдис кодта иу фарст – Хицауадæй дзы чи уыдзæн? Æмæ мæнæ сындæггай æрбацыд поезд. Вагондæй рахызтысты Сталин, Молотов, Щербаков æмæ æндæр бæрнон адæймæгтæ. Мæскуыйы Советы сæрдар В.Пронин байгом кодта цытджын æмбырд æмæ ныхасы бар радта Сталинæн, кæцымæ иууылдæр хъуыстой стыр æхсызгонæй. Цытджын æмбырды фæстæ Джиоты Серги райста сусæг бардзырд: 7-æм ноябры уый хъуамæ Сырх фæзуатмæ ракæна паддзахадон æдасдзинады кусджыты батальоны æфсæддон парады хайад райсыны тыххæй.

1941 аз 7-æм ноябрь… Развæдсгарджыты къорд æрлæууыд, Сырх Фæзуаты районы сын цы бынат рахицæн кодтой, уым. Рæнхъæй ралæууыдысты æфсæдтæ, артиллери æмæ танктæ. Райсомы 8 сахатыл Мавзолейы трибунæмæ схызтысты Сталин æмæ Хицауады иннæ уæнгтæ. Уыцы рæстæджы Кремлы Спасскымæсыгы кулдурæттæй йæ дугъон бæхыл ратахт маршал Буденный æмæ æрæмбырдуæвджытæн арфæ ракодта Стыр Октябры бæрæгбоны цытæн. Сталин раныхас кодта парады хайадисæджыты раз. Райдыдта 1941 азы 7-æм ноябры легендарон парад. Парады алы хайадисæжы зæрдæ дæ йемыдзаг уыд циндзинад æмæ сæрыстырдзинады æнкъарæнтæй. Дыууæ боны размæ дæр ма хъуыды дæр ничи акодтаид парады тыххæй, фæлæ уагъд æрцыд. Парады кæрон Паддзахадон æдасдзинады кусджыты батальонтæй сæ иуы сæргъ цыд æвзонг афицер Джиоты Серги.

Стыр Фыдыбæстæйон хæсты рæстæг гуфтайаг чекистæн кæд хъæздыг уыд алыгъуызон нысаниуæгджын цаутæй, уæддæр ын дзы уыд уæлдай нысаниуæгджындæр бонтæ. 1941 азы 6-æм декабры Мæскуыйы уагъд æрцыд партийы горæтон комитеты пленум. Мæнæ цы фыссы уый тыххæй йæ мысинæгты Джиойы фырт: «Президиуммæ схызтысты бюройы уæнгтæ æмæ горкомы секретарь А.Щербаков. Алкæйы дæр цымыдис кæны иу фарст: Куыд сты хъуыддæгтæ фронты? Уый йæ раныхасы фехъусын кодта, зæгъгæ, советон æфсæдтæ размæ бырсынц, знаг фæстæмæ лæууы». Советон æфсæдты контрразмæбырст æмæ Мæскуыйы цур немыцæгты æххæст басаст дунейы райсайдта æцæг сенсаци. Стыхстысты йе ‘мцæдисонтæ дæр. Мæскуымæ тагъдыл æрцыд Англисы Фæсарæйнаг хъуыддæгты министр Энтони Иден. Бæрзонд уазæджы бафæндыд фронты хаххмæ ацæуын. Советон хицауад аскъуыддзаг кодта Идены немыцæгтæй ссæрибаргонд горæт Клинмæ акæнын. Джиоты Сергийæн бахæс кодтой Иденимæ фронты районы зонæмæ ацæуын: «Мах Клинмæ рацыдыстæм 15 декабры райсомæй. Уым ныл сæмбæлд инæлар Лелюшенко йæхæдæг. Мах федтам пырх горæт. Федтам уацайраг немыцæгты. Иден бафæлæврдта семæ аныхас кæнын, фæлæ йын уыдон иугъуызон дзуапп кодтой: «Гитлер капут!». Министрæн фенын кодтой советон æфсæдты дæр. Иууыл диссагдæр æм фæкастысты «Катюша»-йы æмæхстытæ. Хæст дарддæр цыд.

