Мариинаг театры аивадон разамонæг Гергиты Валерийыл сæххæст 70 азы

Ӕрæджы Гергийы фырт  банысан кодта ноджы иу бæрæгбон – 45 азы размæ фыццаг хатт уыд Мариинаг театры дирижеры пульты. Йæ ныры юбилейыл сæмбæлд Петербурджы. 10 азы размæ 2 майы Мариинаг театры ног агъуысты байгомы цытæн уым уыдис гала-концерт. 

 Сабибонтæ

Гергиты Валери райгуырд  Мæскуыйы æмæ йæ царды фыццаг азтæ уым ацыдысты.

«Кæд нæ рæдийын, уæд Добрынины районы кæмдæр цардыстæм æххуырст фатеры, фæлæ  ницы хъуыды кæнын уыцы рæстæгæй», – зæгъы дирижер .

Йæ фыд Гергиты Абисал уыдис кадрон афицер. 1958 азы рацыд æфсадæй æмæ йæ бинонтимæ æрцардис Дзæуджыхъæуы (уыцы рæстæджы Орджоникидзе). Фи-дæны дирижер рæзт уым. Сывæллонæй уарзта футболæй хъазын.

– Мæ хъуыдытæ, мæ зæрдæ иууыл футболимæ баст уыдысты. Бон-изæрмæ иу пуртийæ хъазыдтæн. Пурти нæй, зæгъгæ, уæд та-иу консервы банкæ рантъæр-бантъæр кодтон. – мысы маэстро.

Музыкæмæ цымыдис кæнын райдыдта йæ мады фæрцы. Æнæ хыл, æнæ тыхмийæ ныййарæгæн бантыст йæ лæппуйы музыкæйыл бафтауын. Уыимæ ма растдæр уыцы рæстæг Дзæуджыхъæуы уыдысты Святослав Рихтер и Мстислав Ростроповичы гастролтæ. Сæ концертты уыдис Валери дæр.

– Уыдон куы федтон æмæ куы фехъуыстон, уæд бамбæрстон, цæрæнбонты кæй уыдзынæн музыкæимæ баст, – зæгъы Гергиты Валери.

 

Ахуыр Дзæуджыхъæуы

Гергиты Валери сахуыр кодта Чайковскийы номыл 1-æм музыкалон скъолайы, уый фæстæ та – музыкалон ахуыргæнæндон.

– Ӕнахуыр стыр амонд мæм æрхаудта мæ фыццаг ахуыргæнджытимæ. Лолаты Заремæ мын авдаздзыдæй райдыдта амонын  фортепианойыл цæгъдыны дæсныйад. 15 азы мыл куы сæххæст, уæд та Анатолий Брискин – Ленинграды консерваторийы фортепиано æмæ дирижеры факультетты рауагъдон – æмæ мæ уый райдыдта зонгæ кæнын дирижеры дæсныйады сусæгдзинæдтимæ, – зæгъы маэстро.

Йæ профессионалон карьерæйæн Брискинимæ сæмбæлд Валери нымайы хъысмæт бæлвырдгæнæг цауыл:

– Ацы адæймаджы фæрцы æмбарын райдыдтон  æмткæй музыкæйы æмæ йæ ахъаззаг хай – симфонион музыкæйы тых, – зæгъы Валери.

 

 Ленинграды

1972 азы Валери ссис Ленинграды консерваторийы студент. Дирижеры дæсныйад ын лæвæрдта профессор Илья Мусин. Брискин дæр уымæ ахуыр кодта. Мусины иннæ хъомылгæнинæгты æхсæн номхыгъды сты зындгонд музыканттæ –  Юрий Темирканов, Ялчин Адигезалов, Одиссей Димитриади, Джемал Далгат. 1976 азы, студент уæвгæйæ, Мæскуыйы дирижерты æппæтцæдисон IV конкурсы Гергиты Валери райста фыццаг преми, иннæ аз та сси Берлины Герберт фон Караяны фонды арæзт æвзонг дирижерты æхсæнадæмон конкурсы лауреат.

