ФУТБОЛ

Футболæй Хуссар Ирыстоны æмбырдгонд командæ атахт Хæххон Къарабахмæ, цыран хайад райсдзæн Европæйы чемпионаты, кæцы уагъд цæуы Конифайы (ConIFA) эгидæйы бын. Хуссар Ирыстоны спортивон делегацийы сæргъ лæууы Фæсивæдон политикæ, спорт æмæ туризмы комитеты сæрдар Зассеты Сергей. Ацы ерыстæм командæйы бацæттæ кодта тренер Хъоцыты Сослан. Футболисттæ ацы ерыстæм сæхи цæттæ кодтой дыууæ къуырийы.

«Фыццаг къуыри фылдæр куыстам физикон цæттæдзинадыл. Дыккаг къуыри та тренировкæ кодтам пуртиимæ. Фаг рæстæг нын кæй нæ уыд, уымæ гæсгæ командæ æххæст цæттæ нæу, фæлæ нæ уæддæр ныфс ис, хорз кæй ахъаздзæн, уымæй», – загъта Хъоцыты Сослан.

Хуссар Ирыстоны æмбырдгонд арæзт æрцыд футболон командæ «Цхинвал»-ы бындурыл. Афтæ мæ йæм хуынд æрцыдысты ног хъазджытæ дæр. Ивындзинæдтæ æрцыд тренерон штабы дæр.  «Цы проблемон зонæтæ нын уыд, уырдæм æрбахуыдтам хорз хъазджыты. Зæгъæм, фæкæсдзысты нæм зындгонд хъахъхъæнæг, Уæрæсейы раздæры премьер-къорды хъазæг Мулдарты Алексей, «Спартак-Дзæуджыхъæу»-ы размæбырсæг Хасцъаты Дзамболат, æрдæгхъахъхъæнæг Гуырцъыты Батрадз, кæцыйы командæ «Чайка» ныр рахызт Уæрæсейы профессионалон къордмæ. Командæйы тренерон штабмæ та фæхуыдтам ме ‘мгар, «Спартак-Дзæуджыхъæу»-ы командæйы тренер Хозиты Мараты», – банысан кодта Хъоцыты Сослан.

Арцахмæ атæхыны размæ фæстаг тренировкæйы рæстæджы Хуссар Ирыстоны æмбырдгонды хъазджытæ дихгонд æрцыдысты дыууæ коман-дæйыл æмæ ахъазыдысты кæрæдзиимæ. Уым дæр бæрæг цыд хуыздæр цæттæ чи у, уый.

«Ныртæккæ мæ бон зæгъын нæу командæйы сæйраг сконды тыххæй. Фæлæ йæ мæхицæн ныридæгæн сбæрæг кодтон», – загъта Хъоцыты Сослан. 

Командæйы цæттæдзинады тыххæй йæ хъуыдытæ загъта йæ хъазæг Бæззаты Ибрагим дæр, кæцы у командæ «Цхинвал»-ы хуыздæр размæбырсæг. «Командæйы уæнгты ‘хсæн ис хорз ахастытæ. Алкæй дæр фæнды йæхи хорз равдисын. Уымæ гæсгæ тырндзыстæм æрмæстдæр уæлахизтæм. Ног хъазджытæй нæм чи æрбацыд, уыдон нын æнæзонгæ нæ уыдысты. Уымæ гæсгæ кæрæдзи хорз æмбарæм», – банысан кодта Бæззаты Ибрагим.

Европæйы чемпионаты архайæг командæтæ дихгонд æрцыдысты дыууæ къордыл. РХИ-йы æмбырдгонд бахаудта къорд «В»-мæ, цыран йæ ныхмæлæуджытæ уыдзысты Секейский край, Хурныгуылæн Сомихстон æмæ Падания. Хуссарирыстойнаг футболисттæ фыццаг хъазт акæндзысты 2-æм июны Хурныгуылæн Сомихстонимæ, дыккаг бон сæ ныхмæлæууæг уыдзæн Падания æмæ 4-æм июны та фембæлдзысты Секейскийы крайы командæимæ.      

Банысан кæнын хъæуы уый, æмæ РХИ-йы æмбырдгонд командæ 2014 азы хайад кæй райста Швецийы дунейы чемпионаты, 2017 азы та ерыс кодта Европæйы чемпионаты, кæцы уагъд цыд Цæгат Кипры. 

ХУРИТЫ Батрадз