Советон адæмы царды стыр бынат бацахста 1942 азы 12-æм август. Мæскуымæ æртахт Уинстон Черчилль. Уыцы бон цæрæнбонтæм бахъуыды кодта Серги дæр, уымæн æмæ Мæскуыйы Черчиллыл чи сæмбæлд, уыдоны ‘хсæн уыд йæхæдæг дæр. Хæдтæхæг æрбадт. Черчилль рахызт æмæ йæ дыууæ æнгуылдзыл хæрдмæ схæцыд. Уый цы нысан кодта, уый тыххæй сын англисаг уацхæссæг Александр Верт сдзуапп кодта, зæгъгæ, уый у латинаг дамгъæйы ныв, кæцыйæ райдайы дзырд «Виктория» – «Уæлахиз», ома, Черчиллы зæрдæ уын зæгъы уæлахиз. Фембæлды церемонийы фæстæ В.Молотов Сергийы базонгæ кодта Черчилимæ, куыд йæ хъахъхъæнынады къамисар, афтæ: «Черчилль мæм лæмбынæг æрбакаст сæрæй къæхты бынмæ, мæ къух мын райста æмæ мын загъта, зæгъгæ, хæлæрттæ уыдзыстæм», – фыста йæ мысинæгты Серги.

Рацыдысты азтæ æмæ Уинстон Черчилль йæ мемуарты ныффыста Мæскуымæ йæ визиты, Сталин æмæ Молотовимæ йæ бадзырдты тыххæй. Йæ мысинæгты Черчилль нæ ферох кодта не ‘мзæххон Джиоты Сергийы дæр: «В мое распоряжение был представлен в качестве адъютанта огромный офицер, обладавший великолепной внешностью, скорее всего, он происходил из княжеского рода и являлся образцом культуры и вежливости». Фæлæ Черчилль кæцæй зыдта, Серги кæй уыд гуфтайаг хуымæтæджы зæхкусæг лæджы фырт æмæ хистæрæн кад кæнын та сахуыр йæ чысылæй фæстæмæ ирон æгъдаумæ гæсгæ. «Æртыккаг бон Черчилль æрбацыд Кремлмæ æмæ фембæлд Молотовимæ. Уыцы рæстæджы мæм фæдзырдтой Сталины кабинетмæ. Æз æй нæ зыдтон цæй тыххæй мæм дзурынц, уый, æмæ тыхстæн мæхимидæг. Кабинетмæ куы бахызтæн, уæд кусæгон стъолы фарсмæ ничи бадт, фæлæ йæ фарсмæ даргъ стъолы фарсмæ бадтысты Щербаков, Ворошилов æмæ ма ноджы цалдæр адæймаджы. Сталин уыцы рæстæджы дыууæрдæм рацу-бацу кодта кабинеты. Æз ын салам загътон. Уый мæ бафарста Черчилль йæхи куыд дары, уымæй. Æз ын сдзуапп кодтон, зæгъын, йæхи ныхъхъуынтыз кодта æмæ цъус ныхас кæны. Сталин сындæггай йæ уарзон лулæ галиу къухæй рахисмæ райста æмæ сфæлхатт кодта мæ ныхас: «Ныхъхъуынтыз кодта». Сталин мæм æдзынæг ныккаст æмæ мæ бафарста: «Вы осетин, с юга?». Æз ын сдзуапп кодтон: «О, æз Сталинирæй дæн». Ахъуыды кодтон, зæгъын ныртæккæ мемæ иронау дзурын райдайдзæн, фæлæ мæ уый бафарста уырыссагау: «Что означает название города Дзауджикау?». Æз ын сдзуапп кодтон, зæгъын, «Дзауджикау» конд у дыууæ дзырдæй: дзæуæг – путешественник, кау – село. Сталин мæм æрбакаст æмæ мын загъта: «Хорз, ацу».

Цымыдисон у Джиойы фырт ма Черчиллы тыххæй ноджы цы эпизод радзырдта уый дæр: «Перед посадкой в самолет Черчилль пожал мне руку на прощание, и его помощник записал мою фамилию. Спустя два месяца через народный комиссариат иностранных дел (НКИД) Черчилль прислал мне сувенир-футляр для спичечных коробков из блестящей стали с его автографом».