 

Кировы  театр

1977 азы консерваторийы рауагъдоны фæхуыдтой Ленинграды Кировы номыл Оперæ æмæ балеты паддзахадон академион театрмæ сæйраг дирижер æмæ аивадон разамонæджы ассистенты бынатмæ, ома, зындгонд стыр дирижер Юрий Темиркановы хæдивæгæй. Ацы театры Гергиты Валерийы дирижерон дебют сси 1978 азы 12 январы Сергей Прокофьевы оперæ “Война и мир»-ы спектакль. Уыцы аз ма йæ репертуары фæзындысты Прокофьевы балет “Ромео и Джульетта”, Чайковскийы оперæ “Мазепа” æмæ Джузеппе Вердийы оперæ “Трубадур”. 1981-1985 азты, музыкант, Ленинграды дарддæр кусгæйæ, Сомихы Паддзахадон симфонион оркестрæн разамонæг дæр уыдис.

1988 азы Гергиты Валерийы равзæрстой Кировы номыл театры музыкалон разамонæгæй. Театры сценæйыл Гергийы фырт композиторты юбилейты цытæн рай-дыдта уадзын стыр фестивалтæ: 1989 азы Мусоргскийы 150-азы, 1990 азы – Чайковскийы 150 азы, 1991 азы та Прокофьевы 100 азы фæдыл. XXI æнусы  ахæм фестивалтæ уадзын ссис традицион хъуыддаг.

Мариинаг театры симфонион оркестр Гергийы фырты разамынадæй æдзухдæр ног æмæ ног оперон æмæ балетон партитурæтæ æвзары, зынгæ хъæздыг кæны йæ симфонион репертуар. Зындгонд дирижеры сфæлдыстадон къæбицы сты – Брамс æмæ Бетховены  симфонитæ иууылдæр; Чайковский æмæ Шостакович, Прокофьев æмæ Сибелиус,  Берлиоз, Римский-Корсаков, Рахманинов, Стравинский, Мессиан, Щедрин, Уст-вольская,  Канчели  æмæ ма  бирæ æндæр алыхуызон композиторты уацмыс-тæ.

 

Мариинаг театр

1992 азы январы театрæн раздæхтой йæ историон ном – Мариинаг.

– Нырыккон Мариинаг театр æххæстбарджынæй нымад у Кировы номыл театры традициты фæдоныл. Советон дуджы æрмæст йæ ном Kirov ballet æнæхъæн дунейæн уыдис æххæстдзинады синоним, – зæрдыл æфтауын кæны  дирижер.

1996 азы Гергиты Абисалы фырт  Валери  ссис Мариинаг театры аивадон разамонæг æмæ директор. Афтæмæй къухдариуæг кæнын райдыдта театры оркестрæн, оперон æмæ балетон труппæтæн.

– Ӕбæрæг æмæ змæст 1990-æм азтæ  махæн дæр æнтыстджын разындысты. Театр æмæ труппæ бахъахъхъæныны сæраппонд  инстинктивон æгъдауæй бамбæрстон,  кæй дзы хъæуы Ватиканы хуызæн къаннæг паддзахад хи устав æмæ хи уагæвæрдимæ саразын. Куыд рабæрæг, афтæмæй æвзæр кризисон менеджер нæ уыдтæн, – мидбылхудгæйæ зæгъы дирижер.

Аивадон разамонæджы энерги æмæ организаторон курдиаты фæрцы 2006 азы Мариинаг театры байгом ис Концертон зал, 2013 азы дзы фæзындис дыккаг сценæ (Мариинаг-2). 2016 азы январы скуыста театры филиал Владивостокы «Приморская сцена», 2017 азы апрелы та байгом æмæ скуыста Дзæуджыхъæуы филиал. Уыимæ ма, 1998 азы арæзт æрцыд Ӕвзонг оперон зарæггæнджыты академи. Уым райдайæг вокалисттæ сæхи цæттæ кæ-нынц  стыр сценæйыл кусынмæ.

