Хуссар Ирыстон мысыд 1920 азы 20 июны Гуырдзыстон ирон адæмæн цы геноцид сарæзта, уый амæттæгты. Сæдæ азы дæргъы националон бындурыл уыцы æнæадæймагадон фыдракæндты амæттæгтæ баисты мингай ирæттæ, сæдæ минæй фылдæр æбарвæндонæй фесæфтой сæ цæрæн бынæттæ… 

Гуырдзиаг меньшевикты къухæй 104 азы размæ цы 13 коммунары æрцыд мард, уыдон ном арыны цытæн 20 июны Згъудеры уæлмæрдмæ сæ иумиаг цырты размæ æрбацыдысты бæстæйы сæргълæууæг Гаглойты Алан, Хицауады æмæ Парламенты Сæрдæрттæ Джуссойты Константин æмæ Æлборты Алан, министрадтæ æмæ уагдæтты кусджытæ, æхсæнады минæвæрттæ.

Мадзалы хайадисджытæ Президент Гаглойты Аланы сæргълæудæй веноктæ æмæ дидинджытæ сæвæрдтой геноциды амæттæгты ном арыны нысанæн Згъудеры уæлмæрды 13 коммунары номыл иумиаг цырты раз.

Традицион æгъдауæй ардæм æрбацæуæг æмбæстæгтæ уæларвмæ суагътой урс тымбылæгтæ. Уыцы бон ма Хуссар Ирыстоны уагъд æрцыд иумиагнацион æмырæй алæууыны минут  æмæ дзы хайад райста бæстæйы разамонæг Гаглойты Алан. Уыцы рæстæг уый уыд кусæгон фарстыты фæдыл.

Акцимæ баиу сты фистæгæй цæуджытæ æмæ автортранспорты шофыртæ – æрлæууыдысты сæ цыдæй æмæ ссардтой геноциды амæттæгты ном.

Геноциды амæттæгты ном рох никуы уыдзæн

Уыцы бон ма аргъуанты уыдис Хуыцаумæ куывдтытæ ирон адæмæй геноциды амæттаг чи баисты, уыдоны тыххæй.

Хуссар Ирыстоны Генералон прокуроры хæдивæг Къæбулты Тигран мадзалы дзырдта, зæгъгæ, 1920 азы 20 июны гуырдзиаг фашисттæ ногæй равдыстой сæ сырдон хуыз æмæ фехстой сабыр цæрджыты.

«Ацы бон у нæ бæстæ æмæ нæ адæмы фыдохы бонтæй сæ иу. Уымæ гæсгæ республикæйы разамынад æмæ æмбæлон паддзахадон структурæтæ хъуамæ бакусой, цæмæй ирон адæмы геноцид дунеон æгъдауæй нымад æрцæуа», – банысан кодта прокуратурæйы минæвар.

Æртындæс коммунар-хæстоны – Уалыты Данел æмæ Никъала, Цхуырбаты Кышыл, Котолиты Никъала, Джиоты Андри, Ходты Пашка, Гобозты Соскъо, Тедеты Иван, Цхуыр­баты Тотыр, Дзеранты Буту, Джиголаты Резо æмæ Сашæ, Куымæридтаты Гигойы – 1920 азы 20 июны фехстой гуырдзиаг æфхæрджытæ. Ацы æртындæс лæппуйы нæмттæ фыст сты сæ иумиаг цыртыл. Махæн бар нæй, нæ сæрибардзинады сæрыл йæхи нывондæн чи æрхаста, уыцы хъæбатыр лæппуты нæмттæ ферох кæнынæн. Нæ фидæны фæлтæртæн хъуамæ дзурæм уыдоны сгуыхтдзинæдты тыххæй.

КЪÆБУЛТЫ Маринæ

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.