Уæрæсе Сухум æмæ Цхинвалы нæ ныууадздзæн иунæгæй Гуырдзыстоны ‘рдыгæй гæнæнуæвæн агрессийы раз æмæ сиды Тбилисы ныгуылæйнаг æмцæдисонтæм, цæмæй ахъуыды кæной бæстæйы милитаризацийы фæстиуæгыл, – уый тыххæй фехъусын кодта УФ-йы Фæсарæйнаг хъуыддæгты министры хæдивæг Григори Карасин.

«Кæд Гуырдзыстоны ныры хицауад хъусын кæны, зæгъгæ, нæ фæнд кæны Абхаз æмæ Хуссар Ирыстонмæ бабырсын, уæддæр Тбилис йæхи  тылиф кæны тыхæй ма спайда кæныны тыххæй Сухум æмæ Цхинвалимæ сразыдзинæдтыл къух æрфыссынæй», – загъта Карасин.

«Ницы гарантитæ ис,  ныгуылæйнаг хæцæнгæрзтæй ифтонг Гуырдзыстон йæ хæстмондаг хъуыдытæ йæ раздæры территоритæм ахасты ногæй кæй нæ сæххæст кæндзæнис, уымæн. Кæй зæгъын æй хъæуы, мах нæ æмцæдисонты иунæгæй нæ ныууадздзыстæм гæнæнуæвæн агрессийы раз. Фæлæ, Гуырдзыстоны НАТО-йы уæвынад хынцгæйæ, гæнæн ис дунеон стабилондзинадæн сæвзæра тæссаг ситуаци», – банысан кодта уый.

«Уымæ гæсгæ ныртæккæ мæн фæнды, Гуырдзыстоны милитаризацийы хайад чи исынц, уыцы бæстæтæ æмæ организацитæм æрсидын, цæмæй ахъуыды кæной сæ архайдтыты негативон фæстиуджытыл. Мах лæмбынæг нæ хъус дарæм ацы процессмæ æмæ æмбæлон уагыл ивындзинæдтæ хæсдзыстæм Абхаз æмæ Хуссар Ирыстонæн æдасдзинады къабазы æххуысмæ», – загъта министры хæдивæг.

«Мах Тбилисæй тæрсгæ нæ кæнæм, фæлæ нæ серьезонæй катайы æппарынц йæ ныгуылæйнаг æмцæдисонты архайдтытæ. Афтæ зыны, цыма уыдоны бынтондæр ферох, иу хатт сæ цæмæ æркодта Гуырдзыстоны милитаризаци. Хуссар Ирыстонмæ мæнгар-дæй бабырсынæй фæстæмæ дæс азы дæр нæма рацыд, фæлæ та Гуырдзыстоны ногæй рæзы НАТО-йы æфсæддон инфраструктурæ; план кæнынц Гуырдзыстонмæ бирæ милуанты аргъ хæцæнгæрзты ногдæр системæтæ – уæлдæфон хъахъхъæнынады ныхмæ францаг системæ æмæ танкты ныхмæ америкæйаг ракетон комплекстæ. АИШ та æрæвнæлдтой гуырдзиаг æфсæддон службæгæнджыты хæстон цæттæдзинады программæ æххæст кæнынмæ», – фехъусын кодта Г. Карасин.

Comments are closed, but trackbacks and pingbacks are open.