Президент Бибылты Анатоли уыд Гергиты Валерийы къухдариуæгадæй Мариинаг театры симфонион оркестры концерты, кæцы уагъд æрцыд Дзæуджыхъæуы Паддзахадон филармонийы XX Мæскуыйаг Куадзæны фестивалы фæлгæтты.
Паддзахады сæргълæууæг бузныджы ныхæстæ загъта оркестры къухдариуæггæнджытæ æмæ музыканттæн сæ курдиаты тыххæй.
«Алкæмæндæр арфæ кæнын чырыстон бæрæгбон – Куадзæны боны цытæн, мæ цæст уын уарзы æнæниздзинад. Æмæ уын арфæ кæнын XX ахæм диссаджы юбилейон, куыд Куадзæны фестиваль Мариинаг театры симфонион оркестры хайадистæй. Æмæ уыцы диссаджы концерты тыххæй хъæуы бузныджы ныхæстæ зæгъын, кæй зæгъын æй хъæуы, Валери Абысалы фыртæн йæ бæрзонд курдиатджын коллективимæ», – загъта Бибылты Анатоли.
Уый ма бузныджы ныхæстæ загъта Гергиты Валерийæн 2008 азы Цхинвалы концерты тыххæй.
«Уый уыд фыццаг концерт Гуырдзыстоны сабырдзинадмæ æркæныны тыххæй операцийы фæстæ. Уый егъау моралон æххуыс уыд. Бузныджы ныхæстæ мæ фæнды зæгъын Хуссар Ирыстоны адæмы, мæхи номæй, æнæ уæлдай ныхæстæй, уыд æхсарджын æмæ хъайтарон къахдзæф. Махæн, æппæт Хуссар Ирыстонæн, уый уыд тынг ахсджиаг», – загъта Республикæ Хуссар Ирыстоны Президент.
Уый ма банысан кодта, зæгъгæ, Хуссар Ирыстоны, кæй зæгъын æй хъæуы, ноджы-дæр хъæуы концерт радтын. Уый æцæгæйдæр у бæлиццаг Хуссар Ирыстонæн.
Гергиты Валери банысан кодта, кæй ратдзæн концерт Хуссар Ирыстоны.
«Цалынмæ Хуссар Ирыстоны концерт раттæм, кæцы мах æнæмæнгæй сараздзыстæм, уæдмæ мæн фæнды зæгъын, кæй мæ нæ фæнды, цæмæй ахæм банысангонд концерттæ уагъд цæуой нæ царды, нæ сывæллæтты царды. Уымæн æмæ, уыцы концерт уыд стыр бæллæхæн, стыр трагедийæн дзуапп. Сымах, æвæццæгæн, хъуыды кæндзыстут, мах оркестримæ кæй уыдыстæм Сирийы, цыран куынæг æрцыд адæймагады цивилизацийы егъау цыртдзæвæн. Мæн нæ фæнды, цæмæй ахæм концерттæ уагъд цæуой, цæмæй уой ахæм аххосæгтæ, кæцыты фæдыл уагъд цæуой концерттæ», – загъта уый.
Оркестры коллективæн раарфæ кодта Республикæ Цæгат Ирыстон-Аланийы сæргълæууæджы хæстæ æххæстгæнæг Сергей Меняйло.
«Куадзæны фестиваль Цæгат Ирыстонæн у традицион, æнхъæлмæгæсгæ æмæ цинхæссæг бæрæгбон, республикæйы культурон царды нысанон цау. Махæн ахсджиаг у, Цæгатирыстойнаг паддзахадон академион филармони – Мариинаг театры филиал æндæр уæрæсейаг сценæты æмрæнхъ кæй исы ахæм авторитетон музыкалон лæвар. Стыр бузныг дын, Валери Абысалы фырт, де ‘мзæххонтæн ахæм диссаджы бæрæгбон кæй лæвар кæныс! Мах æнгом кæны рагон хæлардзинад æмæ æмгуыстад. Æхсызгон мын у, æппæт дæ хъуыдытæ æмæ плæнттæ кæй сæххæст сты нæ райгуырæн Ирыстоны», – загъта Сергей Меняйло.
Comments are closed, but trackbacks and pingbacks are open.