Гасситы Мурат æрбангом кодта ноджыдæр ирон адæмы

3-4 февралы æхсæвы дæс сахатæй фæстæмæ нæ республикæйы æмбæстæгтæ æнхъæлмæ кастысты Гасситы Мураты боксы суперсерийы WBSS версийы æр-дæгфиналон тохмæ кубæйаг боксер Юниер Дортикосимæ. Нæ республикæйæ ирон богалы фарс балæууыны нысанæн уырдæм ацыдысты хуссарирыстойнаг фарсхæцджытæ дæр. Фæстæмæ æрыз-дæхгæйæ, уыдон «Сутник»-ы пресс-центры радзырдтой сæ диссаджы тæлмæнтæ информацион фæрæзтæн.

Парти «Иугонд Ирыстон»-ы фæсивæдон организацийы сæрдар Коцты Михаил æрæздæхт æвæрццаг тæлмæнтæй йемыдзагæй, стæй стыр сæрыстырдзинады æнкъарæнтимæ ирон богал Гасситы Мураты тохæй, кæцы 12-æм раунды нокаутæй фæуæлахиз Дортикосыл. Ахæм диссаджы тохмæ дæхи цæстæй бакæсай, уый диссаг у, зæгъгæ. «Æз æм уый фæстæ бакастæн телеуынынады дæр, фæлæ уый бынтон æндæргъуызон у. Мураты тохы рæстæджы æндыгъд уыдыстæм уавæры, йæ алы цæфыл дæр ын эмоционалон хъæримæ æмбæлдыстæм… Уый диссаджы тох уыд…», – дзырдта Михаил. Куыд банысан кодта, уымæ гæсгæ хуссарирыстойнаг фарсхæцджыты сæйраг нысан æххæст æрцыд – уыдон балæууыдысты ирон богал Гасситы Мураты фарс. Уый равзæрста тохы æмбæлон тактикæ æмæ уæлахиз йæ къухты бафтыд.

«Æрмæст «Ихылбырæн аренæ» нæ, фæлæ æгас Сочи уыд ирон тырысаты. Мах нæ бадæнтыл бадгæ нæ кодтам, фæлæ сыл слæууыдыстæм æмæ хъæр кодтам : «Мурат, размæ!», – дзырдта Михаил.

Ацы тохмæ бакæсынмæ бæстæйы къухдариуæгад арвыстой кæстæр кары ахуыр-гæнинæгты. Сæ къухдариуæггæнæг Бязырты Аланæ сæ раппæлыд, зæгъгæ, æмбаргæ æмæ цæвиттойнагæй равдыстой сæхи. Гасситы Мураты уæлахизыл дзургæйæ, банысан кодта, уый нæ национ хæзна кæй у, мах сæрыстыр стæм уымæй, æмæ йын ноджыдæр нæ зæрдæ зæгъы стыр æнтыстытæ.

«Уыйбæрц фарсхæцджытæ нæ национ æртæхуыз тырысайы фæйлыдтой Мураты уæлахизы цытæн. Бузныг Муратæн – уый ноджы æрбангом кодта ирон адæмы», – банысан кодта Аланæ.

Мадзалы хайадисджытæ ма радзырдтой, Сочæйы цы флешмоб ауагътой, уый тыххæй. Хайад дзы райстой, ардыгæй цы фарсхæцджытæ ацыд, уыдон. Бакæсæн æм ис интернеты хызæджы «Инстограмм»-ы фæрстыл. Флешмоб у развæлгъау организацигонд акци, цыран хайадисджытæ сæххæст кæнынц развæлгъау сбæлвырдгонд архæйдтытæ, æмæ стæй апырх вæййынц.

Коцты Михаил ныфс бавæрдта, ирон боксер Мураты радон тох Александр Усикимæ дæр Саудоваг Аравийы нæ, фæлæ Уæрæсейы уагъд кæй æрцæудзæн, цæ-мæй хуссарирыстойнаг фарсхæцджытæн фадат фæуа ногæй ахæм тохмæ бакæсынæн.

Куыд зонæм, афтæмæй Мураты тохмæ ацыдысты боксæй æвзонг архайджытæ. Уыдон дæр дзырдтой сæ тæлмæнтæ. 13 аздзыд Гæджиты Гурам дзырдта, зæгъгæ, ныр бæлвырдæй зонын уый, æмæ Мураты кæй фæзмдзæн.

«Мах æрмæст иттæг хорз эмоцитæ нæ райстам, фæлæ нын уый фæахъаз дарддæры фæндаг равзарынæн. Махæн ис, ныр кæмæй исæм дæнцæг æмæ цæуыл ахуыр кæнæм, уый», – дзырдта Гурам.

Мадзалы хайадисджытæ ма арфæ ракодтой бæстæйы Президент Бибылты Анатолийæн йæ райгуырæн боны цытæн æмæ йын бузныджы ныхæстæ загътой, Сочæмæ балц сын кæй сорганизаци кодта, уый тыххæй.

Нæ уацх.