 

Куадзæны фестиваль

Гергиты Валери у бирæ алыхуызон фестивалты бындурæвæрæг æмæ раза-монæг. Ӕппæты зындгонддæр уыдонæй у  Ӕрвылазон Мæскуыйаг Куадзæны фестиваль. Фыццаг хатт уагъд æрцыд 2002 азы майы мæйы. Фæд-фæдылон æгъдауæй фестивалы географи уæрæхдæр кæнын райдыдта. Ныррыккон XXII цыт-джын мадзал райдыдта 16 апрелы. 9 майы, Стыр Уæлахизы боны йæ кæронбæттæн уыдзæн Мæскуыйы, Тверы, Казаны, Екатеринбурджы, Тюмены, Новосибирскы, Красноярскы æмæ ма бирæ æндæр уæрæсейаг горæтты.

 

 Дирижер профессийы тыххæй

Гергиты Валери зæгъы афтæ: «Мах хуыцæуттæ не стæм, мах стæм композиторы, оркестры, хъусæджы  фæсдзæуинтæ». Æмæ ма æрымысы профессор Мусины ныхæстæ: «Дирижиркæнын – зын у. Уæлдайдæр фыццаг æвдай азы».

Йæ юбилей маэстро банысан кодта Мариинаг-2-йы 10 азы цытæн арæзт гала-концертæй. Уыцы изæр театры сценæйыл зарыдысты æмæ инструменттыл цагътой Хибла Герзмава, Ильдар Абдразаков, Диана Вишнева, Денис Мацуев, Алексей Марков, Михаил Петренко æмæ æндæр зындгонд музыканттæ, афтæ ма Мариинаг театры хор æмæ симфонион оркестр.

P.S.  Уæрæсейы президент Владимир Путин музыканты схорзæхджын кодта «Фыдыбæстæйы раз басгуыхыны тыххæй» II къæпхæны орденæй. Сæ фембæлды рæстæджы Путин зæрдиаг арфæ ракодта Гергиты Валерийæн æмæ  йæ рахуыдта  раттæг Ирыстон æмæ æнæхъæн Уæрæсейы стыр патриот.

ДАМБЕГТИ Ирина

 

ГАГЛОЙТЫ АЛАН РААРФÆ КОДТА ГЕРГИТЫ ВАЛЕРИЙÆН ЙÆ 70-АЗОН ЮБИЛЕЙЫ ЦЫТÆН

Арфæйы фыстæджы дзырдæуы:

«Цытджын Валери Абысалы фырт!

Зæрдæбынæй дын арфæ кæнын дæ юбилейы цытæн.

Ды æрмæст бирæварсон курдиаты хицау нæ дæ, фæлæ  ма дæ æгæрон энергийы хицау, æдзухæй сфæлдыстадон агуырды чи ис, ахæм адæймаг. Дæ архайды аккаг хорзæх – нырыккон музыкалон аивадæн табугæнджытæ æмæ аргъгæнджыты уарзондзинад æмæ сæ бузныджы ахаст.

Дунеон музыкалон культурæмæ стыр хуынтæ кæй бахастай, Хуссар Ирыстоны дæ æрмæст уый тыххæй нæ уарзынц, фæлæ ма дæ уарзынц дæ æмбæстагон цæстæнгасы, Хуссар Ирыстоны адæмæн стыр фарсхæцынады тыххæй дæр. 2008 азы августы Цхинвалы центры концерт-реквием никуы ферох кæндзысты Хуссар Ирыстоны адæм. Хæсты хъизæмæрттæ чи бавзæрста, уыдоны зæрдæтæ байдзаг кодтай сабырдзинады æмæ сæрибар фидæны стыр ныфсæй.

Уырны мæ, дæ разы нырма бирæ сфæлдыстадон æнтыстытæ æмæ уæлахизтæ ис, де сфæлдыстадæн табугæнджытæм иузæрдиондзинад та дын баххуыс кæндзæн бирæ концертон программæтæ саразынæн.

Зынаргъ Маэстро, бар мын радт, дæ гуырæн бон дын зæрдиагæй раарфæ кæнон аивадæн дæ лæггæдты тыххæй æмæ дын зæгъон фидар æнæниздзинады æмæ сценæйон царды ирд уæлкурдиаты минутты фæндиæгтæ!»

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.