Уæрæсейаг чингуыты фонд фæхъæздыгдæр ахсджиаг темæйыл фыст ног æмæ фыццаг аивадон чиныгæй.

Ивгъуыд къуырийы кæрон Хуссар Ирыстоны паддзахадон университеты конференц-залы Уæрæсейаг ахуыргонд, паддзахадон æмæ æхсæнадон архайæг, юридикон зонæдты доктор, профессор, УФ-йы сгуыхт юрист, Иван Соловьевы чиныг «Красные линии»-йæн уыд презентаци. Уый у куыд зонадон, афтæ бирæ публицистикон æмæ аивадон чингуыты автор дæр.

Презентацийы хайад райстой нæ республикæйы къухдариуæгад æмæ хицауады минæвæрттæ, Хуссар Ирыстоны Уæрæсейы Федерацийы минæварады минæвæрттæ, университеты ахуыргæнджытæ æмæ уазджытæ Донецкæй. Мадзалы куыд банысан кодтой, уымæ гæсгæ чиныг «Красные линии»-йæн презентацитæ уыд Уæрæсейы Федерацийы бирæ горæтты æмæ йын аккаг аргъ скодтой æппæт чиныгкæсджытæ дæр. Уымæн æмæ дзы автор æвдисы Украинæйы уагъдцæуæг Сæрмагонд æфсæддон операцийы реалон цаутæ, æфсæддон службæгæнджыты алыгъуызон уæззау фæндæгтæ, сæ тох æмæ хъысмæтыл. Уыимæ ма Сæрмагонд æфсæддон операцийыл фыст аивадон уацмыс у фыццаг Уæрæсейы Федерацийы. Йæ тираж у иу мин экземпляры бæрц.

Республикæ Хуссар Ирыстоны Æдасдзинады Советы секретарь Плиты Анатоли бæстæйы сæргълæууæг Гаглойты Аланы номæй арфæйы ныхæстæ загъта Иван Соловьевæн æмæ банысан кодта, зæгъгæ, мадзалы уазæг Хуссар Ирыстонæн бирæ ахсджиаг хъуыддæгтæ кæй сарæзта. «Абон мах цы чиныг презентаци кæнæм, уым Иван Никъалайы фырт фыццаг сдзырдта нæ хъайтартæ се ‘фсæддон службæйы хæс хъæбатырæй кæй æххæст кæнынц, уый. Æхсызгон мын у, æнæмæнгхъæуæгыл кæй банымадта йæ чиныгæн презентаци саразын Хуссар Ирыстоны, уый. Йæ ацы хъуыддагæй равдыста йæ ахаст махмæ, Ирыстон ын йæ зæрдæмæ æввахс æмæ æфсымæрон бæстæ кæй у, уый», – загъта Плиты Анатоли.

Чиныджы тыххæй йæ хъуыдытæ загъта университеты ректор Тедеты Вадим. «Абон мæ фæнды зæрдиаг арфæ ракæнын йæ бæстæйы æцæг патриот, æцæг уырыссаг лæг, нæ цытджын æмæ кадджын уазæгæн, йæ ног чиныджы рацыды сæраппонд. Уырны мæ, уымæн йæ ацы æрцыд нæ университетмæ фæстаг хатт  кæй нæ у æмæ та нæм кæй фæуазæг уыдзæ-нис, цæмæй ныр та фембæла студенттимæ», – загъта ректор.

Иван Соловьев йæ рады цыбыртæй радзырдта йæ чиныджы тыххæй. «Абон махæн нæ бæстæйы суверенитет æхсæвæй-бонæй чи хъахъхъæны, нæ сывæллæтты хорз фидæны сæрыл чи тох кæны, вазыгджын æфсæддон куысты уæлхъус чи ис, уыцы хъайтарты цытæн у мæ чиныг дæр. Райгуырæн бæстæйы сæрвæлтау йæ цардыл чи нæ хъуыды кæны æмæ йæ риуы æмбæрц знаджы ныхмæ чи цæуы, ахæм хъайтар лæппуты фарсмæ мах хъуамæ балæууæм æмæ сын равдисæм фронт æмæ фæсчъылдым иумæ кæй сты. Хатт фæсчъылдым дæр вæййы фронт, уымæн æмæ фæхъæуы бахъахъхъæнын уыцы «сырх хæххытæ», кæцыты тыххæй æз фыссын мæ чиныджы. Куыддæр чиныг рухс федта, афтæ йын фыццаг презентаци сарызтам Донецкы музейы. Уый фæстæ бацыдыстæм госпиталмæ æмæ йыл уым дæр æрдзырдтам. Дзæвгар экземпляртæ арвыстам фронты раззаг позициты хæстонтæм. Банысан кæнын мæ фæнды уый æмæ нæ алы презентаци дæр кæй свæййы куыд æнæхъæн ахсджиаг цау, æнæхъæн дуне, афтæ. Соловьев ма йæ ныхасмæ бафтыдта, зæгъгæ, йæ чиныджы адарддæр кæндзæн æмæ дзы радзурдзæн Ирыстоны хъайтарты тыххæй.

Уырыссаг æвзаг æмæ литературæйы ахуыргæнджыты ассоциацийы президент, профессор Тедеты Залинæ дæр ахсджиагыл банымадта чиныг «Красные линии»-йы рацыд. «Хуссар Ирыстоны æхсæнад дæр æнхъæлмæ кæсы ахæм темæйыл фыст чингуытæм, мемуартæ, кинотæ, спектакльтæм, уымæн æмæ махæн дæр нæ зæрдæтæ риссынц Донбассы цаутыл, Хуыцауæн лæгъстæ кæнæм æмæ кувæм Сæрмагонд æфсæддон операцийы хайадисджыты тыххæй. Кæй зæгъын æй хъæуы, æдзухдæр нæ хъус дарæм ног хабæрттæм æмæ æнамонд цаутыл мах дæр фæхъыг кæнæм.

Хæсты фæцæфуæвджыты æххуысы фонды сæргълæууæг Плиты Мадинæ дæр бузныджы ныхæстæ загъта Соловьевæн: «Мах нæ царды бавзæрстам хæсты æппæт зындзинæдтæ æмæ Стыр Уæрæсейы фæрцы фæуæлахиз стæм. Абон нæ лæппутæй бирæтæ хайад исынц Сæрмагонд æфсæддон операцийы æмæ мæ фæнды æппæт хъайтартæн дæр бузныг зæгъын», – банысан кодта Плиты чызг.

Презентацийы ма чиныджы фæдыл сæ хъуыдытæ загътой æндæр хайадисджытæ æмæ уыдон дæр банысан кодтой чиныджы актуалондзинад. Сæрмагонд æфсæддон операци ирон адæмæн дæр æцæгæлон кæй нæу, бирæ ирон лæппутæн Украинæйы зæххыл сæ туг кæй ныккалд, уымæ гæсгæ Соловьевы чиныг Ирыстоны адæмæн уыдзæнис тынг зынаргъ. Уыцы хъуыдыимæ автор йæ чингуытæй балæвар кодта мадзалы хайадисджытæн йæхи къухфыстимæ.

ЦХУЫРБАТЫ Ларисæ

 

Comments are closed, but trackbacks and pingbacks are open.