Банысан кæнын хъæуы уый дæр, æмæ-иу Джиоты Серги Хуссар Ирыстонмæ куы æрцыд, уæд-иу æнæмæнг амбæлд йæ хæлæрттæ Цхуырбаты Вахтанг, Бесаты Герсан, Санахъоты Уырызмæг, Задыты Нодар æмæ æндæртимæ. Уыдон дæр-иу æй суазæг кодтой ирон æгъдауæмæ гæсгæ.   Цымыдис-иу сæ кодта контрразвæдсгарæджы цымыдисон цардæй алцыдæр, уæлдайдæр та Тегераны конференцийы цаутæ.

Тегераны конференцийы рæстæджы советон минæварадмæ æрбацыд англисаг делегаци. Кулдуары цур лæууыдысты инæлартæ æмæ хистæр афицертæ, кæстæр цинтимæ та лæууыдысты фæстæдæр рæнхъы, уыдоны ‘хсæн уыд Джиоты Серги дæр. Джиойы фырты ауынгæйæ Черчилл, разæй цы инæлæрттæ лæууыдысты, уыдоны ‘хсæнты рахызт Сергимæ, йæ къух ын райста æмæ йæ базонгæ кодта, йемæ чи уыд, уыдонимæ. Тегераны  Джиойы фырты бахъуыд советон минæварады бæстыхайы  посты лæууын. Уый тыххæй йæ мысинæгты фыста: «Во время моего дежурства мимо меня проходили Сталин и Молотов. Сталин остановился и повернулся ко мне. Я отдал честь и вытянулся по стойке «смирно». Иосиф Виссаринович смотрел на меня и тепло улыбался. Улыбались глаза, улыбалось все лицо, казалось, улыбались даже усы. Я ждал какого-нибудь вопроса, но он все улыбался и смотрел на меня. Вдург правой рукой по-дружески толкнул меня в плечо и громко воскликнул: «Ирон!». Затем спокойно повернулся и направился в кабинет посла. Представьте мое состояние – глаза блестят, сердце бьется от радости… Генерал, командующий нашей охраной, наблюдавший эту сцену, подошел ко мне и с интересом спросил: «Что хозяин говорил?» Я решил похвастаться и с гордостью сказал: «По осетински о моем самочувствии спрашивал».

«Дыууæ боны фæстæ та лæууыдтæн посты.  Нæ цурты та рацыд Сталин Ворошиловимæ  ныхас кæнгæйæ. Сталины уындæй мæ зæрдæ бахъæлдзæг, фæлæ уыдон мæ фæрсты ахызтысты. Æвиппайды Иосиф Виссарионы фырт худгæйæ разылд ме ‘рдæм, йæ рахис къухыл схæцыд æмæ сдзырдта иу гуырдзиаг дзырд: «Осо» (Ирон)». Тегеранмæ йæ командировкæйы тыххæй ма Джиойы фырт радзырдта ноджы иу эпизоды тыххæй.  Сталин, Черчилль æмæ Рузвельты фембæлды размæ хъахъхъæныны къорд æрцыд цалдæр боны раздæр. Иу рæстæджы Тегераны уынгты тезгъо кæнгæйæ Сергийы хъусдард йæхимæ аздæхта уынгты циркачты къорд. Серги тынг уарзта цирк æмæ сæм цымыдисæй каст. Уæлдай тынгдæр йæ зæрдæмæ фæцыд национ костюмы фокустæвдисæг. Уый тынг цырд архайдта йæ рахис къухæй æмæ-иу алыгъуызон предметтæ цы фесты, уый-иу уынгæ дæр нал акодта. Серги цæрæнбонтæм бахъуыды кодта циркачы рахис къухы цæрдæг архайд.

Цалдæр боны фæстæ Джиойы фырт советон паддзахадон æдасдзинады службæйы къорды сконды уыд пресс-конференцийы англисаг делегацийы резиденцийы. Журналисттæ дзы уыд бирæ. Уыдонæн сæ къухты уыдысты фотоаппараттæ, микрофонтæ. Сергийы хъусдард йæхимæ аздæхта иу европæйаг журналист сау костюмты, кæцы цырд архайдта, йæ рахис къухы цы микрофон уыд, уымæй. Серги скатайгъуыз: «Зонгæ архайд, кæм федтаин рахис къухæй ацы цырд змæлд? Æмæ æвиппайды мæ зæрдыл æрлæууыд – уый ирайнаг уынгты циркач куы у».  Развæдсгарæджы зæрдæ йæм фехсайдта æмæ йæ командирæн фехъусын кодта журналисты тыххæй. Уыдон æм сæ хъус дарын райдыдтой.

Цалдæр боны фæстæ Мæскуыйы советон къорды хъахъхъæнынады къорды къухдариуæггæнæг Серги-йæн загъта: «А твой «фокусник» оказался важной птичкой». Рацыд æртæ мæйы. Джиойы фыртмæ фæдзырдта управленийы хистæр, уый йын бардзырд радта 15 сахатмæ англисаг минæварадмæ бацæуыны тыххæй. Минæварады йæ райстой уайтагъд. «Гос-подин Джиоев, – вежливо обратился посол, – хочу передать Вам личный подарок Уинстона Черчилля за Вашу бдительность и подвиг в Тегеране». Æвзонг развæдсгарæг уайтагъд среакци кодта. Хъуыддаг уый мидæг ис, æмæ Мæскуыйы дæр æмæ Тегераны дæр Серги оперативон хæслæвæрдтæ кæй æххæст кодта æндæр мыггаджы бын. Уый йын дзуапп радта: «Господин посол! Получить подарок от господина Уинстона Черчилля большая честь для советского человека. Но, я никогда не был в Тегеране. Я не могу принять этот дорогой подарок». «Господин Черчилль знает, кому делает подарок, – улыбаясь сказал посол. – Вы помогли разоблачить немецкого шпиона. Это личный подарок господина Черчиля». Фæлæ Джиойы фырт уæзданæй «нæ» загъта æмæ хъуыддаг ууыл фæцис.

Банысан кæнын хъæуы уый дæр, æмæ Джиоты Серги хайад кæй райста  1945 азы 24 июны Уæлахизы легендарон Парады. Ирон развæдсгарæг хорзæхджын уыд бирæ хорзæхтæй, уыдоны нымæцы  «За оборону Москвы», «За отвагу», «За победу над Германией в Великой Отечественной войне 1941-1945гг.» майдантæй. Хорзæхджын ма уыд «Красная Звезда»-йы орденæй, «За боевые заслуги»-йы майданæй. Банысан кæнын хъæуы уый дæр, æмæ Паддзахадон æдасдзинады органты 15 азы баслужбæ кæнгæйæ Серги лейтенанты чинæй кæй схызт булкъоны чины онг. 1949-1953 азты уый фæсаууонмæ каст фæци Коммунистон партийы Централон Комитеты цур Уæлдæр партион скъола. Кандидатон минимумы фæдыл фæлварæнтæ ратгæйæ, йæхи цæттæ кодта философийы дæсныйадыл кандидатон диссертаци бахъахъхъæнынмæ. Фæлæ 1953 азы марты мæйы амард И.Сталин. Бæстæйы партион организациты райдыдтой  Советон Цæдисы Коммунистон партийы Централон Комитеты фыстæджы æхгæд бакастытæ Сталины гоймаджы культы тыххæй. Ирон развæдсгарæгæн зын уыд, Сталины кæй æфхæрдтой, уый æмæ партион æмбырды карзæй раныхас кодта Централон комитеты æмæ сæрмагондæй Н.Хрущевы курсы ныхмæ. Уый тыххæй йæ арвыстой Паддзахадон æдасдзинады органтæй. Æрмæстдæр Хрущевы Коммунистон партийы Централон комитеты фыццаг секретары бынатæй куы ссæрибар кодтой, уый фæстæ среабилитаци кодтой Джиоты Сергийы службæйон æмæ партион документтæм гæсгæ. Фæлæ, æнæхъуаджы æфхæрд баййафæг адæймаджы удæн среабилитаци гæнæн нал вæййы. Стæй йыл азтæ дæр сæ уæззау фæд æруагътой. Уый нал хъуыды кодта карьерæ æмæ зонадон куыстыл. Фæндыд æй ныффыссын чиныг йæ вазыгджын, фæлæ романтикон царды тыххæй, фæлæ, хъыгагæн, йæ къухы нæ бафтыд. 1975 азы 10-æм апрелы йæ кусынæй æрлæууыд Джиоты Цопаны фырт Сергийы зæрдæ. Ныгæд æрцыд Мæскуыйы.

Гъе, ахæм уыд гуфтайаг хуымæтæджы лæппуйы цымыдисон цаутæй йемыдзаг цардвæндаг.

ДЖИОТЫ Екатеринæ

Comments are closed, but trackbacks and pingbacks are open.